અમેરિકામાં કર્મચારીઓનું શોષણ કરનારા ત્રણ ગુજરાતીઓને લાખોનો દંડ
ડંકીન ડોનટ્સમાં કામ કરનારા કર્મચારીઓને ઈન્ડિપેન્ડન્ટ કોન્ટ્રાક્ટર તરીકે દર્શાવ્યા, ૧૦૦થી વધુ વર્કર્સ અને સરકારને ચૂકવવો પડશે ૧.૪૬ મિલિયન ડોલરનો દંડ
મેસાચ્યુસેટ્સ તા.૯: અમેરિકામાં વર્કર્સનું શોષણ કરવાના આરોપમાં ત્રણ ગુજરાતીઓ તેમજ બે સ્ટાફિગ કંપનીઓને કુલ ૧.૪૬ મિલિયન ડોલરનો દંડ ફટકારવામાં આવ્યો છે. મેસાચ્યુસેટ્સ એટર્ની જનરલ એન્ડ્રી જોય કેમ્બેલના જણાવ્યા અનુસાર ડંકીન ડોનટ્સની ફ્રેન્ચાઈઝી ઓપરેટ કરતા નોર્ધન મેનેજમેન્ટ ગ્રુપ LLCના મેનેજર જિગર પટેલ, નિકુલ પટેલ અને નિલેશ પટેલ ઉપરાંત સ્ટાફિગ એજન્સી D એન્ડ J સર્વિસિસ ગ્રુપ LLC તેમજ પ્રાઈમ મેનેજમેન્ટ સર્વિસિસ કોર્પના મેનેજર ડેલોન ઓલિવિએરા સામે એમ્પ્લોયમેન્ટ લોનો ભંગ કરી કર્મચારીઓને સમયસર પગાર ના આપવા ઉપરાંત ટેમ્પરરી એમ્પ્લોઈઝને નવા અસાઈન્મેન્ટ અંગે પ્રોપર નોટિસ ના આપવા બાબતે આ કાર્યવાહી કરવામાં આવી છે. આ મામલે એમ્પ્લોયર્સે ૧૦૦ એમ્પ્લોઈઝને વળતર ચૂકવવાનું રહેશે.
ત્રણ ગુજરાતીઓ દ્વારા સંચાલિત નોર્ધન મેનેજમેન્ટ ગ્રુપ LLC દ્વારા ઈસ્ટર્ન મેસાચ્યુસેટ્સમાં ડંકીન ડોનટ્સની ૨૦થી વધુ ફ્રેન્ચાઈઝી ઓપરેટ કરવામાં આવે છે. એટર્ની જનરલની ઓફિસના જણાવ્યા અનુસાર ૨૦૨૩માં નોર્ધન મેનેજમેન્ટ ગ્રુપે પહેલા D&J સાથે અને પછી પ્રાઈમ મેનેજેમન્ટ સર્વિસિસ કોર્પ સાથે વર્કર્સ હાયર કરવા માટે કોન્ટ્રાક્ટ કર્યો હતો. આ વર્કર્સને નોર્ધન મેનેજમેન્ટ ગ્રુપના ડંકીન ડોનટ્સમાં ઈન્ડિપેન્ડન્ટ કોન્ટ્રાક્ટર તરીકે હાયર કરવામાં આવ્યા હતા જેમની પાસે સ્ટોર મેનેજર અને શિફટ મેનેજર ઉપરાંત કોફીમેકર્સ અને બેકર્સ તરીકે કામ કરાવવામાં આવતું હતું.
આ મામલે એટર્ની જનરલ ઓફિસ દ્વારા હાથ ધરાયેલી તપાસમાં જાણવા મળ્યું હતું કે ઈન્ડિપેન્ડન્ટ કોન્ટ્રાક્ટર તરીકે હાયર કરાયેલા આ કર્મચારીઓ નોર્ધન મેનેજમેન્ટ ગ્રુપના કહ્યા અનુસાર સ્ટોર્સમાં રોજબરોજનું કામ કરતા હતા અને ડંકીનની કોર સર્વિસિસ પૂરી પાડતા હતા. પોતાની ચોરી પકડાય નહીં તે માટે D&J, પ્રાઈમ મેનેજમેન્ટ સર્વિસિસ કોર્પ તેમજ નોર્ધન મેનેજમેન્ટ ગ્રુપ જોઈન્ટ એમ્પ્લોયર્સ બનીને આ વર્કર્સ પાસેથી કામ લેતા હતા. આમ કરવાથી વર્કર્સને એમ્પ્લોયમેન્ટ પ્રોટેક્શન સહિતની સવલતો નહોતી આપવી પડતી, પરંતુ કોઈ વર્કરને ઈન્ડિપેન્ડન્ટ કોન્ટ્રાક્ટર તરીકે દર્શાવી તેની પાસેથી રેગ્યુલર એમ્પ્લોઈ તરીકે કામ કરાવવું મેસાચ્યુસેટ્સના વેજ એન્ડ અવર લો હેઠળ ગુનો બને છે.
