ઉત્તર પ્રદેશના આગ્રા જિલ્લામાંથી કૌટુંબિક સંબંધોને કલંકિત કરતી એક અત્યંત ચોંકાવનારી આપરાધિક ઘટના સામે આવી છે. પ્રાપ્ત થયેલા તાજા  અહેવાલો અનુસાર, પિનાહટ પોલીસ સ્ટેશન વિસ્તારના બરપુરા ગામમાં એક કળિયુગી પુત્રએ પોતાની જ સગી માતાના ભોજનમાં ઝેર ભેળવીને તેમને જાનથી મારી નાખવાનો ભયાનક પ્રયાસ કર્યો છે.

સમાજમાં માતા અને પુત્રના સંબંધને સૌથી પવિત્ર અને નિઃસ્વાર્થ માનવામાં આવે છે પરંતુ આગ્રાના પિનાહટ વિસ્તારમાં બનેલી આ ઘટનાએ માનવતાની તમામ હદો વટાવી દીધી છે. જે માતાએ નવ મહિના સુધી ગર્ભમાં રાખી, આંગળી પકડીને ચાલતા શીખવ્યું, તે જ માતા સામે સગા દીકરાએ ઘાતકી ષડયંત્ર રચ્યું હોવાનો આરોપ છે .

પોલીસ કંટ્રોલ રૂમમાં નોંધાયેલી સત્તાવાર એફઆઈઆર મુજબ, આ કથિત ઘટના 9 જુલાઈ 2026ના રોજ બપોરે આશરે ત્રણ વાગ્યાની આસપાસ બરપુરા ગામમાં બની હતી. આરોપી પુત્ર રવીન્દ્રએ કોઈ પણ જાતના ડર વિના પોતાની માતા રામમૂર્તિને ભોજનમાં ઝેરી પદાર્થ ખવડાવી દીધો હતો, જે ઘરના સભ્યો માટે કલ્પના બહારની બાબત હતી.

આ અરેરાટીભરી ઘટનાની ફરિયાદ પીડિતાના પતિ અને અરજદાર રણવીર સિંહે પોલીસ મથકે નોંધાવી છે ફરિયાદ પત્રમાં કરાયેલા ગંભીર આક્ષેપો અનુસાર, પુત્ર રવીન્દ્રએ બપોરના ભોજનમાં બનાવેલા છોલેના શાકમાં ગુપ્ત રીતે કોઈ અજ્ઞાત અને અત્યંત ઝેરી કેમિકલ અથવા દવા ભેળવી દીધી હતી.

આ ઝેરી ખોરાક ખાધાના ગણતરીના મિનિટોમાં જ મહિલા રામમૂર્તિની તબિયત લથડવા લાગી હતી. તેમને સતત ઉલટીઓ થવા સાથે તેઓ બેભાન થઈ ગયા હતા. પરિવારોના અન્ય સભ્યોએ તાત્કાલિક એમ્બ્યુલન્સ બોલાવીને તેમને નજીકની હોસ્પિટલમાં આઈસીયુ (ICU) માં દાખલ કર્યા હતા, જ્યાં હાલમાં તેમની સ્થિતિ ગંભીર છે અને તબીબોની દેખરેખ હેઠળ સઘન સારવાર ચાલી રહી છે.

આ આપરાધિક મામલાનો સૌથી વધુ આંચકો આપનારો અને કંપારી છૂટી જાય તેવો વળાંક ત્યારે આવ્યો જ્યારે આરોપી પુત્રએ પોતાના પિતા સમક્ષ ગુનાની કબૂલાત કરી . એફઆઈઆરના લખાણ મુજબ, રવીન્દ્રએ જણાવ્યું કે આ ઝેરની પુડી તેને તેની સગી સાસુ ફૂલવતીએ આપી હતી, જે ગટપુરા ગામની રહેવાસી છે.

આરોપ છે કે સાસુ ફૂલવતીએ રવીન્દ્રની પત્નીને ઘણા સમયથી પિયરમાં રોકી રાખી હતી. તેણે જમાઈ સામે ક્રૂર શરત મૂકી હતી કે, "જો તું તારી માતાને હંમેશ માટે રસ્તામાંથી હટાવી દઈશ, તો જ હું મારી દીકરીને તારી સાથે સાસરીયે મોકલીશ." પત્નીના મોહમાં આંધળો બનેલો રવીન્દ્ર સાસુના આ ભયાનક ષડયંત્રની જાળમાં ફસાઈ ગયો હતો.

આરોપી રવીન્દ્રના સગા ભાઈ મુકેશે આ ઘટના પાછળના મુખ્ય આર્થિક કારણનો ખુલાસો કર્યો છે મુકેશના જણાવ્યા અનુસાર, પરિવારમાં છેલ્લા કેટલાક સમયથી તાજેતરમાં ખરીદવામાં આવેલી એક કિંમતી જમીનની માલિકી અને હિસ્સાને લઈને આંતરિક વિવાદ ચાલી રહ્યો હતો. સાસુ ફૂલવતી આ પારિવારિક ઝઘડાનો ફાયદો ઉઠાવી રવીન્દ્રને પોતાની માતાની વિરુદ્ધ ઉશ્કેરી રહી હતી 

આગ્રાની પિનાહટ પોલીસે આ ચકચારી મામલામાં ત્વરિત એક્શન લેતા ભારતીય ન્યાય સંહિતા (BNS) ની કલમ 61, 109 અને 123 હેઠળ ગુનો નોંધી મુખ્ય આરોપી રવીન્દ્રની ધરપકડ કરી જેલના સળિયા પાછળ ધકેલી દીધો છે. જ્યારે કાવતરાખોર સાસુ ફૂલવતીને પકડવા માટે ચક્રો ગતિમાન કર્યા છે. પોલીસ મેડિકલ રિપોર્ટ અને ફોરેન્સિક લેબોરેટરી (FSL) ના સાક્ષ્યોના આધારે કોર્ટમાં મજબૂત ચાર્જશીટ રજૂ કરવા તયારી કરી રહી છે.