​પ્રયાગરાજ:ઉત્તર પ્રદેશના ચર્ચિત માફિયા અને પૂર્વ સાંસદ સ્વ. અતીક અહમદના પરિવાર પર ફરી એકવાર દુઃખનો પહાડ તૂટી પડ્યો છે. અતીકના સૌથી નાના પુત્ર આબાન અહમદનું ઝાંસી-કાનપુર હાઈવે પર થયેલા ગંભીર માર્ગ અકસ્માતમાં નિધન થયા બાદ, શનિવારે સાંજે પ્રયાગરાજના કસારી-મસારી સ્થિત પૈતૃક કબ્રસ્તાનમાં તેને સુપુર્દ-એ-ખાક (અંતિમ સંસ્કાર) કરવામાં આવ્યો હતો.

​આ કરુણ પ્રસંગે જેલમાંથી પેરોલ પર બહાર આવેલા આબાનના મોટા ભાઈઓ ઉમર અહમદ અને અલી અહમદ નાના ભાઈના મૃતદેહને જોઈને ફફડીને રોઈ પડ્યા હતા. લગભગ ચાર વર્ષ બાદ જેલમાંથી સશર્ત મુક્ત થઈને આવેલા બંને ભાઈઓએ પોતાના નાના ભાઈને અંતિમ વિદાય આપવાની સાથે સાથે જ પહેલીવાર પોતાના પિતા અતીક અહમદ, કાકા અશરફ અહમદ અને ભાઈ અસદ અહમદની કબર (મઝાર) પણ જોઈ હતી.

​સૂત્રોના જણાવ્યા અનુસાર, ઝાંસી જેલમાં બંધ ભાઈ અલીને મળવા જઈ રહેલા આબાન અહમદની એસયુવી કાર હાઈવેના ડિવાઈડર સાથે અથડાતાં સર્જાયેલા દર્દનાક અકસ્માતમાં આબાન અને તેના મિત્રનું ઘટનાસ્થળે જ મોત નીપજ્યું હતું. આ ઘટના બાદ અતીક અહમદની બહેન પરવીન કુરેશી દ્વારા હાઈકોર્ટમાં કરાયેલી અરજીના આધારે અલી (ઝાંસી જેલ) અને ઉમર (લખનૌ જેલ)ને નાના ભાઈના જનાજામાં સામેલ થવા માટે હાઈકોર્ટે શરતી પેરોલ મંજૂર કર્યા હતા.

​ચુસ્ત પોલીસ સુરક્ષા બંદોબસ્ત વચ્ચે બંને ભાઈઓને કબ્રસ્તાન લાવવામાં આવ્યા હતા. ત્યાં બનાવવામાં આવેલા ખાસ ટેન્ટમાં પરિવારના સભ્યો સાથે તેમની મુલાકાત કરાવાઈ હતી, જ્યાં પરિવારના તમામ સભ્યો અત્યંત ભાવુક થઈ ગયા હતા. મોટા ભાઈ ઉમર અહમદે આબાનના જનાજાની નમાજ પઢાવી હતી. આ દરમિયાન વર્ષ ૨૦૨૩માં પિતા અતીક, કાકા અશરફ અને ભાઈ અસદના નિધન સમયે જેલમાં હોવાથી તેમના અંતિમ સંસ્કારમાં હાજર ન રહી શકેલા ઉમર અને અલી પહેલીવાર તેમની કબર પર પહોંચ્યા હતા અને ભાવુક બની ગયા હતા.

​કબ્રસ્તાનમાં ભારે જનમેદની ઉમટી પડી હતી જેને નિયંત્રિત કરવા માટે પોલીસે ચુસ્ત બેરિકેડિંગ અને કડક સુરક્ષા વ્યવસ્થા ગોઠવવી પડી હતી. અંતિમ વિધિ પૂર્ણ થયા બાદ બંને ભાઈઓને પુનઃ જેલ ભેગા કરવાની પ્રક્રિયા હાથ ધરવામાં આવી હતી.