નાંદેડ, તા.૨૩: મહારાષ્ટ્રના નાંદેડ જિલ્લામાં ખેડૂતો માટે અતિ ગંભીર ગણાતી દુષ્કાળ અને પાકના નુકસાનની સમીક્ષા બેઠક દરમિયાન એક શરમનાક દ્રશ્ય સામે આવ્યું છે. બેઠકમાં હાજર કેટલાક સાંસદો, ધારાસભ્યો અને ઉચ્ચ અધિકારીઓ ગંભીર ચર્ચા કરવાને બદલે કાજુ-બદામ અને ડ્રાયફ્રૂટ્સ ખાતા કેમેરામાં કેદ થતાં સમગ્ર રાજ્યમાં ભારે હોબાળો મચી ગયો છે. સોશિયલ મીડિયા પર વાયરલ થયેલા આ વીડિયોને લઈને લોકો અને ખેડૂત સંગઠનો નેતાઓની આવી સંવેદનહીનતા પર આકરા પ્રહારો કરી રહ્યા છે.

ખેડૂતનો આક્રોશ: સરકારને આપ્યો ખુલ્લો પડકાર

આ ઘટના બાદ નાંદેડના દાભડ ગામના ખેડૂત આત્મારામ ટેકાળેનો એક વીડિયો વાયરલ થયો છે, જેમાં તેઓ પોતાના ખેતરમાં સુકાઈ ગયેલા સોયાબીનના છોડ બતાવીને પોતાની વેદના ઠાલવી રહ્યા છે. નેતાઓની સંવેદનહીનતાથી નારાજ ખેડૂતે સરકાર અને અધિકારીઓને સણસણતો પડકાર આપતા કહ્યું:

"જો સરકાર કે અધિકારીઓ મારી દોઢ એકર જમીનમાંથી ૧ કિલો સોયાબીન પણ ઉગાડીને બતાવી દે, તો હું આખા ગામમાંથી ફાળો ઉઘરાવીને તેમને ૧ ક્વિન્ટલ કાજુ-બદામ ખવડાવીશ!"

ખેડૂતે અધિકારીઓની આવી વારંવારની ‘સમીક્ષા બેઠકો’ અને ‘સરકારી પ્રવાસો’ની અસરકારકતા પર સવાલો ઉઠાવતા કહ્યું કે, મહિનાઓની મહેનત બાદ વરસાદ ન પડવાને કારણે પાક નિષ્ફળ ગયો છે અને ખેડૂતો પાયમાલ થઈ રહ્યા છે, ત્યારે નેતાઓ બેઠકમાં મોંઘા ડ્રાયફ્રૂટ્સનો આનંદ માણી રહ્યા છે.

ભાજપ નેતા રાવસાહેબ દાનવેએ કર્યો બચાવ

બીજી તરફ આ મુદ્દે રાજકીય ગરમાવો વધતાં ભાજપના નેતા રાવસાહેબ દાનવેએ નેતાઓ અને અધિકારીઓનો બચાવ કર્યો હતો. તેમણે જણાવ્યું કે, કોઈ બેઠક કે પ્રવાસ દરમિયાન આયોજકો દ્વારા નાસ્તો કે ચા આપવામાં આવે તો તેના આધારે માત્ર નેતાઓને દોષિત ઠેરવી શકાય નહીં. કોઈના ઘરે કે કાર્યક્રમમાં જઈએ ત્યારે લોકો ચા-નાસ્તો આપે જ છે, પરંતુ તેનો ફોટો કે વીડિયો બનાવીને વાયરલ કરવો યોગ્ય નથી.

એક તરફ કુદરતનો મારો સહન કરી રહેલા ખેડૂતો આર્થિક તંગી અને આત્મહત્યાના આરે પહોંચ્યા છે, ત્યારે બીજી તરફ સંવેદનહીન નેતાઓના આવા વર્તનને કારણે મહારાષ્ટ્રના રાજકારણમાં ભારે ચર્ચા જાગી છે.