નવી દિલ્હી, તા.૩૦: દેશના કરોડો અન્નદાતાઓ માટે કેન્દ્ર સરકાર તરફથી મોટા સમાચાર સામે આવ્યા છે. પ્રધાનમંત્રી નરેન્દ્ર મોદીની અધ્યક્ષતામાં યોજાયેલી કેન્દ્રીય કેબિનેટની મહત્વપૂર્ણ બેઠકમાં માર્કેટિંગ સિઝન ૨૦૨૭-૨૦૨૮ માટે ઘઉં સહિત ૬ મુખ્ય રવી પાકોના લઘુતમ સમર્થન મૂલ્ય (MSP) માં વધારો કરવાનો મોટો નિર્ણય લેવામાં આવ્યો છે. આર્થિક બાબતોની કેબિનેટ સમિતિ (CCEA) એ ખેડૂતોના હિતમાં આ વધારાને મંજૂરી આપવાની સાથે રૂ. ૯૦,૯૬૨ કરોડના મંજૂર ભંડોળને પણ લીલી ઝંડી આપી દીધી છે.

 

કયા પાકના MSPમાં કેટલો વધારો થયો?

 

સરકાર દ્વારા જાહેર કરવામાં આવેલા નવા દરો મુજબ, વિવિધ રવી પાકોના લઘુતમ સમર્થન મૂલ્યમાં પ્રતિ ક્વિન્ટલે નીચે મુજબનો નોંધપાત્ર વધારો કરવામાં આવ્યો છે:

 

• ઘઉં: પ્રતિ ક્વિન્ટલ રૂ. ૨૫ નો વધારો કરીને નવો MSP રૂ. ૨,૬૧૦ નક્કી કરાયો છે (જે અગાઉ રૂ. ૨,૫૮૫ હતો).

 

• જઉં (બારલી): પ્રતિ ક્વિન્ટલ રૂ. ૧૩૬ નો વધારો કરી નવો દર રૂ. ૨,૨૮૬ કરાયો છે (જે અગાઉ રૂ. ૨,૧૫૦ હતો).

 

• ચણા: પ્રતિ ક્વિન્ટલ રૂ. ૮૩ નો વધારો કરીને નવો ભાવ રૂ. ૫,૯૫૮ કરાયો છે (જે અગાઉ રૂ. ૫,૮૭૫ હતો).

 

• મસૂર: સૌથી મોટો રૂ. ૩૯૦ નો બમ્પર વધારો આપી નવો ભાવ રૂ. ૭,૩૯૦ પ્રતિ ક્વિન્ટલ પહોંચ્યો છે (જે અગાઉ રૂ. ૭,૦૦૦ હતો).

 

• રેપસીડ અને સરસવ: પ્રતિ ક્વિન્ટલ રૂ. ૪૧૩ નો વધારો કરીને નવો દર રૂ. ૬,૬૧૩ નક્કી કરવામાં આવ્યો છે.

 

• કુસુમ (સફ્લાવર): પ્રતિ ક્વિન્ટલ રૂ. ૬૭૫ નો માતબર વધારો કરીને નવો સપોર્ટ પ્રાઈસ રૂ. ૭,૨૧૫ કરાયો છે.

 

ખેડૂતોની આવક વધારવા તરફ મહત્વનું કદમ

 

કેન્દ્ર સરકારના આ નિર્ણાયક પગલાથી રવી સિઝનમાં વાવેતર કરતા દેશભરના લાખો ખેડૂતોને તેમના પાકના યોગ્ય અને પોષણક્ષમ ભાવ મળી રહેશે. સતત વધી રહેલા ઉત્પાદન ખર્ચ સામે ખેડૂતોને આર્થિક ટેકો આપવા અને કૃષિ ક્ષેત્રને વધુ મજબૂત બનાવવાના હેતુથી કેબિનેટે આ રવી પાકોના સમર્થન મૂલ્ય વધારવાનો મહત્વપૂર્ણ નિર્ણય લીધો છે.