નાગૌર : રાજસ્થાનના નાગૌર જિલ્લામાંથી દિવાળીના પાવન અવસરે લક્ષ્મી પૂજાનો એક અત્યંત ચોંકાવનારો અને ચર્ચાસ્પદ કિસ્સો પ્રકાશમાં આવ્યો છે, જ્યાં એક સ્થાનિક દારૂના કોન્ટ્રાક્ટરે ચલણી નોટોની મોટી દીવાલ અને ઢગલા વચ્ચે બેસીને લક્ષ્મી પૂજા કરી હોવાની તસવીરો સોશિયલ મીડિયા પર વાયરલ થતાં સમગ્ર દેશમાં હલચલ મચી ગઈ છે. આ અનોખી પૂજાના ફોટોએ રાતોરાત સોશિયલ મીડિયા પર ભારે ધમાલ મચાવી દીધી છે અને દરેક જગ્યાએ આ જ ચર્ચા ચાલી રહી છે.

પ્રાપ્ત વિગતો અનુસાર, રાજસ્થાનના નાગૌરના દારૂના કોન્ટ્રાક્ટર સુભાષે પોતે જ આ ફોટો પોતાના સોશિયલ મીડિયા હેન્ડલ પર શેર કર્યો હતો, જેમાં તે પોતાના ઘરમાં ટેબલ પર ફૂલોથી સજાવેલી રોકડના મોટા ઢગલા અને ચલણી નોટોની દીવાલ ઊભી કરીને હાથ જોડીને પૂજા કરતોજ નજરે પડે છે અને તેની પાસે બે નાના બાળકો પણ બેઠા છે. અગાઉ મધ્યપ્રદેશના દેવાસમાં પાંચ કરોડ રૂપિયાની ચલણી નોટોથી લક્ષ્મી મંદિર શણગારવાનો વીડિયો વાયરલ થયો હતો, ત્યારે હવે આ વ્યક્તિગત પૂજાના ફોટાએ પણ ભારે આશ્ચર્ય સર્જ્યું છે.

આ મામલો ભારે વિવાદ અને ચર્ચામાં આવતા ખુદ કોન્ટ્રાક્ટર સુભાષે આગળ આવીને સમગ્ર ઘટના અંગે સ્પષ્ટતા કરી હતી અને વાર્તાનો પોતાનો પક્ષ રજૂ કર્યો હતો. નાગૌરના આ કોન્ટ્રાક્ટરે જણાવ્યું હતું કે તેઓ દારૂની દુકાનો તેમજ પેટ્રોલ પંપ પણ ધરાવે છે, અને તહેવારો દરમિયાન સતત બે દિવસ બેંકો બંધ રહેવાના કારણે તેમના વેપારમાંથી મોટી માત્રામાં રોકડ રકમ એકઠી થઈ ગઈ હતી.

સુભાષે વધુમાં સમજાવ્યું કે તેમના ઘરમાં પરંપરાગત રીતે ઘરમાં સંગ્રહિત થયેલી રોકડની પૂજા કરવાની વિધિ કરવામાં આવે છે, જેના ભાગરૂપે જ તેમણે આ ફોટો સોશિયલ મીડિયા પર પોસ્ટ કર્યો હતો. જોકે, આ વાયરલ તસવીરોએ વ્યાપક ધ્યાન ખેંચ્યું છે અને આગામી દિવસોમાં આટલી મોટી રોકડના સંગ્રહ તથા ટેક્સ બાબતે તંત્ર દ્વારા કોઈ તપાસ હાથ ધરવામાં આવે છે કે કેમ તેના પર સૌની નજર ટકેલી છે