કોલંબો : ભારતે બુધવારે શ્રીલંકા સાથે એક મહત્વપૂર્ણ કરાર પર હસ્તાક્ષર કર્યા છે જે હેઠળ ટાપુ રાષ્ટ્રને તેની કટોકટીની સ્વાસ્થ્ય સેવા માટે પાંચ પોઇન્ટ અઠ્વીસ મિલિયન યુએસ ડૉલરની ગ્રાન્ટ સહાય હેઠળ સો વધારાની એમ્બ્યુલન્સ પૂરી પાડવામાં આવશે. આ ગ્રાન્ટ કરાર પર હસ્તાક્ષર અને મેમોરેન્ડમ ઓફ અંડરસ્ટેન્ડિંગનું આદાનપ્રદાન કેન્દ્રીય સ્વાસ્થ્ય મંત્રી જે. પી. નડ્ડાની વિશેષ ઉપસ્થિતિમાં સંપન્ન થયું હતું. આ સહાય બંને રાષ્ટ્રો વચ્ચેના ગાઢ સંબંધોને વધુ મજબૂત બનાવે છે.

ભારત સમર્થિત આ એમ્બ્યુલન્સ સેવા શરૂઆતમાં જુલાઈ ૨૦૧૬માં શ્રીલંકાના પશ્ચિમી અને દક્ષિણી પ્રાંતોમાં સાડા સાત મિલિયન યુએસ ડૉલરની ગ્રાન્ટ સહાય સાથે શરૂ કરવામાં આવી હતી. જેમાં અઠ્યાસી એમ્બ્યુલન્સ, એક વર્ષ માટે તેનો ઓપરેશનલ ખર્ચ અને કટોકટી પ્રતિસાદ કેન્દ્રની સ્થાપના સામેલ હતી. ત્યારબાદ જુલાઈ ૨૦૧૮માં વડાપ્રધાન નરેન્દ્ર મોદી અને તત્કાલીન શ્રીલંકન વડાપ્રધાન રાનિલ વિક્રમસિંઘે દ્વારા પંદર પોઇન્ટ શૂન્ય બે મિલિયન યુએસ ડૉલરની વધારાની ગ્રાન્ટ સાથે આ સેવાને દેશવ્યાપી વિસ્તૃત કરવામાં આવી હતી.

આ તાજેતરના વિસ્તરણથી દેશની મફત કટોકટી એમ્બ્યુલન્સ સેવા જેને ૧૯૯૦ સુવા સેરીયા તરીકે ઓળખવામાં આવે છે, તેના વર્તમાન ત્રણ સો બાવીસ વાહનોના કાફલામાં સો વધુ એમ્બ્યુલન્સ ઉમેરાશે. આ સેવા માર્ચ ૨૦૧૫માં નરેન્દ્ર મોદીની ટાપુ દેશની મુલાકાત દરમિયાન શ્રીલંકન સરકારની વિનંતી પર સ્થાપિત કરવામાં આવી હતી. આ સેવા દરરોજ એક હજારથી એક હજાર બસો દર્દી-સ્થાનાંતરણ કોલ્સ સંભાળે છે અને સમગ્ર દેશમાં મફત કટોકટી તબીબી પરિવહન પૂરું પાડે છે.

શ્રીલંકામાં ભારતીય હાઇકમિશને આ ભાગીદારીને ભારત અને શ્રીલંકાના વિકાસ સહયોગનું એક ઉજ્જવળ ઉદાહરણ ગણાવ્યું છે જે લોકોને સ્પષ્ટ લાભ પહોંચાડી રહ્યું છે. સ્વાસ્થ્ય મંત્રી જે. પી. નડ્ડા બુધવારે કોલંબોમાં પ્રથમ બિમસ્ટેક સ્વાસ્થ્ય મંત્રીઓની બેઠકમાં ભાગ લેવા માટે શ્રીલંકાના પ્રવાસે છે. બિમસ્ટેક એ બંગાળની ખાડી ક્ષેત્રીય જૂથ છે જેમાં સાત દેશો બાંગ્લાદેશ, ભૂટાન, ભારત, મ્યાનમાર, નેપાળ, શ્રીલંકા અને થાઈલેન્ડ સામેલ છે.