નવી દિલ્હી:  ભારત અને દક્ષિણ કોરિયા વચ્ચે આર્થિક સંબંધોને વધુ મજબૂત અને સંતુલિત બનાવવા માટે સોમવારથી એક મહત્વપૂર્ણ બેઠકનો પ્રારંભ થયો છે. વર્ષ ૨૦૧૦માં અમલમાં આવેલા વ્યાપક આર્થિક ભાગીદારી કરાર (CEPA) ને આધુનિક અને સમયાનુકૂળ બનાવવા માટે બંને દેશો વચ્ચે ત્રણ દિવસીય (૨૫ થી ૨૭ મે) ઉચ્ચ સ્તરીય વાટાઘાટો શરૂ થઈ છે. ભારતે આ બેઠકમાં બંને દેશો વચ્ચે સતત વધી રહેલી વેપાર ખાધ અંગે ગંભીર ચિંતા વ્યક્ત કરી છે. કેન્દ્રીય વાણિજ્ય અને ઉદ્યોગ પ્રધાન પીયૂષ ગોયલે અગાઉ સ્પષ્ટ કર્યું હતું કે જૂનો કરાર ભારતની તરફેણમાં રહ્યો નથી, જેના કારણે આ આંતરરાષ્ટ્રીય કરારને અપગ્રેડ કરવો અનિવાર્ય બન્યો છે.

આંકડાકીય વિશ્લેષણ પર નજર કરીએ તો, નાણાકીય વર્ષ ૨૦૨૫-૨૬માં ભારતની કોરિયા ખાતેની નિકાસ અંદાજે ૬ અબજ ડોલર નોંધાઈ છે, જેની સામે આયાતનો આંકડો અધધ ૨૧.૩૫ અબજ ડોલર સુધી પહોંચી ગયો છે. આના કારણે ભારતને આશરે ૧૫.૩૫ અબજ ડોલરની જંગી વેપાર ખાધનો સામનો કરવો પડી રહ્યો છે. ભારતીય નિકાસકારોને દક્ષિણ કોરિયાના બજારમાં પ્રવેશવા માટે જટિલ નિયમો, કડક ધોરણો અને સર્ટિફિકેશનની પ્રક્રિયા જેવા અનેક બિન-ટેરિફ અવરોધો નડે છે. ભારત આ બેઠકમાં પોતાના આઈટી (IT), ફાર્માસ્યુટિકલ અને હાઈ-ક્વોલિટી કૃષિ ઉત્પાદનો માટે મુક્ત બજારની માંગણી મજબૂતાઈથી રજૂ કરી રહ્યું છે.

આ મહત્વાકાંક્ષી વાટાઘાટો પાછળનો મુખ્ય ઉદ્દેશ્ય વર્ષ ૨૦૩૦ સુધીમાં બંને દેશો વચ્ચેના દ્વિપક્ષીય વેપારને વર્તમાન ૨૭ અબજ ડોલરથી બમણો કરીને ૫૪ અબજ ડોલર સુધી લઈ જવાનો છે. CEPA હેઠળ બંને દેશો કસ્ટમ ડ્યુટી નાબૂદ કરવા, સેવા ક્ષેત્રને પ્રોત્સાહન આપવા અને કાયદાકીય પ્રક્રિયા સરળ બનાવવા માટે સહમત થઈ શકે છે. નિષ્ણાતોના મતે, જો આ ૧૨મા રાઉન્ડની સમીક્ષા બેઠક સફળ રહેશે, તો ભારતીય માલસામાન માટે એશિયાના ત્રીજા સૌથી મોટા બજારમાં પ્રવેશવાના દ્વાર ખુલશે, જે સ્થાનિક ઉદ્યોગો માટે ખૂબ જ નફાકારક સાબિત થશે.