રોમ: પશ્ચિમ એશિયામાં ચાલી રહેલા ભીષણ સંઘર્ષની અસરો હવે વૈશ્વિક રાજદ્વારી સંબંધો પર દેખાવા લાગી છે. અત્યાર સુધી ઈઝરાયલના સૌથી મજબૂત સમર્થક ગણાતા યુરોપિયન દેશ ઈટાલીએ એક મોટો નિર્ણય લેતા ઈઝરાયલ સાથેના સંરક્ષણ સહયોગ કરારને સ્થગિત કરી દીધો છે. ઈટાલીના વડાપ્રધાન જ્યોર્જિયા મેલોનીએ મંગળવારે જાહેરાત કરી હતી કે, વર્તમાન પરિસ્થિતિને ધ્યાનમાં રાખીને તેમની સરકાર સંરક્ષણ કરારના સ્વચાલિત નવીકરણને આગળ વધારશે નહીં.
મિત્રતામાં કેમ પડી તિરાડ?
જ્યોર્જિયા મેલોનીની જમણેરી સરકાર અત્યાર સુધી યુરોપમાં ઈઝરાયલની સૌથી નજીકની સાથી માનવામાં આવતી હતી. જોકે, છેલ્લા કેટલાક અઠવાડિયામાં પરિસ્થિતિ બદલાઈ છે. લેબનોનમાં ઈઝરાયલ દ્વારા કરવામાં આવેલા સૈન્ય હુમલાઓમાં સંયુક્ત રાષ્ટ્ર (UN) ના આદેશ હેઠળ ફરજ બજાવતા ઈટાલિયન સૈનિકોને પણ અસર થઈ છે. પોતાના સૈનિકોની સુરક્ષા અને માનવીય સંકટને જોતા ઈટાલીએ ઈઝરાયલની આક્રમક નીતિઓની ખુલ્લેઆમ ટીકા કરવાનું શરૂ કર્યું છે.
ઐતિહાસિક સંરક્ષણ કરાર પર બ્રેક
ઈટાલી અને ઈઝરાયલ વચ્ચે સંરક્ષણ ક્ષેત્રે વર્ષોથી ગાઢ સહયોગ રહ્યો છે, જેમાં હથિયારોની લે-વેચ અને સૈન્ય તાલીમનો સમાવેશ થાય છે. સામાન્ય રીતે આ કરારો સમયાંતરે આપોઆપ રિન્યૂ (નવીકરણ) થતા હોય છે, પરંતુ મેલોની સરકારે આ પ્રક્રિયા પર રોક લગાવી દીધી છે. આ નિર્ણય ઈઝરાયલ માટે મોટો રાજદ્વારી ઝટકો માનવામાં આવે છે, કારણ કે તે આંતરરાષ્ટ્રીય સ્તરે એકલતા તરફ ધકેલાઈ રહ્યું છે.
વૈશ્વિક સ્તરે બદલાતા સમીકરણો
ઈટાલીના આ પગલાથી પશ્ચિમ એશિયાના સંઘર્ષમાં નવા સમીકરણો સર્જાયા છે. યુરોપના અન્ય દેશો પણ હવે ઈઝરાયલને આપવામાં આવતી સૈન્ય સહાય બાબતે પુનઃવિચાર કરી રહ્યા છે. વડાપ્રધાન મેલોનીએ સ્પષ્ટ કર્યું છે કે જ્યાં સુધી શાંતિ સ્થાપવાની દિશામાં કોઈ નક્કર પ્રગતિ નહીં થાય, ત્યાં સુધી ઈટાલી પોતાના રાષ્ટ્રીય હિતો અને સૈનિકોની સુરક્ષાને પ્રાથમિકતા આપશે.