ચેન્નાઈ : તમિળનાડુ વિધાનસભામાં ગુરુવારે શાસક પક્ષ TVK (તમિળગા વેટ્રી કઝગમ) અને વિપક્ષ DMK વચ્ચે કાયદો-વ્યવસ્થા મુદ્દે ભારે રાજકીય વાવાઝોડું સર્જાયું હતું. રાજ્યમાં કાયદો અને વ્યવસ્થાની સ્થિતિ કથળી હોવાનો આરોપ લગાવીને વિપક્ષી નેતા ઉધયનિધિ સ્ટાલિને સરકારને ઘેરવાનો પ્રયાસ કર્યો ત્યારે તમિળનાડુના મુખ્યમંત્રી સી. જોસેફ વિજયે ગૃહમાં ઉભા થઈને ચોંકાવનારી શૈલીમાં વિપક્ષને ખુલ્લો પડકાર ફેંક્યો હતો.

વિધાનસભાની કાર્યવાહી દરમિયાન વિપક્ષી નેતા ઉધયનિધિ સ્ટાલિને આરોપ લગાવ્યો હતો કે TVK સરકારના આવ્યા પછી કાયદો અને વ્યવસ્થા ખોરવાઈ ગઈ છે અને સરકાર માત્ર જૂની યોજનાઓ પર કામ કરી રહી છે. આ આરોપોનો ત્વરિત જવાબ આપતા મુખ્યમંત્રી વિજયે ગૃહમાં ગર્જના કરી હતી: "ગૃહના સન્માનનીય સભ્યોએ જેટલા પણ સવાલો ઉઠાવ્યા છે, તે બધાનો હું આગામી સોમવારે વિસ્તૃત અને સ્પષ્ટ ખુલાસો આપીશ. હું ગૃહમાં ન હોઉં તો પણ કયો સભ્ય શું સવાલ પૂછી રહ્યો છે તેની તમામ માહિતી મારી પાસે પહોંચી રહી છે. મારી વિપક્ષને માત્ર એક જ વિનંતી છે – સોમવારે કોઈ સીટ પરથી ઉઠીને ભાગી ન જતાં, મારો જવાબ સાંભળવા માટે ગૃહમાં જ હાજર રહેજો."

મુખ્યમંત્રી વિજયે સ્પીકર જે.સી.ડી. પ્રભાકરને વિનંતી કરી હતી કે તેઓ વિપક્ષી નેતાઓ પાસેથી એ વચન લે કે જ્યારે તેઓ સોમવારે વિપક્ષના તમામ આક્ષેપોનો વિગતવાર જવાબ આપશે, ત્યારે વિપક્ષી ધારાસભ્યો ગૃહત્યાગ (વોકઆઉટ) કરવાને બદલે પોતાની બેઠકો પર જ બેસી રહે.

આ દરમિયાન, રાજ્યના મંત્રી આધવ અર્જુના અને એસ. રાજમોહને પણ વિપક્ષના આક્ષેપોનો સામનો કરતા પૂર્વ DMK સરકારના શાસનકાળના ગુનાહિત આંકડાઓ યાદ અપાવ્યા હતા. શાસક પક્ષના આક્રમક વલણને કારણે ગૃહમાં ભારે હોબાળો મચી ગયો હતો. હવે આખીય તમિળનાડુની જનતાની નજર આગામી સોમવારે વિધાનસભામાં મુખ્યમંત્રી વિજય દ્વારા આપવામાં આવનારા જવાબો પર ટકેલી છે.