વોશિંગ્ટન: અમેરિકાના રાષ્ટ્રપતિ ડોનાલ્ડ જે ટ્રમ્પે મધ્ય પૂર્વમાં વધતા તણાવ વચ્ચે બંને પક્ષોને શાંતિની અપીલ કરી છે. તેમણે ઇઝરાયેલના વડાપ્રધાન બેન્જામિન નેતન્યાહુને ઈરાન પર વળતો હુમલો ન કરવાની સલાહ આપી છે. સાથે જ, બેરુત પર ઇઝરાયેલના હુમલા અંગે નારાજગી દર્શાવી છે અને ઈરાનને વધુ મિસાઈલ હુમલા ન કરી શાંતિ મંત્રણા માટે આગળ આવવા જણાવ્યું છે.

અહેવાલો મુજબ, અમેરિકાના રાષ્ટ્રપતિ ડોનાલ્ડ જે ટ્રમ્પે ઇઝરાયેલ અને ઈરાન વચ્ચેના સંઘર્ષમાં મોટો હસ્તક્ષેપ કર્યો છે. પત્રકાર બરાક રવિદના અહેવાલ મુજબ, રાષ્ટ્રપતિ ટ્રમ્પે તેમને જણાવ્યું છે કે તેઓ ઇઝરાયેલના વડાપ્રધાન બેન્જામિન નેતન્યાહુને તાત્કાલિક ફોન કરી તેમને ઈરાન પર હુમલો ન કરવા માટે  કહી રહ્યા છે. ઈરાને બેરુત પર ઇઝરાયેલના હુમલાના વિરોધમાં ઉત્તર ઇઝરાયેલને નિશાન બનાવીને બેલિસ્ટિક મિસાઈલો છોડી હતી, ત્યારબાદ સ્થિતિ અત્યંત ગંભીર બની છે અને અમેરિકા તેને યુદ્ધમાં પરિવર્તિત થતું રોકવા માંગે છે.

ફોક્સ ન્યૂઝ પર વાત કરતા ડોનાલ્ડ ટ્રમ્પે ઉત્તર ઇઝરાયેલ પર ઈરાનના જવાબી બેલિસ્ટિક મિસાઈલ હુમલા અંગે પ્રતિક્રિયા આપી હતી. તેમણે ઈરાનને સીધો સંદેશ આપતા કહ્યું, "હું ઈરાનને સૂચન કરીશ: તમે તમારી મિસાઇલો છોડી દીધી છે, તે પૂરતું છે. હવે ટેબલ પર પાછા ફરો અને કરાર કરો."

વધુમાં, લેબનોનની રાજધાની બેરુત પર ઇઝરાયેલ દ્વારા કરવામાં આવેલા તાજેતરના હુમલાઓ, જેના કારણે ઈરાને બેલિસ્ટિક મિસાઈલો છોડી હતી, તે અંગે પૂછવામાં આવતા ટ્રમ્પે સ્પષ્ટ નારાજગી વ્યક્ત કરી હતી. તેમણે જણાવ્યું કે તેઓ આ હુમલાઓથી બિલકુલ "ખુશ નથી" અને ઇઝરાયેલે આ સૈન્ય કાર્યવાહી કરતા પહેલા અમેરિકા સાથે કોઈ પણ પ્રકારનું સંકલન કે ચર્ચા કરી ન હતી. 

આ નિવેદનો દર્શાવે છે કે અમેરિકા હવે આ ક્ષેત્રમાં યુદ્ધવિરામ અને રાજદ્વારી ઉકેલ તરફ ભાર મૂકી રહ્યું છે.