બેંગકોક : દુનિયાભરમાં પોતાની અદભુત કુદરતી સુંદરતા, ભવ્ય બૌદ્ધ મંદિરો અને આકર્ષક દરિયા કિનારા માટે જાણીતા પ્રખ્યાત પ્રવાસન સ્થળ થાઇલેન્ડ (Thailand) ની મુલાકાત લેવાનું વિચારી રહેલા ભારતીય પ્રવાસીઓ માટે એક અત્યંત મહત્વપૂર્ણ અને જરૂરી સમાચાર સામે આવ્યા છે. થાઇલેન્ડમાં સ્થિત ભારતીય દૂતાવાસ (Indian Embassy) દ્વારા પ્રવાસીઓની સુવિધા અને બેંગકોક સહિતના એરપોર્ટ પર ઇમિગ્રેશન પ્રક્રિયાને વધુ સરળ અને ઝડપી બનાવવા માટે એક સત્તાવાર એડવાઇઝરી (મુસાફરી માર્ગદર્શિકા) જારી કરવામાં આવી છે. આ ગાઇડલાઇનમાં સ્પષ્ટ જણાવાયું છે કે જો ભારતીય પ્રવાસીઓ ભારતથી પ્રસ્થાન કરતા પહેલા પોતાના તમામ જરૂરી દસ્તાવેજો યોગ્ય રીતે તૈયાર નહીં રાખે, તો તેમને થાઇલેન્ડ એરપોર્ટ પર પ્રવેશ કરતી વખતે ભારે મુશ્કેલી અથવા વિલંબનો સામનો કરવો પડી શકે છે.
દૂતાવાસ દ્વારા બહાર પાડવામાં આવેલી માર્ગદર્શિકા મુજબ, થાઇલેન્ડ જનારા દરેક ભારતીય મુસાફર પાસે ત્યાં પહોંચવાની તારીખથી ઓછામાં ઓછી છ મહિનાની માન્યતા (Validity) ધરાવતો અસલ પાસપોર્ટ હોવો અનિવાર્ય છે. આ ઉપરાંત, મુસાફરો પાસે કન્ફર્મ રિટર્ન ફ્લાઇટ ટિકિટ, હોટેલ બુકિંગના પાકા પુરાવા અને થાઇલેન્ડમાં રોકાણ દરમિયાન તેઓ ક્યાં-ક્યાં ફરવાના છે તેનો સ્પષ્ટ મુસાફરી કાર્યક્રમ (Itinerary) સાથે રાખવો પડશે. સૌથી મોટો અને નવો ફેરફાર એ છે કે હવે પ્રવાસીઓએ થાઇલેન્ડ એરપોર્ટ પર ઉતરવાના ૭૨ કલાક પહેલાં ઓનલાઇન માધ્યમથી 'થાઇલેન્ડ ડિજિટલ અરાઇવલ ક્રેડિટ કાર્ડ' (TDAC) ની પ્રક્રિયા સફળતાપૂર્વક પૂર્ણ કરવાની રહેશે.
વિઝા ઓન અરાઇવલ માટે ૨૦,૦૦૦ થાઇ બાહ્ટની રોકડ રાખવી પડશે સાથે
જો તમે વિઝા વેઇવર (નિયમોમાં સરકારી છૂટછાટ) અથવા 'વિઝા ઓન અરાઇવલ' (VOA) સુવિધાનો ઉપયોગ કરીને થાઇલેન્ડ જઈ રહ્યા છો, તો ત્યાંના ઇમિગ્રેશન નિયમો અનુસાર ચેકિંગ વખતે પ્રતિ મુસાફર ઓછામાં ઓછી ૨૦,૦૦૦ થાઇ બાહ્ટ (THB) (આશરે ₹૪૫,૦૦૦ થી વધુ) ની રોકડ રકમ (Cash) સાથે રાખવી ફરજિયાત છે. અધિકારીઓએ ખાસ સૂચના આપી છે કે જો કોઈ પ્રવાસીઓ ગ્રુપ કે પરિવાર સાથે મુસાફરી કરી રહ્યા હોય, તો પણ તેમણે કોઈ એક વ્યક્તિ પર આધાર રાખવાને બદલે ઇમિગ્રેશન કાઉન્ટર પર પહોંચતા પહેલા પોતાના વ્યક્તિગત દસ્તાવેજો પોતાની પાસે અલગથી તૈયાર રાખવાના રહેશે, જેથી તપાસ દરમિયાન એરપોર્ટ પર બિનજરૂરી સમય ન બગડે.
નોકરી માટે જનારાઓ માટે કડક ચેતવણી, ટ્રાન્ઝિટ મુસાફરો પણ સાવધ રહે
આ ટ્રાવેલ એડવાઇઝરીમાં નોકરી કે રોજગારના હેતુથી થાઇલેન્ડ જતા લોકો માટે પણ કડક આદેશ આપવામાં આવ્યા છે. જે ભારતીય નાગરિકોને થાઇલેન્ડની કોઈ કંપની તરફથી જોબ ઓફર મળી હોય, તેઓ ભૂલથી પણ વિઝા ઓન અરાઇવલ અથવા સામાન્ય ટૂરિસ્ટ વિઝા સુવિધાનો ઉપયોગ ન કરે. તેમણે ભારતથી જ પોતાના ચોક્કસ હેતુ અનુસારના કાયદેસરના વર્ક વિઝા મેળવીને જ ફ્લાઇટ પકડવી જોઈએ. આ ઉપરાંત, થાઇલેન્ડના એરપોર્ટ પરથી માત્ર ટ્રાન્ઝિટ (પસાર) થઈને અન્ય ત્રીજા દેશમાં જનારા મુસાફરો પાસે પણ તેમના અંતિમ મુકામના વિઝા સહિતના તમામ કાનૂની કાગળો હોવા જરૂરી છે. કોઈપણ પ્રવાસીએ મુસાફરી શરૂ કરતા પહેલા આ તમામ દસ્તાવેજોની ચકાસણી અચૂક કરી લેવી જેથી તેમની આંતરરાષ્ટ્રીય સફર યાદગાર અને મુશ્કેલી મુક્ત બની રહે.