બેંગલુરુ : કાવેરી નદી પર પ્રસ્તાવિત 'મેકેદાતુ બેલેન્સિંગ રિઝર્વોયર' (ડેમ) પ્રોજેક્ટને લઈને કર્ણાટક અને તમિલનાડુ વચ્ચેનો જળ વિવાદ ફરી એકવાર ચરમસીમાએ પહોંચ્યો છે, જેના કારણે હવે બંને રાજ્યોના કોંગ્રેસ નેતાઓ જ સામસામે આવી ગયા છે. અહેવાલો અનુસાર, મૈસુર ખાતે આયોજિત એક કાર્યક્રમમાં વડાપ્રધાન નરેન્દ્ર મોદીની હાજરીમાં કર્ણાટકના નેતા ડીકે શિવકુમારે મેકેદાતુ પ્રોજેક્ટ માટે જરૂરી વન અને અન્ય કાનૂની મંજૂરીઓ મેળવવા કેન્દ્ર સરકારની મદદ માંગી હતી. શિવકુમારે સ્પષ્ટ શબ્દોમાં જણાવ્યું હતું કે સુપ્રીમ કોર્ટે આ પ્રોજેક્ટ અંગે સ્પષ્ટ ચુકાદો આપ્યો છે અને કર્ણાટકમાં આ મહત્વપૂર્ણ જળાશયના નિર્માણને હવે કોઈ રોકી શકશે નહીં.

ડીકે શિવકુમારના આ આક્રમક નિવેદન બાદ તમિલનાડુના રાજકારણમાં ભારે ખળભળાટ મચી ગયો છે. તમિલનાડુ કોંગ્રેસ સમિતિના પ્રમુખ મણિકમ ટાગોરે શનિવારે સોશિયલ મીડિયા પ્લેટફોર્મ 'X' પર શિવકુમારના નિવેદનની આકરી ટીકા કરતા વળતો પ્રહાર કર્યો હતો. ટાગોરે જણાવ્યું હતું કે કર્ણાટક સરકાર આ પ્રોજેક્ટ મુદ્દે એકપક્ષીય અભિગમ અપનાવી રહી છે, જે દેશની સંઘીય પ્રણાલી, સુપ્રીમ કોર્ટના નિર્દેશો અને કાવેરી જળ વિવાદ ટ્રિબ્યુનલના અંતિમ ચુકાદાનું સીધું ઉલ્લંઘન છે. તેમણે વધુમાં કહ્યું કે કાવેરી નદીના તટપ્રદેશમાં તમિલનાડુ એક ડાઉનસ્ટ્રીમ રાજ્ય હોવાથી તેની સલાહ અને સંમતિ વિના કર્ણાટક પોતાના સ્તરે કોઈપણ પ્રોજેક્ટ અમલમાં મૂકી શકે નહીં.

તમિલનાડુના ખેડૂતોની આજીવિકા પર ગંભીર ખતરો હોવાની ચેતવણી આપતા મણિકમ ટાગોરે કેન્દ્ર સરકારને અનુરોધ કર્યો છે કે તમિલનાડુની સંમતિ વિના મેકેદાતુ પ્રોજેક્ટને કોઈપણ પ્રકારની મંજૂરી આપવામાં ન આવે. ટાગોરના મતે, જો આ બંધનું નિર્માણ થશે તો તમિલનાડુના ખાસ કરીને ડેલ્ટા જિલ્લાઓના ખેડૂતોને મળતા કાવેરીના પાણીના હિસ્સા પર માઠી અસર પડશે, અને કર્ણાટકને આ બાંધકામ આગળ વધારતા અટકાવવાની જવાબદારી કેન્દ્ર સરકારની છે. તેમણે સ્પષ્ટ કર્યું છે કે તમિલનાડુ કોંગ્રેસ રાજ્યના હિતોનું રક્ષણ કરવા માટે આ પ્રોજેક્ટનો વિરોધ ચાલુ રાખશે અને  તંજાવુરની તેમની મુલાકાત દરમિયાન પણ તેઓ આ મુદ્દાને જોરશોરથી ઉઠાવશે.