શ્રીનગર : પાકિસ્તાનથી જમ્મુ-કાશ્મીરમાં આતંકવાદનો પાયો મજબૂત કરવા અને લોહિયાળ ખેલ ખેલવાના ઈરાદાથી મોકલવામાં આવેલો લશ્કર-એ-તૈયબા (LeT) નો એક તાલીમબદ્ધ આતંકી હાલમાં સુરક્ષા એજન્સીઓ અને સોશિયલ મીડિયા પર ભારે હાસ્ય અને ચર્ચાનું કેન્દ્ર બન્યો છે. સામાન્ય રીતે આતંકીઓ હથિયારો અને વિસ્ફોટકો સાથે પકડાતા હોય છે, પરંતુ આ મહાશય પોતાના આતંકી મિશન દરમિયાન શ્રીનગરમાં છૂપાઈને ‘હેર ટ્રાન્સપ્લાન્ટ’ કરાવતા પકડાયા છે. તપાસ એજન્સીઓના જણાવ્યા અનુસાર, લાહોરનો રહેવાસી મોહમ્મદ ઉસ્માન જત્ત ઉર્ફે ‘ચીની’ અથવા ‘ચાઇનીઝ’ લશ્કરનો એક ખતરનાક ઓપરેટિવ હતો, જેને કાશ્મીર ઘાટીમાં સ્લીપર સેલ તૈયાર કરવાની જવાબદારી સોંપાઈ હતી. પરંતુ અહીં આવ્યા બાદ તેના મગજ પર આતંકવાદ કરતા પોતાના માથાની ટાલ અને ખરતા વાળની ચિંતા વધુ સવાર થઈ ગઈ હતી.

પૂછતાછ દરમિયાન ઉસ્માન જત્તે જે ખુલાસા કર્યા છે તેણે કડક સુરક્ષા અધિકારીઓને પણ માથું ખંજવાળવા અને હસવા પર મજબૂર કરી દીધા છે. આતંકીએ જણાવ્યું કે પાકિસ્તાનના ટ્રેનિંગ કેમ્પોમાં કાશ્મીરને લઈને જે નકારાત્મક ચિત્ર બતાવવામાં આવે છે, વાસ્તવિકતા તેનાથી તદ્દન અલગ હતી. ઘાટીમાં સ્થાનિક લોકોની સામાન્ય અને શાંતિપૂર્ણ જિંદગી જોઈને તેનો ઈરાદો બદલાવા લાગ્યો હતો. આ દરમિયાન તે ઘણા વર્ષોથી ગંભીર હેર લોસ (વાળ ખરવાની સમસ્યા) થી પીડાતો હોવાથી તેનો આત્મવિશ્વાસ સાવ તળિયે બેસી ગયો હતો. પાકિસ્તાનમાં તેને એવું ભણાવવામાં આવતું કે હેર ટ્રાન્સપ્લાન્ટ જેવી મોંઘી સુવિધાઓ માત્ર પશ્ચિમી દેશોના અમીર લોકો માટે જ હોય છે, પણ કાશ્મીર આવીને તેના ભ્રમ ભાંગી ગયા હતા.

આ અનોખા આતંકીની ટાલની સમસ્યાનો ઉકેલ એક ઓવર ગ્રાઉન્ડ વર્કર (OGW) નેટવર્કના દુકાનદારે કર્યો હતો. પાકિસ્તાની આતંકી ઝરગામ દ્વારા ઉસ્માનની મુલાકાત શ્રીનગરના એક દુકાનદાર સાથે કરાવાઈ હતી, જે પોતે પણ હેર ટ્રાન્સપ્લાન્ટ કરાવી ચૂક્યો હતો. ઉસ્માન તેને જોઈને એટલો પ્રભાવિત થયો કે લાંબી વિનંતીઓ બાદ દુકાનદારે તેને શ્રીનગરના એક અદ્યતન ક્લિનિક સુધી પહોંચાડી દીધો. હેર ટ્રાન્સપ્લાન્ટની લાંબી પ્રક્રિયા માટે ઉસ્માનને વારંવાર ક્લિનિકના ધક્કા ખાવા પડ્યા અને કેટલીક રાતો શ્રીનગરમાં જ રોકાવું પડ્યું હતું. આ વાળ ઉગાડવાના ચક્કરમાં તેની શંકાસ્પદ અવરજવર સ્થાનિક પોલીસની નજરે ચડી ગઈ અને શ્રીનગર પોલીસે તેને લશ્કરના સૌથી લાંબા સમયથી સક્રિય આતંકી અબ્દુલ્લા ઉર્ફે અબુ હુરૈરા સાથે એપ્રિલની શરૂઆતમાં જ દબોચી લીધો. પોલીસે આ આખી લિંકના આધારે ઉત્તર કાશ્મીરના આખા ઓજીડબલ્યુ નેટવર્કનો પર્દાફાશ કરી નાખ્યો છે.

હેર ટ્રાન્સપ્લાન્ટની સર્જરી સફળ થયા બાદ નવી હેરસ્ટાઈલ સાથે પોતાની ઓળખ છુપાવીને ઉસ્માન પેસેન્જર ગાડી દ્વારા જમ્મુ પહોંચ્યો અને ત્યાંથી સ્લીપર બસ પકડીને પંજાબના મલેરકોટલામાં જઈને આશરો લીધો હતો. આશ્ચર્યની વાત એ છે કે ત્યાં તે કોઈ આતંકી પ્લાનિંગ કરવાના બદલે આખો દિવસ ટીવી પર તુર્કી સીરિયલો જોવામાં અને અંગ્રેજી ભાષા શીખવામાં વિતાવતો હતો. તેણે કબૂલાત કરી છે કે તેનો હવે પછીનો ટાર્ગેટ ભારતમાં રહીને બોગસ ઓળખ પત્રો જેવા કે પાન કાર્ડ અને સિક્રેટ દસ્તાવેજો [સરકારી આઈડી Redacted] વગેરે બનાવવાનો હતો. તે ફેક પાસપોર્ટ મેળવીને કોઈ ખાડી દેશમાં ભાગી જવાની ફિરાકમાં હતો, જેમ ભૂતકાળમાં અન્ય એક ઘૂસણખોર ભાગી ગયો હતો. હાલમાં આ મામલાની વધુ તપાસ રાષ્ટ્રીય તપાસ એજન્સી (NIA) ને સોંપવામાં આવી છે, જે તેના બાકીના સાથીદારોને શોધી રહી છે.