મેસાચ્યુસેટ્સના કાયદા અનુસાર તમામ એમ્પ્લોયર્સ દર અઠવાડિયે અથવા પંદર દિવસે કે પછી પે પિરિયડ પૂરો થયાના છ દિવસની અંદર સેલેરી આપવા માટે બંધાયેલા છે. પરંતુ આ પ્રકરણમાં ઓગસ્ટ ૨૦૨૩થી ઓગસ્ટ ૨૦૨૫ સુધીના ગાળામાં ઈન્ડિપેન્ડન્ટ કોન્ટ્રાક્ટર તરીકે ડંકીન ડોનટ્સમાં કામ કરનારા આ એમ્પ્લોઈઝને સમયસર પગાર આપવામાં નહોતો આવ્યો અને સાથે જ કામકાજના કલાકો દરમિયાન તેમને એક સ્ટોર પરથી બીજા સ્ટોર પર જવા માટે પણ પૈસા ચૂકવવામાં નહોતા આવ્યા.
પ્રાઈમ અને ઝ્રૂથ્ જેવી સ્ટાફિગ કંપની ટેમ્પરરી વર્કર્સને કામે લગાડતા પહેલા તેમને જોબ ઓર્ડર આપવા માટે બંધાયેલી હતી. એટર્ની જનરલ ઓફિસ દ્વારા આ બંને કંપનીઓ પાસેથી જોબ ઓર્ડર્સનો રેકોર્ડ માગવામાં આવ્યો હતો પરંતુ બંનેમાંથી એકેય સ્ટાફિગ એજન્સીએ તેની કોઈ વિગતો શેર નહોતી કરી કારણકે તેમની પાસે આવા કોઈ ડોક્યુમેન્ટ હતા જ નહીં. મેસાચ્યુસેટ્સ સહિત અમેરિકાના મોટાભાગના સ્ટેટ્સમાં અમલમાં રહેલા લેબર લોના કાયદા અનુસાર યુએસમાં કામ કરનારો વર્કર ગમે તે ઈમિગ્રેશન સ્ટેટસ ધરાવતો હોય તો પણ તેની સાથે કોઈ પ્રકારનો ભેદભાવ ના કરી શકાય અને જો કોઈનું શોષણ કરવામાં આવતું હોય કે પછી તેને સમયસર અને યોગ્ય પગાર ના મળતો હોય તો તે એટર્ની જનરલ ઓફિસને આ અંગે સંપર્ક કરી શકે છે.
અમેરિકામાં જેમની પાસે વર્ક પરમિટ ના હોય તેવા અનડોક્યુમેન્ટેડ ઈમિગ્રન્ટ્સને ઈન્ડિપેન્ડન્ટ કોન્ટ્રાક્ટર તરીકે કામ પર રાખવામાં આવતા હોય છે. જોકે, આવા લોકો પાસેથી રેગ્યુલર કર્મચારીઓની માફક કામ ના લઈ શકાય. ઈન્ડિપેન્ડન્ટ કોન્ટ્રાક્ટરને અપાયેલું કામ ફિક્સ અને શોર્ટ ટર્મનું હોય છે, જ્યારે રેગ્યુલર એમ્પ્લોઈને એક વીકમાં ૪૦ કલાકથી વધુ કામ કરાવવાનું હોય તો ઓવરટાઈમ ચૂકવવો પડે છે અને બીજા બેનિફિટ્સ પણ આપવા પડે છે. યુએસમાં કોઈ સ્ટેટસ વિના રહેતા જે લોકો ટેક્સ પે કરે છે તે પોતાને ઈન્ડિપેન્ડન્ટ કોન્ટ્રાક્ટર ગણાવતા હોય છે. એમ્પ્લોઈઝને મિનિમમ પેથી ઓછો પગાર આપવો ગુનો છે, જ્યારે ઈન્ડિપેન્ડન્ટ કોન્ટ્રાક્ટર્સ માટે આવા કોઈ નિયમો નથી હોતા અને તેમને જે-તે કામની ચોક્કસ રકમ ચૂકવવામાં આવતી હોય છે.
મેસાચ્યુસેટ્સના પ્રકરણમાં જે ૧૦૦ લોકોને તેમના એમ્પ્લોયર દ્વારા વળતર ચૂકવવાનો આદેશ કરવામાં આવ્યો છે તેઓ ઈન્ડિયન્સ હતા કે નહીં તેની કોઈ ચોક્કસ માહિતી એટર્ની ઓફિસે શેર નથી કરી. ડંકીન ડોનટ્સ જેવા ફ્રેન્ચાઈઝી બિઝનેસમાં કામ કરવા માટે વર્ક પરમિટ ફરજિયાત છે. ૨૦૨૫ પહેલા ડંકીનમાં કામ કરતા ઘણા દેસીઓ બીજા કોઈના સોશિયલ સિક્યોરિટી પર કામ કરતા હતા અને સ્ટૂડન્ટ્સ તેનો ખાસ ફાયદો ઉઠાવતા હતા
(9:53 AM IST)
છેલ્લા 8 દિવસમાં સૌથી લોકપ્રિય 
