વૉશિંગ્ટન : ભારત દ્વારા આર્થિક વિકાસના આંકડાઓને વધુ સચોટ અને પારદર્શક બનાવવા માટે જીડીપી (GDP) ગણતરીની પદ્ધતિમાં કરવામાં આવેલા પાયાકીય સુધારાઓને આંતરરાષ્ટ્રીય સ્તરે મોટી સફળતા મળી છે. ઇન્ટરનેશનલ મોનેટરી ફંડ (IMF) ના એશિયા અને પેસિફિક વિભાગના ડિરેક્ટર કૃષ્ણ શ્રીનિવાસને બૅંગકૉક ખાતે યોજાયેલી પત્રકાર પરિષદમાં જણાવ્યું હતું કે ભારતની સુધારિત જીડીપી ગણતરીની પદ્ધતિ વૈશ્વિક શ્રેષ્ઠ પ્રથાઓ અને આઈએમએફ દ્વારા આપવામાં આવેલી સલાહ સાથે સંપૂર્ણપણે સુસંગત છે. તેમણે આ સરાહનીય પગલા બદલ મિનિસ્ટ્રી ઑફ સ્ટેટેસ્ટિક્સ ઍન્ડ પ્રોગ્રામ ઈમ્પ્લિમેન્ટેશન (MOSPI) ની કામગીરીની પ્રશંસા કરી હતી.

IMF ના અધિકારીએ સ્પષ્ટતા કરતા જણાવ્યું હતું કે ભારતે વૈશ્વિક ઊર્જાના આંચકાઓ સામે મજબૂત મૂળભૂત પરિબળો સાથે ઉત્તમ પ્રતિસાદ આપ્યો છે. વિનિમય દર પર થતી અસરને આર્થિક નિષ્ફળતા તરીકે ન જોવી જોઈએ, કારણ કે વિનિમય દર પર વૈશ્વિક વ્યાજદરો, રોકાણકારોની જોખમ લેવાની ક્ષમતા અને ક્રૂડ તેલના ભાવની સીધી અસર થતી હોય છે. ગુરુવારે જાહેર થયેલા આઈએમએફના 'રિજિનલ ઈકોનોમિક આઉટલૂક ફોર એશિયા ઍન્ડ પેસિફિક' અહેવાલમાં પણ ભારતને ઊભરતા અર્થતંત્રોમાં મહત્વનું સ્થાન આપવામાં આવ્યું છે અને જણાવવામાં આવ્યું છે કે વિદેશી વિનિમય બજારમાં ભારતની સ્થિતિ મજબૂત બની રહી છે.

ઉલ્લેખનીય છે કે ગત મહિને સરકારે જૂન ત્રિમાસિક ગાળાના ૭.૮ ટકા જીડીપી વૃદ્ધિના આંકડા જાહેર કર્યા હતા, જેને લઈને ભૂતપૂર્વ નાણાં સચિવ એસ. સી. ગર્ગ અને કેટલાક વિરોધ પક્ષો દ્વારા ડેટાની પ્રમાણિકતા સામે સવાલો ઉઠાવવામાં આવ્યા હતા. જો કે, આ મામલે મુખ્ય આર્થિક સલાહકાર વી. અનંત નાગેશ્વરે સ્પષ્ટતા કરી હતી કે તાજેતરના આંકડાઓ માર્ચ ૨૦૨૩ના નાણાકીય વર્ષને નવા આધાર તરીકે લઈને તૈયાર કરવામાં આવ્યા છે અને પદ્ધતિમાં ફેરફાર થવાને કારણે ડેટામાં જરૂરી સુધારા થયા છે.

આઈએમએફ દ્વારા આપવામાં આવેલા આ પ્રમાણપત્રથી સરકારના આર્થિક ડેટા અને નીતિઓની વિશ્વસનીયતા વધુ મજબૂત બની છે. વૈશ્વિક એજન્સીઓ દ્વારા ભારતીય અર્થવ્યવસ્થાના વખાણ થવાથી દેશમાં વિદેશી રોકાણને વેગ મળવાની સાથેસાથે આર્થિક વિકાસની રફતાર વધુ ઝડપી બનશે તેવો વિશ્વાસ નિષ્ણાતો દ્વારા વ્યક્ત કરવામાં આવી રહ્યો છે.