તુર્કીના મનીસા પ્રાંતમાં ભયાનક માર્ગ અકસ્માત સર્જાયો છે. હાઇવે પર પ્રવાસીઓને લઈને જતી ટૂર બસ અને ટ્રક વચ્ચે જોરદાર ટક્કર થતાં 11 લોકોનાં મોત થયાં છે, જ્યારે 27 લોકો ઘાયલ થયા છે. અકસ્માત બાદ બસ પલટી ગઈ હતી. ઘટનાની જાણ થતાં પોલીસ, ફાયર બ્રિગેડ અને એમ્બ્યુલન્સ સહિતની ઇમરજન્સી ટીમો ઘટનાસ્થળે પહોંચી હતી. ઘાયલોને સારવાર માટે હોસ્પિટલમાં ખસેડવામાં આવ્યા છે. અકસ્માતનું ચોક્કસ કારણ જાણવા તપાસ હાથ ધરવામાં આવી છે.

તુર્કીના પશ્ચિમ વિસ્તારમાં આવેલા મનીસા પ્રાંતના અખિસાર જિલ્લામાં રવિવાર, 11 ઓક્ટોબર 2026ના રોજ આ દુર્ઘટના બની હતી. ગેબ્ઝે-ઓરહાનગાઝી-ઇઝમિર હાઇવે પર અખિસાર ટોલ ગેટ નજીક ટૂર બસ ટ્રક સાથે અથડાઈ હતી. બસ બુર્સાથી ઇઝમિર થઈને પ્રવાસન સ્થળ પામુક્કાલે તરફ જઈ રહી હતી. ટક્કર એટલી જોરદાર હતી કે બસ પલટી જતાં અનેક મુસાફરો ઈજાગ્રસ્ત થયા હતા.

મનીસાના ગવર્નર વહદેત્તિન ઓઝકાનના જણાવ્યા અનુસાર, બસમાં 34 મુસાફરો અને ત્રણ સ્ટાફ સભ્યો સહિત કુલ 37 લોકો સવાર હતા. ટ્રકમાં એક ડ્રાઇવર હતો. અકસ્માતમાં કુલ 11 લોકોનાં મોત થયાં હતાં અને 27 લોકો ઘાયલ થયા હતા.

સ્થાનિક સમય અનુસાર સવારે 11:11 વાગ્યે અકસ્માતની જાણ થઈ હતી. ત્યારબાદ એમ્બ્યુલન્સ, ફાયર બ્રિગેડ, પોલીસ અને ઇમરજન્સી રેસ્ક્યૂ ટીમો ઘટનાસ્થળે પહોંચી હતી. ઘાયલોને તાત્કાલિક નજીકની હોસ્પિટલોમાં સારવાર માટે ખસેડવામાં આવ્યા હતા. કેટલાક ઘાયલોની સ્થિતિ ગંભીર હોવાનું જણાવાયું હતું.

અકસ્મત બાદ સ્થાનિક વહીવટીતંત્ર અને પોલીસ દ્વારા તપાસ હાથ ધરવામાં આવી છે. બસ અને ટ્રક વચ્ચે ટક્કર કયા સંજોગોમાં થઈ તે અંગે સત્તાવાર કારણ હજુ જાહેર કરાયું નથી. તુર્કીના અધિકારીઓએ મૃતકોના પરિવારજનો પ્રત્યે સંવેદના વ્યક્ત કરી છે. સમગ્ર ઘટનાને લઈને કાયદેસરની કાર્યવાહી શરૂ કરવામાં આવી છે.