મુંબઈ : વૈશ્વિક સ્તરે વધી રહેલા ભૌગોલિક રાજકીય તણાવ (જીઓપોલિટિકલ ટેન્શન) ની સીધી અસર હવે દુનિયાભરના શેરબજારો પર જોવા મળી રહી છે. સોમવારે એશિયાઈ અને યુરોપીયન શેરબજારના પ્રમુખ સૂચકાંકોમાં ભારે અસ્થિરતા વચ્ચે મિશ્ર વલણ જોવા મળ્યું હતું. એક તરફ જ્યાં ચીન, જાપાન અને હોંગકોંગ જેવા મોટા બજારો લાલ નિશાન નીચે સરકી ગયા હતા, ત્યાં બીજી તરફ દક્ષિણ કોરિયા અને સિંગાપોરના બજારોએ લીલા નિશાન સાથે મજબૂતી દર્શાવી હતી. બજારના નિષ્ણાતોના મતે, યુએસ પ્રમુખ ડોનાલ્ડ ટ્રમ્પ દ્વારા ઈરાનને આપવામાં આવેલી ગર્ભિત ચેતવણી બાદ રોકાણકારોએ સાવચેતીનું વલણ અપનાવ્યું છે, જેની અસર ટ્રેડિંગ સેન્ટિમેન્ટ પર પડી રહી છે.

ટ્રમ્પની એક ધમકી અને એશિયાઈ શેરબજાર ધ્રુજી ઉઠ્યું!

આજના ટ્રેડિંગ સેશનમાં એશિયાના મોટાભાગના શેરબજારો દબાણ હેઠળ જોવા મળ્યા હતા. અમેરિકાના રાષ્ટ્રપતિ ડોનાલ્ડ ટ્રમ્પે ઈરાનને ખુલ્લી ચેતવણી આપતા કહ્યું કે "હવે સમય ઓછો છે અને ઘડિયાળ ટિક ટિક કરી રહી છે". આ નિવેદન બાદ આંતરરાષ્ટ્રીય સ્તરે નવું યુદ્ધ સંકટ ઘેરાયું છે અને રોકાણકારો મોટું જોખમ લેવાનું ટાળી રહ્યા છે.

પરિણામે, હોંગકોંગના પ્રખ્યાત હેંગ સેંગ (Hang Seng) સૂચકાંકમાં ૧.૧ ટકાનો મોટો ઘટાડો નોંધાયો હતો. જાપાનનો પ્રમુખ સૂચકાંક નિક્કી ૨૨૫ (Nikkei 225) પણ ૧ ટકા જેટલો તૂટ્યો હતો, જ્યારે ચીનનો શાંઘાઈ કમ્પોઝિટ સૂચકાંક ૦.૧ ટકાના સાધારણ ઘટાડા સાથે બંધ રહ્યો હતો. જોકે, આ મંદીની વચ્ચે દક્ષિણ કોરિયાનો કોસ્પી (KOSPI) સૂચકાંક ૦.૩ ટકા અને સિંગાપોરનો સ્ટ્રેટ ટાઇમ્સ સૂચકાંક ૦.૧ ટકાથી વધુના સુધારા સાથે બંધ થવામાં સફળ રહ્યા હતા.

યુરોપના બજારોમાં પણ અનિશ્ચિતતાનો માહોલ

એશિયાઈ બજારોના બંધ થયા બાદ ખુલેલા યુરોપના શેરબજારોમાં પણ સમાન પ્રકારની અંડર-કરન્ટ અસ્થિરતા જોવા મળી હતી. યુરોપના મુખ્ય ઇન્ડેક્સ કોઈ એક ચોક્કસ દિશા પકડવાને બદલે મિશ્ર સ્તરે ટ્રેડ થઈ રહ્યા હતા.

છેલ્લા અહેવાલો મળ્યા ત્યારે બ્રિટનની રાજધાની લંડનનો FTSE 100 સૂચકાંક આશરે ૦.૪ ટકાની મજબૂતી સાથે કારોબાર કરી રહ્યો હતો અને જર્મનીનો DAX ઇન્ડેક્સ પણ ૦.૨ ટકા પ્લસ હતો. જોકે, ફ્રાન્સના બજારમાંથી નબળા સંકેતો હતા, જ્યાં ફ્રાન્સનો પ્રમુખ સૂચકાંક CAC 40 ૦.૬ ટકા કરતાં વધુના ઘટાડા સાથે રેડ ઝોનમાં ટ્રેડ થઈ રહ્યો હતો.

વૈશ્વિક એનાલિટિક્સ ફર્મ્સના મતે, આગામી થોડા દિવસો સુધી જ્યાં સુધી મિડલ ઈસ્ટના તણાવ અને ક્રૂડ ઓઈલની કિંમતો અંગે સ્થિતિ સ્પષ્ટ નહીં થાય, ત્યાં સુધી બજારમાં આવી જ વાઈલ્ડ મૂવમેન્ટ (ઉતાર-ચઢાવ) ચાલુ રહેવાની પૂરેપૂરી સંભાવના છે.