અબુ ધાબી : સમગ્ર વિશ્વનું ધ્યાન હાલમાં સંયુક્ત આરબ અમીરાત (UAE) પર કેન્દ્રિત થયું છે, જ્યાં ચાર વર્ષથી ચાલતા વિનાશક રશિયા-યુક્રેન યુદ્ધનો અંત આણવા માટે યુક્રેન, રશિયા અને યુનાઇટેડ સ્ટેટ્સ વચ્ચે બે દિવસીય ઐતિહાસિક ત્રિપક્ષીય વાટાઘાટો શરૂ થઈ છે. પ્રથમ દિવસે અબુ ધાબી ખાતે યોજાયેલી સાડા ચાર કલાક લાંબી આ બેઠકમાં યુદ્ધવિરામ, યુક્રેન માટે સુરક્ષા ગેરંટી અને પ્રાદેશિક સુરક્ષા જેવા અત્યંત સંવેદનશીલ મુદ્દાઓ પર ગંભીર ચર્ચા વિચારણા કરવામાં આવી હતી. આ મહત્વપૂર્ણ વાટાઘાટોમાં રશિયન પ્રતિનિધિમંડળનું નેતૃત્વ રાષ્ટ્રપતિ પુતિનના સલાહકાર વ્લાદિમીર મેડિન્સ્કી કરી રહ્યા છે, જ્યારે યુએસ તરફથી મધ્યસ્થી તરીકે સ્ટીવ વિટકોફ અને જેરેડ કુશનર મોરચો સંભાળી રહ્યા છે.

આ ત્રિપક્ષીય બેઠકમાં સીધા કોઈ યુરોપિયન દેશો હાજર નથી, પરંતુ ફ્રાન્સ, જર્મની અને નાટોના પ્રતિનિધિઓ યુક્રેનિયન ડેસિગ્નેશન સાથે અલગ ચર્ચા માટે અબુ ધાબીમાં જ ડેરા તંબૂ તાણીને બેઠા છે. બેઠક પૂર્વે યુએસ પ્રમુખ ડોનાલ્ડ ટ્રમ્પે સકારાત્મક વલણ દાખવતા જણાવ્યું હતું કે બંને દેશો સતત ચાલી રહેલા યુદ્ધથી કંટાળી ગયા છે અને હવે યુદ્ધવિરામ ઈચ્છે છે. ટ્રમ્પે ઉમેર્યું કે તેઓ રશિયા અને યુક્રેનને એક મંચ પર લાવવામાં સફળ રહ્યા છે અને દર મહિને યુદ્ધમાં જીવ ગુમાવતા ૨૫,૦૦૦ નિર્દોષ લોકોના મોત તેમને સતત વિચલિત કરે છે. અબુ ધાબીની આ પિચ પર થઈ રહેલી બેઠક પાંચ વર્ષ જૂના વિવાદને ઉકેલવા તરફનું મોટું કદમ માનવામાં આવે છે.

બીજી તરફ, વાટાઘાટો શરૂ થતાં પહેલાં રશિયાએ તાત્કાલિક યુદ્ધવિરામની માંગણીને ફગાવી દઈને પોતાનું વલણ સ્પષ્ટ કર્યું હતું. રશિયન વિદેશ પ્રધાન સેરગેઈ લવરોવે જણાવ્યું હતું કે આગળનું ચિત્ર સ્પષ્ટ થયા વિના મોસ્કો યુદ્ધવિરામ માટે સંમત થઈ શકે નહીં. જોકે, તેમણે તમામ પક્ષોની સામૂહિક સુરક્ષાને પ્રાથમિકતા આપવાના પ્રસ્તાવનું સ્વાગત કર્યું હતું. લવરોવે ઉમેર્યું કે યુનાઇટેડ સ્ટેટ્સ સાથે ભૂતકાળમાં થયેલી ચર્ચાઓનો મોટો અનુભવ છે, જે અબુ ધાબીની વાટાઘાટોમાં ઉપયોગી નિવડશે અને વ્યાપક કરાર થયા પછી જ સુરક્ષા ગેરંટી અસરકારક સાબિત થશે.

શાંતિ પ્રક્રિયા વચ્ચે બંને દેશોની શરતોમાં મોટો તફાવત જોવા મળી રહ્યો છે. રશિયન રાષ્ટ્રપતિ પુતિન ઈચ્છે છે કે યુક્રેન ડોનેટ્સક, લુહાન્સ્ક, ઝાપોરિઝ્ઝિયા અને ખેરસનમાંથી પોતાના સૈનિકો પાછા ખેંચે, નાટોમાં જોડાવાનો વિચાર કાયમ માટે છોડે, સૈન્ય પર કડક પ્રતિબંધો સ્વીકારે તેમજ મોસ્કો-સંલગ્ન ચર્ચ અને રશિયન ભાષા પરનો પ્રતિબંધ હટાવે. સામે પક્ષે યુક્રેનિયન રાષ્ટ્રપતિ વોલોડીમીર ઝેલેન્સકીએ રશિયાની આ તમામ માંગણીઓને સખત શબ્દોમાં નકારી કાઢી છે. હાલમાં પ્રથમ દિવસની વાટાઘાટો પૂર્ણ થયા બાદ બીજા દિવસની બેઠક પર તમામ દેશોની નજર ટકેલી છે, જેમાં વચગાળાના માર્ગ અંગે અગત્યના નિર્ણય લેવાય તેવી શક્યતા છે.