તેહરાન: અમેરિકા અને ઈરાન વચ્ચે ચાલી રહેલા નાજુક યુદ્ધવિરામ વચ્ચે ઈસ્લામિક રિવોલ્યુશનરી ગાર્ડ કોર્પ્સ ના એરોસ્પેસ કમાન્ડર જનરલ મૌસાવીએ એક એવો દાવો કર્યો છે જેનાથી પશ્ચિમી દેશોની ઊંઘ ઉડી ગઈ છે. મૌસાવીના જણાવ્યા અનુસાર, ઈરાને આ બે અઠવાડિયાના શાંતિના સમયગાળાનો વ્યૂહાત્મક ઉપયોગ કરીને તેના મિસાઈલ અને આત્મઘાતી ડ્રોનના ભંડારમાં અભૂતપૂર્વ વધારો કર્યો છે. ઈરાની પ્રેસ ટીવી સાથેની વાતચીતમાં તેમણે ગર્જના કરી હતી કે અત્યારે ઈરાન યુદ્ધ શરૂ થયું તે પહેલાં કરતા પણ વધુ શક્તિશાળી અને સજ્જ સ્થિતિમાં છે. આ નિવેદન સ્પષ્ટ કરે છે કે ઈરાને યુદ્ધવિરામને માત્ર શાંતિ પ્રક્રિયા તરીકે નહીં, પણ લશ્કરી શક્તિ પુનઃસંગ્રહિત કરવાની તક તરીકે ઝડપી લીધો છે.

જનરલ મૌસાવીએ સીધો જ અમેરિકા અને ઈઝરાયેલ પર નિશાન સાધતા કહ્યું કે, જ્યારે ઈરાન પોતાની સ્વદેશી ટેકનોલોજીથી શસ્ત્રોના ડેપો ભરી રહ્યું છે, ત્યારે દુશ્મન દેશો વિદેશી સપ્લાય પર નિર્ભર હોવાથી દારૂગોળાની તંગીનો સામનો કરી રહ્યા છે. હોર્મુઝ સ્ટ્રેટ (Hormuz Strait) પર ચાલી રહેલા ભારે તણાવ વચ્ચે ઈરાનનો આ દાવો સૂચવે છે કે જો ફરીથી સંઘર્ષ ફાટી નીકળે, તો તે વધુ વિનાશક હશે. સંરક્ષણ વિશ્લેષકો માને છે કે ઈરાને આ સમયગાળા દરમિયાન ખાસ કરીને લાંબા અંતરની મિસાઈલો અને એડવાન્સ્ડ 'કામિકાઝ' ડ્રોન્સનું ઉત્પાદન તેજ કર્યું છે, જે અમેરિકી નૌકાદળના જહાજો માટે ગંભીર ખતરો બની શકે છે.

આ આક્રમક વલણથી હોર્મુઝની સામુદ્રધુનીમાં વૈશ્વિક તેલ પુરવઠા પર જોખમ તોળાઈ રહ્યું છે. ઈરાન આડકતરી રીતે દુનિયાને સંદેશ આપી રહ્યું છે કે તે માત્ર સંરક્ષણ નથી કરી રહ્યું, પણ વળતો હુમલો કરવાની ક્ષમતામાં પણ તે અનેકગણું આગળ નીકળી ગયું છે. યુદ્ધવિરામ દરમિયાન શસ્ત્રોના ભંડાર વધારવાની આ રણનીતિએ અમેરિકી સૈન્ય વ્યૂહરચનાકારોને મૂંઝવણમાં મૂકી દીધા છે, કારણ કે ઈરાન હવે પહેલા કરતા વધુ આત્મવિશ્વાસ સાથે ટેબલ પર વાટાઘાટો કરી રહ્યું છે. જો આ 'નાજુક શાંતિ' તૂટે, તો મધ્ય-પૂર્વમાં એક ભીષણ યુદ્ધ નિશ્ચિત હોવાનું દેખાઈ રહ્યું છે.