બેંગલુરુ : બેંગલુરુના સહકારનગર (ડોલર કોલોની) વિસ્તારમાં આવેલી જાણીતી ચેરમેન ક્લબ ખાતે ૩ સપ્ટેમ્બરના રોજ ફૂડ સેફ્ટી એન્ડ ડ્રગ એડમિનિસ્ટ્રેશન વિભાગની ફૂડ સેફ્ટી વિંગ દ્વારા હાથ ધરવામાં આવેલી આકસ્મિક નિરીક્ષણ ઝુંબેશ દરમિયાન રસોડામાં વ્યાપક અનિયમિતતાઓ અને ગંભીર અસ્વચ્છતા માલૂમ પડતાં ક્લબનું રસોડું તત્કાલિક અસરથી બંધ કરાવી દેવામાં આવ્યું છે.
આ દરોડા દરમિયાન અધિકારીઓને સ્થળ પરથી ૪૦ કિલો મુદતવીતી (એસ્પાયર્ડ) મરચાં સહિત ૫ કિલો બ્રેડ ક્રમ્બ્સ અને ૨ કિલો અન્ય ખાદ્ય ઉત્પાદનો પર એફએસએસએઆઈ (FSSAI) ના નિયમો વિરુદ્ધનું અયોગ્ય લેબલિંગ જોવા મળ્યું હતું, તેમજ ખોરાક તૈયાર કરવા તથા સંગ્રહ કરવાની જગ્યાઓ પર અત્યંત ગંદકી અને શાકાહારી તથા માંસાહારી ખાદ્ય સામગ્રીનો એકસાથે સંગ્રહ કરવામાં આવ્યો હોવાનું બહાર આવ્યું હતું.
તપાસ અધિકારીઓના જણાવ્યા અનુસાર, ખાદ્ય ઉત્પાદનોમાં પ્રતિબંધિત અથવા અનધિકૃત કૃત્રિમ રંગોનો બેરોકટોક ઉપયોગ કરવામાં આવતો હતો અને ખાદ્ય સુરક્ષા તથા સ્વચ્છતાના પ્રાથમિક ધોરણોનું પણ સરેઆમ ઉલ્લંઘન થઈ રહ્યું હતું, જેને ધ્યાનમાં રાખીને ખાદ્ય સુરક્ષા અને ધોરણો અધિનિયમ, ૨૦૦૬ અને નિયમો, ૨૦૧૧ હેઠળ કસૂરવાર સંચાલકો સામે કાનૂની કાર્યવાહી શરૂ કરવામાં આવી છે.
તાજેતરના સમયમાં શહેરમાં વધતી જતી ખાદ્ય સુરક્ષાની ચિંતાઓ અને નાગરિકોના સ્વાસ્થ્ય સાથે ચેડાં કરતા રેસ્ટોરાં તથા ક્લબ્સ સામે વહીવટી તંત્ર દ્વારા સઘન ચેકિંગ અભિયાન ચલાવવામાં આવી રહ્યું છે, ત્યારે આગામી દિવસોમાં આ પ્રકારે નિયમોનું ઉલ્લંઘન કરનારા અન્ય ખાદ્ય વ્યવસાયિકો સામે પણ સખત દંડાત્મક પગલાં લેવામાં આવશે તેવી પૂરી સંભાવના છે.