મહારાજગંજ: તા.૦૬ ઉત્તર પ્રદેશના મહારાજગંજ જિલ્લામાં એક અત્યંત હૃદયદ્રાવક અકસ્માત સર્જાયો છે, જેમાં બે માસૂમ સગા ભાઈઓના પાણીમાં ડૂબી જવાથી મોત નિપજ્યા છે. કોતવાલી પોલીસ સ્ટેશન હેઠળના ચેહરી મહલગંજ વિસ્તારમાં ઈંટોના ભઠ્ઠા પાસે ખોદવામાં આવેલા પાણી ભરેલા ખાડામાં પડવાથી બે ભાઈઓએ જીવ ગુમાવ્યો છે. આ સમાચાર વાયુવેગે ફેલાતા આખા ગામમાં શોકનું મોજું ફરી વળ્યું છે.
રમત-રમતમાં સર્જાયો કાળમુખો અકસ્માત
મળતી માહિતી મુજબ, મુળ બાગાપારના કટહરા ટોલાના વતની ડબ્લૂ સાહની ચેહરીમાં ભાડાના મકાનમાં રહીને ઓટો ચલાવી પરિવારનું ગુજરાન ચલાવે છે. મંગળવારે ડબ્લૂ સાહની પોતાના કામે ગયા હતા અને પત્ની મનીષા પણ પાડોશમાં કામ કરવા ગઈ હતી. આ દરમિયાન પાંચ વર્ષનો રાજ અને ચાર વર્ષનો આયુષ ઘરની બાજુમાં આવેલા ઈંટના ભઠ્ઠા પાસે માટીના ઢગલા પર રમી રહ્યા હતા.
મોડી રાત સુધી શોધખોળ બાદ મળ્યા મૃતદેહ
સાંજે જ્યારે પિતા ઘરે પરત ફર્યા ત્યારે બાળકો રમતા દેખાયા હતા, પરંતુ થોડી જ વારમાં બંને બાળકો અચાનક ગાયબ થઈ ગયા હતા. પરિવારજનોએ આસપાસના લોકોની મદદથી ભારે શોધખોળ કરી હતી, પરંતુ ક્યાંય પત્તો લાગ્યો નહોતો. આખરે પોલીસને જાણ કરવામાં આવી હતી. તપાસ દરમિયાન બંને બાળકોના મૃતદેહ ભઠ્ઠા પાસેના પાણી ભરેલા ખાડામાંથી મળી આવ્યા હતા.
પરિવાર પર આભ ફાટ્યું
એકસાથે બે લાડકવાયા પુત્રોના મોતના સમાચાર મળતા જ માતા-પિતા પર આભ ફાટી પડ્યું છે. સ્વજનોના રડવા અકળાવનારા આક્રંદથી વાતાવરણ ગમગીન બની ગયું છે. ઘટનાને પગલે પોલીસે તપાસ હાથ ધરી છે કે ઈંટોના ભઠ્ઠાના સંચાલકો દ્વારા સુરક્ષાના કોઈ પગલાં લેવામાં આવ્યા હતા કે કેમ. આ ઘટનાએ મજૂરી કરી પેટિયું રળતા ગરીબ પરિવારની દુનિયા ઉજ્જડ કરી નાખી છે.