ન્યૂયોર્ક : વૈશ્વિક નાણાકીય દિગ્ગજ ગોલ્ડમેન સેક્સે ક્રૂડ ઓઈલના ભવિષ્યના ભાવ અંગે એક મહત્વપૂર્ણ આગાહી રજૂ કરતા જણાવ્યું છે કે વર્ષ ૨૦૨૭માં બ્રેન્ટ ક્રૂડ ઓઈલનો સરેરાશ ભાવ ઘટીને $૮૦ પ્રતિ બેરલ સુધી પહોંચી શકે છે. ગોલ્ડમેન સેક્સ રિસર્ચના ગ્લોબલ કોમોડિટી રિસર્ચના સહ-વડા અને ઓઈલ રિસર્ચ હેડ ડાન સ્ટ્રુયવેન દ્વારા જાહેર કરાયેલા અહેવાલ અનુસાર, મધ્ય પૂર્વમાંથી તેલનો પુરવઠો સુધરવા અને વૈશ્વિક માંગ નબળી પડવાને કારણે બજારમાં સર્જાયેલી તેલની અછતમાં તીવ્ર ઘટાડો નોંધાયો છે. જોકે, અમેરિકા, ઈઝરાયેલ અને ઈરાન વચ્ચે સતત વધતા સંઘર્ષના કારણે સપ્લાય પર વિપરીત અસર પડવાની આશંકાને ધ્યાનમાં રાખીને ડિસેમ્બર ૨૦૨૬ માટે બ્રેન્ટ ક્રૂડનો અંદાજ $૮૫ થી વધારીને $૯૦ પ્રતિ બેરલ કરવામાં આવ્યો છે.

અહેવાલ મુજબ, સપ્ટેમ્બરના અંત સુધીમાં પર્સિયન ગલ્ફમાંથી તેલની નિકાસ ૨૦૨૫ ના સરેરાશ સ્તરની નજીક પહોંચી ગઈ છે, જ્યારે પર્સિયન ગલ્ફ બહાર પણ ઉત્પાદન વધ્યું છે. આ વર્ષના માર્ચ મહિનામાં વૈશ્વિક તેલની માંગ પુરવઠા કરતાં દરરોજ ૭.૨ મિલિયન બેરલ વધુ હતી, જે સપ્ટેમ્બરમાં ઘટીને દરરોજ માત્ર ૦.૩ મિલિયન બેરલ રહી ગઈ છે, એટલે કે માંગ અને પુરવઠો લગભગ સમાન થઈ ચૂક્યા છે. બેંકનો અંદાજ છે કે ૨૦૨૬ ના ચોથા ક્વાર્ટર સુધીમાં અને વર્ષ ૨૦૨૭ દરમિયાન વૈશ્વિક તેલ બજારમાં પુરવઠો માંગ કરતાં વધી જશે, જેના કારણે કિંમતો પર સતત નીચેની તરફ દબાણ રહેશે. જોકે, વૈશ્વિક સ્ટોક રેકોર્ડ નીચી સપાટીએ હોવાથી તાત્કાલિક ડિલિવરી માટે બ્રેન્ટ ક્રૂડનો ભાવ $૧૩૦ થી ઉપર અને ફ્યુચર્સ ભાવ $૧૦૦ થી ઉપર નોંધાયા છે, જેમાં હાલ $૨૫ નું રિસ્ક પ્રીમિયમ સામેલ છે.

માગના મોરચે, ૨૦૨૬ ના ત્રીજા ક્વાર્ટરમાં વૈશ્વિક તેલ વપરાશ ગયા વર્ષના સમાન સમયગાળા કરતા દરરોજ ૩.૩ મિલિયન બેરલ ઓછો નોંધાયો હતો, જેમાં ચીન, મધ્ય પૂર્વ અને વિકસિત એશિયન અર્થતંત્રોમાં સૌથી વધુ નબળાઈ જોવા મળી હતી. બેંકના અંદાજ મુજબ ૨૦૨૭ ના ચોથા ક્વાર્ટરમાં પણ વૈશ્વિક માંગ સામાન્ય સ્તર કરતા દરરોજ ૦.૭ મિલિયન બેરલ ઓછી રહેશે. ઇલેક્ટ્રિક વાહનોના (EVs) વધતા ઝડપી ઉપયોગ અને ચીનમાં બળતણ વપરાશની બદલાતી પેટર્નને કારણે લાંબા ગાળે ક્રૂડ ઓઈલની પરંપરાગત માંગ પર મોટી અસર પડી રહી છે.

ભૂતકાળમાં પણ ભૂરાજકીય તણાવ અને યુદ્ધની સ્થિતિ દરમિયાન ક્રૂડના ભાવમાં અચાનક મોટો ઉછાળો આવ્યા બાદ પુરવઠો સામાન્ય થતાં કિંમતો નીચી આવવાના ટ્રેન્ડ જોવા મળ્યા છે. હાલમાં મધ્ય પૂર્વના દેશોએ સંઘર્ષ વચ્ચે પણ પોતાની ડિલિવરી ક્ષમતામાં સુધારો કર્યો છે, પરંતુ આગામી સમયમાં વૈશ્વિક તેલ ભંડારોને ફરીથી ભરવાની પ્રક્રિયા અને ઓપેક (OPEC) દેશોની નિકાસ નીતિઓ વૈશ્વિક બજારની ભાવિ દિશા નક્કી કરવામાં મહત્વની ભૂમિકા ભજવશે.