નવી દિલ્હી, તા.૨૯: મધ્ય પૂર્વમાં મહિનાઓ સુધી ચાલેલા ભયાનક લશ્કરી સંઘર્ષ અને યુએસ-ઇઝરાયેલના હુમલાઓ બાદ ઈરાને પોતાનું સૈન્ય બળ ફરી એકવાર સજ્જ કરવા માટે મોટા પાયે કાર્યવાહી શરૂ કરી દીધી છે. રોઈટર્સના અહેવાલ મુજબ, તેહરાને પોતાના ટૂંકા અંતરના હવાઈ સંરક્ષણ (Air Defense System) ને અત્યંત મજબૂત બનાવવા માટે ચીન સાથે એક અત્યંત ગુપ્ત અને મોટો લશ્કરી કરાર કર્યો છે. આ આશરે $૬૦ થી $૭૦ મિલિયન (લગભગ ₹૫૦૦ થી ₹૫૮૦ કરોડ) ના સોદા હેઠળ ઈરાનને ચીની બનાવટની ઔપચારિક રીતે શૂલ્ડર-ફાયર (ખભા પરથી છોડી શકાતી) ૩૦૦ થી ૪૦૦ જેટલી 'મેન-પોર્ટેબલ એર ડિફેન્સ સિસ્ટમ્સ' (MANPADS) નો પ્રથમ જથ્થો આગામી થોડાક જ અઠવાડિયામાં મળી જવાની શક્યતા છે.

હોંગકોંગની કંપની મધ્યસ્થી અને ગુપ્ત રૂટની યોજના:

આ કરાર ઈરાન અને ચીની સપ્લાયર વચ્ચે સીધો થવાને બદલે હોંગકોંગ સ્થિત 'ઝોંગકિંગ બાઓશાંગ ઈન્ટરનેશનલ ઈન્વેસ્ટમેન્ટ' કંપની દ્વારા મધ્યસ્થી તરીકે હસ્તાક્ષર કરવામાં આવ્યો છે. ગુપ્તચર સૂત્રોના જણાવ્યા અનુસાર, આ શસ્ત્રોનો પ્રથમ જથ્થો પશ્ચિમ ચીનના ઉરુમકીથી પાકિસ્તાન થઈને ઈરાન મોકલવાની યોજના બનાવવામાં આવી રહી છે. જોકે, પાકિસ્તાનની લશ્કરી મીડિયા શાખા (ISPR) એ આ અહેવાલોને અફવા ગણાવીને પોતાની સંડોવણીનો સખત ઈનકાર કર્યો છે. ઈરાને પ્રતિબંધો અને આંતરરાષ્ટ્રીય વિક્ષેપથી બચવા માટે જમીન માર્ગોનો ઉપયોગ કરવા માટેની શક્યતાઓ પણ ચકાસી છે.

QW-12 અને FN-16: ડ્રોન તથા હેલિકોપ્ટર માટે કાળ:

ઈરાન દ્વારા ખરીદવામાં આવી રહેલી QW-12 અને FN-16 મિસાઈલો ઈન્ફ્રારેડ-ગાઈડેડ (Infrared-guided) સપાટીથી હવામાં પ્રહાર કરતી સિસ્ટમ છે. લશ્કરી વિશ્લેષકોના મતે, આ પોર્ટેબલ મિસાઈલ સિસ્ટમ્સ ખૂબ જ હળવી હોવાથી નાની ટુકડીઓ દ્વારા સરળતાથી ઓપરેટ કરી શકાય છે અને ઝડપથી એક જગ્યાએથી બીજી જગ્યાએ ખસેડી શકાય છે. પરિણામે, દુશ્મનના ફાઈટર જેટ, હેલિકોપ્ટર અને લો-ફ્લાઈંગ ડ્રોન માટે તેને ટાર્ગેટ કરવી અત્યંત મુશ્કેલ બને છે. ઈરાન તેના મહત્વના સૈન્ય મથકોને હવાઈ હુમલાથી બચાવવા માટે આ કવચ તૈયાર કરી રહ્યું છે.

ચીનનો ઈનકાર પણ આંતરરાષ્ટ્રીય સુરક્ષા એજન્સીઓ એલર્ટ:

ઈરાન અને ચીન વચ્ચેના આ કરાર અંગે આંતરરાષ્ટ્રીય સ્તરે ચર્ચા જાગતા જ ચીનના વિદેશ મંત્રાલયે આ અહેવાલને સંપૂર્ણપણે પાયાવિહોણો ગણાવી ફગાવી દીધો છે. ચીને દાવો કર્યો છે કે તે શાંતિનો પક્ષધર છે. બીજી તરફ, અમેરિકાના પ્રમુખ ડોનાલ્ડ ટ્રમ્પે પણ એપ્રિલથી ચાલી રહેલા વિરામ વચ્ચે તાજેતરમાં ચેતવણી આપી હતી કે જો વાટાઘાટો નિષ્ફળ જશે તો હુમલા ફરી શરૂ થઈ શકે છે. આ પરિસ્થિતિમાં ઈરાનની ચીન પાસેથી એન્ટી-શિપ ક્રૂઝ મિસાઈલ અને એર-ડિફેન્સ ખરીદવાની આક્રમક તૈયારીઓ મધ્ય પૂર્વના રાજકારણમાં નવો વળાંક લાવી શકે છે.