પોરબંદર : ગુજરાતના પોરબંદરમાં ભારતીય નૌસેના (ઇન્ડિયન નેવી) નું એક હથિયાર વગરનું માનવરહિત હવાઈ વાહન (UAV - ડ્રોન) ગંભીર અકસ્માતનો ભોગ બન્યું હોવાની ઘટના સામે આવી છે. પોરબંદરના ધરમપુર ગામ નજીક આવેલા નેશ વિસ્તારમાં આ ડ્રોન અચાનક તૂટી પડતાં સ્થાનિક ગ્રામજનોમાં ભારે અફરાતફરી અને દહેશતનો માહોલ ફેલાઈ ગયો હતો. જો કે, રાહતની વાત એ છે કે આ સમગ્ર ઘટનામાં કોઈ પણ પ્રકારની જાનહાનિ થવા પામી નથી.

મળતી વિગતો મુજબ, ભારતીય નૌસેનાનું આ ડ્રોન નિયમિત ઉડાન પર હતું. આ દરમિયાન કોઈ અકસ્માત કે ગંભીર ટેકનિકલ ખામી સર્જાવાના કારણે તે ધરમપુર ગામ પાસેના નેશ વિસ્તારમાં ક્રેશ થઈ ગયું હતું. ડ્રોન જમીન પર પટકાવાનો જોરદાર અવાજ સાંભળીને આસપાસના સ્થાનિક લોકો તાત્કાલિક ઘટનાસ્થળે દોડી આવ્યા હતા.

સુરક્ષાના પગલે સમગ્ર વિસ્તાર કોર્ડન કરાયો:

ડ્રોન ક્રેશ થયાની માહિતી મળતાની સાથે જ વહીવટી તંત્ર અને સંરક્ષણ પાંખ તુરંત એક્શન મોડમાં આવી ગયા હતા. પોરબંદર નેવીના ઉચ્ચ અધિકારીઓ, સ્થાનિક પોલીસ અને ફાયર ડિપાર્ટમેન્ટનો મોટો કાફલો કાફલા સાથે ઘટનાસ્થળે પહોંચી ગયો હતો. સુરક્ષાના કારણોસર અને કોઈ અનિચ્છનીય બનાવ ન બને તે માટે સેના અને પોલીસે ભેગા મળીને સમગ્ર વિસ્તારની ઘેરાબંધી (કોર્ડન) કરી લીધી છે. હાલમાં કોઈ પણ સામાન્ય નાગરિકને મલબાની નજીક જવાની મંજૂરી આપવામાં આવી રહી નથી.

હાઈ-લેવલ તપાસના આદેશ:

આ હાઇટેક અને આધુનિક ટેકનોલોજીથી સજ્જ ડ્રોન (UAV) કયા કારણોસર ક્રેશ થયું તે એક મોટો સવાલ છે. આ અકસ્માત પાછળ કોઈ ટેકનિકલ ખામી જવાબદાર હતી, ખરાબ હવામાન કે પછી અન્ય કોઈ કારણ હતું, તે તમામ પાસાઓની ઊંડી તપાસ કરવા માટે ભારતીય નૌસેના દ્વારા હાઈ-લેવલ ઇન્ક્વાયરી (ઉચ્ચ સ્તરીય તપાસ) ના આદેશ આપી દેવામાં આવ્યા છે. હાલમાં પરિસ્થિતિ સંપૂર્ણપણે નિયંત્રણ હેઠળ છે અને નેવીના ટેકનિકલ નિષ્ણાતો દ્વારા ડ્રોનના કાટમાળની બારીકાઈથી તપાસ કરવામાં આવી રહી છે.