કન્નૌજ : ઉત્તર પ્રદેશના કન્નૌજ જિલ્લાના છિબરામઉમાં દિવાળીની રાત્રે એક વકીલની ગોળી મારી હત્યા થતાં ભારે ચકચાર મચી છે. છિબરામઉ પોલીસ સ્ટેશનથી આશરે ૧૫૦ મીટર દૂર બનેલી આ ઘટનામાં કોંગ્રેસના જિલ્લા મહામંત્રી અમોલ દીક્ષિત ઉપર હત્યાનો આરોપ મૂકવામાં આવ્યો છે.

મૃતકની ઓળખ અનુજ ચતુર્વેદી તરીકે થઈ છે. તેઓ વ્યવસાયે વકીલ હતા અને તેમના પિતા ગણેશશંકર ચતુર્વેદી પોલીસ વિભાગમાંથી સબઇન્સ્પેક્ટર તરીકે નિવૃત્ત થયા છે.

પ્રાપ્ત વિગતો મુજબ, રવિવારે સાંજે આશરે સાત વાગ્યે અનુજ ચતુર્વેદી અને અમોલ દીક્ષિત વચ્ચે થયેલી બોલાચાલી ઉગ્ર બની હતી. આ દરમિયાન અનુજ ઉપર પિસ્તોલમાંથી ચાર ગોળી ચલાવવામાં આવી હોવાનો આરોપ છે.

હુમલામાં ગંભીર રીતે ઘવાયેલા અનુજને તાત્કાલિક હોસ્પિટલ પહોંચાડવામાં આવ્યા હતા, જ્યાં તબીબોએ તેમને મૃત જાહેર કર્યા હતા.

પ્રાથમિક અહેવાલો પ્રમાણે, અનુજના પિતરાઈ ભાઈ બસંત સાથે આરોપીનો વિવાદ થયો હતો. બસંતને થપ્પડ મારવામાં આવી હોવાની બાબતે અનુજ સ્પષ્ટતા માગવા ગયા હતા અને ત્યાં ઝઘડો વધ્યો હતો.

બીજી તરફ, આ બનાવ પાછળ જૂની રાજકીય અદાવત હોવાની શક્યતા પણ તપાસવામાં આવી રહી છે. વર્ષ ૨૦૨૨ની વિધાનસભા ચૂંટણીના સમયથી બંને પક્ષો વચ્ચે તણાવ હોવાની વિગતો કેટલાક અહેવાલોમાં સામે આવી છે. 

ઘટનાની જાણ થતાં ભાજપનાં ધારાસભ્ય અર્ચના પાંડે હોસ્પિટલ પહોંચ્યાં હતાં. અનુજનો મૃતદેહ જોઈ તેઓ ભાવુક બની રડી પડ્યાં હતાં. મૃતકના પરિવાર સાથે તેમના લાંબા સમયથી નજીકના સંબંધો હોવાનું જણાવાય છે.

આ બનાવને પગલે સ્થાનિક વકીલોમાં પણ રોષ ફેલાયો છે. પોલીસે આરોપીની શોધખોળ અને હથિયાર સહિતના પુરાવા અંગે તપાસ હાથ ધરી છે. આરોપીએ આત્મસમર્પણ કર્યું હોવાની ચર્ચા પણ સામે આવી છે.