​ગાંધીનગર: સામાન્ય માણસને આર્થિક સુરક્ષા પૂરી પાડવાના ઉદ્દેશ્ય સાથે કેન્દ્ર સરકાર દ્વારા અનેક કલ્યાણકારી યોજનાઓ ચલાવવામાં આવે છે. આ પૈકીની એક અત્યંત લોકપ્રિય અને સસ્તી વીમા યોજના એટલે 'પ્રધાનમંત્રી સુરક્ષા વીમા યોજના' (PMSBY). આ યોજનાની સૌથી મોટી વિશેષતા એ છે કે માત્ર 20 રૂપિયાના મામૂલી વાર્ષિક પ્રીમિયમમાં નાગરિકોને 2 લાખ રૂપિયા સુધીનું વીમા કવચ મળે છે. જો તમે હજુ સુધી આ યોજનાનો લાભ લીધો નથી, તો તેના વિશેની તમામ માહિતી અહીં જાણી લેવી જરૂરી છે.

​શું છે આ યોજના અને કોણ લઈ શકે છે લાભ?

પ્રધાનમંત્રી સુરક્ષા વીમા યોજના એ મુખ્યત્વે અકસ્માત વીમા યોજના છે. આ યોજના હેઠળ અકસ્માતને કારણે થતા મૃત્યુ અથવા શરીરના અંગોને થતા કાયમી નુકસાન સામે સુરક્ષા મળે છે. આ યોજનામાં જોડાવા માટેની વય મર્યાદા 18 વર્ષથી 70 વર્ષની વચ્ચે નક્કી કરવામાં આવી છે. આ વય મર્યાદામાં આવતો કોઈપણ ભારતીય નાગરિક આ યોજના સાથે જોડાઈ શકે છે.

​કવરેજની વિગતો અને લાભ

આ યોજના અંતર્ગત વીમાની રકમ અને તેના નિયમો નીચે મુજબ છે:

​મૃત્યુના કિસ્સામાં: જો વીમો લેનાર વ્યક્તિનું અકસ્માતમાં મૃત્યુ થાય, તો નોમિનીને 2 લાખ રૂપિયાની સહાય મળે છે.
​કાયમી અપંગતા: જો બંને આંખો ગુમાવવી પડે, બંને હાથ અથવા પગ કામ ન કરી શકે તેવી કાયમી અપંગતા આવે, તો 2 લાખ રૂપિયાનું વળતર મળે છે.
​આંશિક અપંગતા: જો એક આંખની દ્રષ્ટિ સંપૂર્ણપણે ગુમાવવી પડે અથવા એક હાથ કે પગ કામ ન કરી શકે તેવી સ્થિતિ સર્જાય, તો 1 લાખ રૂપિયાનું કવરેજ મળે છે. નોંધનીય છે કે આ પોલિસીમાં મેચ્યોરિટી કે સરન્ડર જેવો કોઈ લાભ મળતો નથી, તે માત્ર અકસ્માત વીમા માટે જ છે.
​સમયગાળો અને પ્રીમિયમ ચૂકવણી

આ યોજનાનો કાર્યકાળ દર વર્ષે 1 જૂનથી શરૂ થઈને આગામી વર્ષની 31 મે સુધીનો હોય છે. જોકે, ગ્રાહક ગમે ત્યારે આ યોજનામાં જોડાઈ શકે છે. એકવાર તમે યોજના સાથે જોડાઈ જાઓ, પછી તમારા બેંક ખાતામાંથી દર વર્ષે 20 રૂપિયાનું પ્રીમિયમ ઓટો-ડેબિટ થઈ જાય છે. જો કોઈ વ્યક્તિના એકથી વધુ બેંક ખાતા હોય, તો પણ તે આ યોજનાનો લાભ માત્ર એક જ બેંક ખાતા દ્વારા લઈ શકે છે.

​કેવી રીતે જોડાવું?

આ યોજનામાં જોડાવાની પ્રક્રિયા અત્યંત સરળ છે. તમે તમારા સરકારી કે ખાનગી બેંકના ખાતા દ્વારા આમાં જોડાઈ શકો છો. આ માટે બેંકની નેટ બેંકિંગ સુવિધાનો ઉપયોગ કરવો સૌથી સરળ રસ્તો છે. નેટ બેંકિંગમાં લોગ-ઈન કર્યા બાદ 'ઈન્સ્યોરન્સ' સેક્શનમાં જઈને 'પ્રધાનમંત્રી સુરક્ષા વીમા યોજના' પસંદ કરો. ત્યારબાદ તમારા બેંક ખાતાની વિગતો અને ઓટો-ડેબિટ માટે સંમતિ આપવાની રહેશે. પ્રક્રિયા પૂર્ણ થયા બાદ તમને અરજીની પુષ્ટિ મળશે અને તમે રસીદ ડાઉનલોડ કરી શકશો.