સેક્રામેન્ટો: અમેરિકાના કેલિફોર્નિયામાંથી એક ચોંકાવનારી ઘટના સામે આવી છે, જ્યાં સેક્રામેન્ટો કાઉન્ટીમાં શાલિની ઠાકુર નામની ભારતીય મહિલાની નિર્દયતાપૂર્વક હત્યા કરવામાં આવી છે. રોહિત નામના ભારતીય નાગરિકે મહિનાઓ સુધી મહિલાનો પીછો કર્યા બાદ અસંખ્ય ગોળીઓ ઝીંકીને તેની હત્યા કરી નાખી હતી અને બાદમાં પોલીસે ઘેરોબંધી કરતા પોતે પણ કારમાં આપઘાત કરી લીધો હતો. આ ભયાનક ઘટનાથી બંને પરિવારો અને સ્થાનિક સમુદાયમાં શોક તથા સનસનાટી ફેલાઈ ગઈ છે.

અમેરિકાના ડિપાર્ટમેન્ટ ઓફ હોમલેન્ડ સિક્યોરિટી (DHS) અને સેક્રામેન્ટો કાઉન્ટી શેરિફ ઓફિસના જણાવ્યા અનુસાર, આરોપી રોહિત જાન્યુઆરી મહિનાથી જ શાલિનીનો સતત પીછો કરી રહ્યો હતો. તેણે શાલિનીની કાર નીચે એપલ એરટેગ (GPS ટ્રેકર) લગાવીને તેની દરેક હિલચાલ પર નજર રાખી હતી અને કારના ટાયરમાંથી હવા કાઢી નાખીને મદદનું નાટક કરતો હતો. એટલું જ નહીં, આરોપીએ ડુપ્લિકેટ ચાવી બનાવીને શાલિનીની ગેરહાજરીમાં અને તે સૂતી હતી ત્યારે પણ તેના અપાર્ટમેન્ટમાં ગેરકાયદે પ્રવેશ કર્યો હોવાનું તપાસમાં બહાર આવ્યું છે.

આ હેરાનગતિનો કરૂણ અંત 8 સપ્ટેમ્બરના રોજ આવ્યો, જ્યારે શાલિની પોતાની કાર પાસે પહોંચી ત્યારે રોહિત ત્યાં આવી પહોંચ્યો હતો. શાલિનીએ જીવ بچાવવા માટે ત્યાંથી ભાગવાનો પ્રયાસ કર્યો પરંતુ આરોપીએ તેનો પીછો કરી પિસ્તોલથી ઉપરાઉપરી ગોળીઓ ચલાવી હતી. શાલિની જમીન પર પડી ગયા બાદ પણ પાશવી હુમલાખોરે નજીક જઈ તેના માથામાં ગોળી મારી દીધી હતી અને પોતાની કાર લઈને ફરાર થઈ ગયો હતો. બાદમાં પોલીસે જ્યારે તેની કારને ઘેરીને બહાર આવવા કહ્યું ત્યારે રોહિતે અંદર જ પોતાની જાતને ગોળી મારીને જીવનનો અંત આણ્યો હતો.

પ્રાપ્ત માહિતી મુજબ, આરોપી રોહિત 2023માં એરિઝોના સરહદ મારફતે અમેરિકામાં ગેરકાયદેસર રીતે પ્રવેશ્યો હતો. આ દુર્ઘટના પાછળના ચોક્કસ કારણો અને બંને વચ્ચેના સંબંધોની પૃષ્ઠભૂમિ તપાસવા માટે અમેરિકન એજન્સીઓ દ્વારા હાલ સઘન તપાસ ચાલી રહી છે.