મશઘરા : ઈઝરાયલ અને લેબનોન વચ્ચે ચાલી રહેલા લાંબા ગાળાના સંઘર્ષે ફરી એકવાર ભયાનક સ્વરૂપ ધારણ કર્યું છે. પૂર્વી લેબનોનની બેકા ખીણમાં આવેલા 'મશઘરા' ગામમાં ગઈકાલે રાત્રે ઈઝરાયલ દ્વારા કરવામાં આવેલા ભીષણ હવાઈ હુમલામાં 12 લોકોએ જીવ ગુમાવ્યા છે. બચાવકર્મીઓએ કાટમાળમાંથી મૃતદેહો બહાર કાઢ્યા છે, જે આ હુમલાની તીવ્રતાને દર્શાવે છે. આ ઘટનાએ બંને દેશો વચ્ચેના તણાવને ચરમસીમાએ પહોંચાડી દીધો છે.
શાંતિના પ્રયાસો વચ્ચે હુમલાની વણઝાર
સૌથી ચોંકાવનારી વાત એ છે કે, લેબનોન અને ઈઝરાયલી સૈન્ય પ્રતિનિધિમંડળો આગામી ત્રણ દિવસમાં વોશિંગ્ટનમાં સીધી વાટાઘાટો કરવા માટે મળવાના છે, તેવા સમયે જ આ હુમલાઓ થયા છે. એક તરફ શાંતિની આશા દેખાઈ રહી છે, તો બીજી તરફ વડાપ્રધાન બેન્જામિન નેતન્યાહૂએ હિઝબુલ્લાહ આતંકવાદી જૂથને સંપૂર્ણપણે ખતમ કરવા માટે હુમલાઓ વધુ તીવ્ર બનાવવાની જાહેરાત કરી દીધી છે. ઈઝરાયલી સેનાએ લેબનોનમાં વધારાની સૈન્ય બટાલિયન તૈનાત કરી છે, જે મોટા યુદ્ધના એંધાણ આપી રહી છે.
હિઝબુલ્લાહ અને ઇઝરાયલનો વળતો જંગ
હિઝબુલ્લાહ પણ હવે નવા ટેકનોલોજીકલ હથિયારો સાથે મેદાનમાં ઉતરી ગયું છે. તેઓ દાવો કરી રહ્યા છે કે તેમણે અત્યાધુનિક ફાઈબર-ઓપ્ટિક ડ્રોનનો ઉપયોગ શરૂ કર્યો છે, જેને અટકાવવા ઈઝરાયલી સૈન્યને મોટી મુશ્કેલી પડી રહી છે. હિઝબુલ્લાહે સ્પષ્ટ કર્યું છે કે જ્યાં સુધી ઈઝરાયલ તેના દૈનિક હવાઈ હુમલા બંધ નહીં કરે અને દેશમાંથી સૈનિકો પાછા નહીં ખેંચે, ત્યાં સુધી લડાઈ ચાલુ રહેશે.
યુદ્ધનો ભય અને લેબનોનની આશા
આ પરિસ્થિતિએ લેબનોનમાં પૂર્ણ-સ્તરના યુદ્ધનો ડર ફેલાવી દીધો છે. રાજધાની બેરૂત સહિતના વિસ્તારોમાં લોકો ફરીથી સંભવિત હુમલાઓને લઈને આશંકિત છે. લેબનોનની સરકાર હજુ પણ એવી આશા સેવી રહી છે કે વોશિંગ્ટનમાં થનારી સીધી વાટાઘાટો યુદ્ધવિરામ (Ceasefire) તરફ દોરી જશે. જોકે, જમીની સ્તરે વધતા હુમલાઓ આ આશાને સતત ઝાંખી પાડી રહ્યા છે. હાલમાં મધ્ય-પૂર્વનો આ વિસ્તાર ફરી એકવાર ધૂણી રહ્યો છે અને વિશ્વ સમુદાયની નજર આ યુદ્ધની ગતિવિધિઓ પર ટકેલી છે.