પેરિસ, તા.૦૭: પેરિસ હૌટ કોઉચર વીક (Paris Haute Couture Week) હંમેશાંથી દુનિયાભરની અતરંગી અને આકર્ષક ફેશનનું હબ રહ્યું છે, પરંતુ આ વખતે ત્યાં જે જોવા મળ્યું તેણે દરેક ભારતીયનું માથું ગર્વથી ઊંચું કરી દીધું છે. પ્રખ્યાત ગ્રેમી એવોર્ડ વિજેતા અમેરિકન રેપર કાર્ડી બી (Cardi B) જ્યારે જાણીતા ભારતીય ડિઝાઈનર રાહુલ મિશ્રાના પાનખર ૨૦filter કોઉચર શોમાં પહોંચી, ત્યારે ત્યાં હાજર તમામ કેમેરા તેની તરફ વળી ગયા હતા. કાર્ડી બીએ આ શોની ફ્રન્ટ રોમાં એક એવો શાનદાર અને અનોખો કસ્ટમ ડ્રેસ પહેર્યો હતો, જેણે ફેશન, મૂર્તિકળા અને ભારતીય વારસા વચ્ચેની રેખાને સાવ મિટાવી દીધી હતી.
આરસપહાણની મૂર્તિ જેવો અદભુત આઈવરી લુક
કાર્ડી બી જ્યારે પેરિસના રનવે પર ઓલ-આઈવરી (હાથીદાંત જેવા સફેદ રંગના) કોઉચર આઉટફિટમાં ઉતરી, ત્યારે તે માત્ર એક સામાન્ય ગાઉન નહીં પરંતુ ચાલતી-ફરતી કળાકૃતિ જેવી દેખાતી હતી. રાહુલ મિશ્રાના ખાસ 'દેવી કલેક્શન' માંથી પ્રેરિત આ લુકમાં દૈવી સ્ત્રીત્વની શક્તિ અને ભારતીય સનાતન સંસ્કૃતિની ભવ્ય સુંદરતાની અદભુત ઝલક જોવા મળી હતી. આ આઉટફિટનો ઉપલો ભાગ પ્રાચીન ભારતીય પથ્થરની શિલ્પો (Stone Sculptures) ની નકલ કરીને સંપૂર્ણપણે હાથથી ભરતકામ કરીને તૈયાર કરવામાં આવ્યો હતો, જે જોઈને એવું લાગતું હતું જાણે સફેદ આરસપહાણમાં કોઈ સુંદર હાર કોતરેલો હોય!
મોતી, સ્ફટિકો અને ભવ્ય મંદિર કલાનો સમન્વય
આ અદ્ભુત રચનામાં મોતી, સ્ફટિકો અને બારીક મણકાઓનો ઉપયોગ કરીને ગળા, ધડ અને ખભા પર ખૂબ જ આકર્ષક મોટિફ્સ બનાવવામાં આવ્યા હતા. ડ્રેસની કમરની આસપાસ જટિલ મણકાકામ અને નાટકીય ફ્રિન્જ્ડ શૈલીથી એક ભવ્ય પેપ્લમ માળખું તૈયાર કરાયું હતું. આ વિગતો ભારતના પ્રાચીન મંદિરોના શિલ્પો અને પૌરાણિક દેવીઓના પરંપરાગત ચિત્રોમાં જોવા મળતી અદ્ભુત સુશોભન કળાની યાદ અપાવતી હતી.
વેસ્ટર્ન રેપરનો દેશી તડકો: માંગ ટીક્કાએ આકર્ષણ જગાવ્યું
કાર્ડી બીએ રાહુલ મિશ્રાના આ કલાત્મક દ્રષ્ટિકોણને ન્યાય આપવા માટે તેની સ્ટાઇલિંગ પણ એટલી જ જોરદાર કરી હતી. તેના કપાળની બરોબર વચ્ચે લગાવવામાં આવેલું નાટકીય સ્ફટિક આભૂષણ ભારતીય સંસ્કૃતિના પરંપરાગત 'માંગ ટીક્કા' જેવું જ લાગતું હતું, જેની સાથે તેણે કાનમાં લાંબી હીરાની બુટ્ટીઓ પહેરી હતી. આ ભવ્ય ગાઉનને વધુ હાઈલાઈટ કરવા માટે કાર્ડીએ મેકઅપ એકદમ ગ્લોઈંગ અને ન્યૂડ રાખ્યો હતો, જેમાં સ્મોકી આઈઝ અને શાર્પ વિંગ્ડ આઈલાઈનરે ધમાકો કર્યો હતો. તેના જે-બ્લેક વાળને ચાંદીના ઘરેણાં સાથે અડધા ગૂંથેલા રાખવામાં આવ્યા હતા. ગ્લોબલ ફેશનના મંચ પર ભારતીય સંસ્કૃતિની આ અનોખી પ્રસ્તુતિ અત્યારે સોશિયલ મીડિયા પર ધૂમ મચાવી રહી છે.