તેહરાન:  મધ્ય પૂર્વમાં વધતા ભૌગોલિક તણાવ અને આર્થિક સંકટ વચ્ચે ઈરાનના રાષ્ટ્રપતિ મસૂદ પેઝેશ્કિઆને અમેરિકા સાથે થયેલા તાજેતરના સમજૂતી કરાર નો બચાવ કરતા તેને યુદ્ધની મડાગાંઠમાંથી બહાર નીકળવાનો સૌથી વ્યવહારુ માર્ગ ગણાવ્યો છે. સરકારી સમાચાર એજન્સી IRNA સાથેની વાતચીતમાં તેમણે સ્પષ્ટ કર્યું કે આ કરારમાં ઈરાને કોઈ આત્મસમર્પણ કર્યું નથી. તેમણે ઉમેર્યું કે દેશ હાલમાં 'ન યુદ્ધ, ન શાંતિ' જેવી જટિલ પરિસ્થિતિમાંથી પસાર થઈ રહ્યો છે, જેને ઉકેલવા માટે અમેરિકા સાથે વાતચીત અને રાજદ્વારી કરાર અત્યંત જરૂરી બન્યા છે.

અમેરિકા અને ઈરાન વચ્ચે ચાલી રહેલી વાટાઘાટોમાં સૌથી મોટો સળગતો મુદ્દો હોર્મુઝ ને પુનઃ મુક્ત કરવાનો છે. આ દરિયાઈ માર્ગ વૈશ્વિક તેલ અને ગેસના પુરવઠા માટે અત્યંત મહત્વપૂર્ણ માનવામાં આવે છે. અમેરિકા દ્વારા લાદવામાં આવેલા આકરા પ્રતિબંધો અને દરિયાઈ નાકાબંધીના કારણે ઈરાનની અર્થવ્યવસ્થા ભારે દબાણ હેઠળ આવી ગઈ છે, જેનાથી દેશમાં વિદેશી રોકાણ અટકી પડ્યું છે. ઈરાન આ આર્થિક સંકટમાંથી મુક્તિ મેળવવા માટે સમજૂતી તરફ આગળ વધી રહ્યું છે, જોકે ઈરાની સુરક્ષા પરિષદે ચેતવણી આપી છે કે જો પડોશી દેશો અમેરિકી પ્રતિબંધોને સમર્થન આપશે તો પરિણામો ભોગવવા પડશે.

બીજી તરફ, ઈરાનના આંતરિક રાજકારણમાં પણ આકરા પગલાં લેવામાં આવી રહ્યા છે. જાન્યુઆરી માસમાં થયેલા હિંસક વિરોધ પ્રદર્શન દરમિયાન વિદેશી એજન્સીઓ માટે જાસૂસી કરવા અને હથિયારો સાથે તોડફોડ કરવાનો આરોપ ધરાવતા માજિદ અદિનેહ નામના વ્યક્તિને રવિવારે સવારે ફાંસી આપી દેવામાં આવી છે. આ દરમિયાન ગાઝામાં ઈઝરાયેલ-હમાસ સંઘર્ષમાં મૃત્યુઆંક ૭૩,૪૦૦ ને વટાવી ગયો છે, જે સમગ્ર મધ્ય પૂર્વમાં અસ્થિરતાની ગંભીરતા દર્શાવે છે.