નવી દિલ્હી: પશ્ચિમ એશિયાનો સંઘર્ષ હવે યુરોપના આંગણે પહોંચી ગયો હોય તેવો ભયંકર માહોલ સર્જાયો છે. ઈરાનના ઇસ્લામિક રિવોલ્યુશનરી ગાર્ડ કોર્પ્સ એ યુકેના ગ્લોસ્ટરશાયરમાં આવેલા અને યુએસ સ્ટ્રેટેજિક બોમ્બર્સના મુખ્ય મથક એવા 'RAF ફેરફોર્ડ'  એરબેઝને સીધી ધમકી આપીને લક્ષ્ય બનાવવાની જાહેરાત કરી છે. ઈરાને તસ્નીમ ન્યૂઝ એજન્સી દ્વારા સ્પષ્ટ ચેતવણી આપી છે કે તેની સરહદો કે પ્રદેશ પર હુમલો કરવા માટે ઉપયોગમાં લેવાતું કોઈપણ વિદેશી એરબેઝ તેમના માટે કાયદેસરનું યુદ્ધ લક્ષ્ય ગણાશે. આ ધમકી બાદ બ્રિટિશ સશસ્ત્ર દળોએ પણ વળતો પ્રહાર કરતાં જણાવ્યું છે કે તેઓ દેશના રક્ષણ માટે સંપૂર્ણપણે તૈયાર છે.

તેહરાનથી ગ્લોસ્ટરશાયરનું અંતર આશરે 4,506 કિલોમીટર જેટલું અતિશય દૂર છે, જે ઈરાનની વર્તમાન મધ્યમ-અંતરની બેલિસ્ટિક મિસાઈલો (1,000 થી 2,000 કિમી રેન્જ) અને શાહેદ ડ્રોન ક્ષમતાઓની બહાર છે. આટલા લાંબા અંતર સુધી સચોટ પ્રહાર કરવા માટે આંતરખંડીય બેલિસ્ટિક મિસાઈલો ની જરૂર પડે છે, જે ક્ષમતા ઈરાન પાસે હાલ મર્યાદિત અથવા અપ્રમાણિત છે. લશ્કરી નિષ્ણાતોના મતે, યુકે પર સીધો લશ્કરી હુમલો કરવો ઈરાન માટે વ્યવહારિક રીતે અશક્ય છે, પરંતુ આ ધમકી પાછળનો મુખ્ય હેતુ સૈન્ય કરતાં વધુ રાજકીય, માનસિક અને નાટો દેશોમાં ભય પેદા કરવાનો છે.

આ વ્યૂહાત્મક ધમકી દ્વારા ઈરાન યુરોપિયન દેશો પર દબાણ લાવવા માંગે છે જેથી તેઓ અમેરિકાને પોતાના એરબેઝનો ઉપયોગ કરતા રોકે. યુનાઇટેડ કિંગડમ અને નાટોના સાથી દેશો હવે તેમના હવાઈ સંરક્ષણ કવચને વધુ મજબૂત કરી રહ્યા છે. આ ઘટનાક્રમે બ્રિટનની અંદર પણ રાજકીય ચર્ચાઓ જગાવી છે કે શું અમેરિકાના યુદ્ધોમાં ભાગીદાર બનવાથી બ્રિટિશ ભૂમિ પર સુરક્ષાનું જોખમ વધી રહ્યું છે. ઈરાનનો આ પગલો સીધો સંકેત આપે છે કે પશ્ચિમ એશિયાનું યુદ્ધ હવે વૈશ્વિક સ્તરે વધુ જટિલ રૂપ ધારણ કરી રહ્યું છે.