જાપાનના કાગોશિમા પ્રાંતમાં આવેલા અને દેશના સૌથી સક્રિય જ્વાળામુખી પૈકીના એક 'સાકુરાજીમા'માં શક્તિશાળી વિસ્ફોટ થયો છે. આ વિસ્ફોટને કારણે આકાશમાં ૩૫૦૦ મીટર (લગભગ ૧૧,૪૦૦ ફૂટ) ઊંચે સુધી રાખના વાદળો છવાઈ ગયા હતા. હવામાન વિભાગે એલર્ટ જારી કર્યું છે.

વિશ્વના સૌથી સક્રિય જ્વાળામુખી વિસ્તારોમાં આવતા જાપાનમાં ફરી એકવાર કુદરતનો પ્રકોપ જોવા મળ્યો છે. જાપાનના 'ટાઈમ બોમ્બ' તરીકે ઓળખાતા અને કાગોશિમા પ્રીફેક્ચરમાં આવેલા સાકુરાજીમા જ્વાળામુખીમાં ભયાનક વિસ્ફોટ થયો છે. આ વિસ્ફોટ એટલો શક્તિશાળી હતો કે તેમાંથી નીકળેલી ગરમ રાખ અને ધુમાડાના ગોટેગોટા આકાશમાં ૩૫૦૦ મીટર (અંદાજે ૧૧,૪૦૦ ફૂટ) થી વધુ ઊંચાઈ સુધી ઉડતા જોવા મળ્યા હતા.

જાપાન મીટિઅરૉલૉજિકલ એજન્સી (JMA) ના અહેવાલો મુજબ, આ ઘટના બાદ આસપાસના વિસ્તારોમાં ભારે માત્રામાં જ્વાળામુખીની રાખ પડવાની સંભાવના છે. સાકુરાજીમા જ્વાળામુખી સતત સક્રિય રહે છે, પરંતુ આ તાજેતરનો વિસ્ફોટ ઘણો વિશાળ છે. પ્રશાસને સાવચેતીના પગલારૂપે વોલ્કેનિક એલર્ટ લેવલ ૩ જારી કર્યું છે, જેનો અર્થ છે કે લોકોએ જ્વાળામુખીની નજીક જવું નહીં અને ૨ કિલોમીટરના વિસ્તારમાં પ્રવેશ પર સંપૂર્ણ પ્રતિબંધ મૂકવામાં આવ્યો છે. 

જ્વાળામુખીમાંથી નીકળેલા મોટા પથ્થરો (સિન્ડર બ્લોક્સ) ૧.૨ કિલોમીટર દૂર સુધી ફેંકાયા હોવાના અહેવાલો છે. સ્થાનિક નાગરિકોને ઘરની બહાર નીકળતી વખતે ફરજિયાત માસ્ક પહેરવા અને વાહન ચલાવતી વખતે વિઝિબિલિટી ઘટી જવાના કારણે અત્યંત સાવચેતી રાખવા કડક સૂચના આપવામાં આવી છે. આ ઘટનાને કારણે કાગોશિમા શહેર સહિતના આસપાસના પ્રાંતોમાં દહેશતનો માહોલ જોવા મળી રહ્યો છે.