ન્યૂ યોર્ક : અમેરિકાના ન્યૂ યોર્ક સ્થિત મેનહટન સબવે સ્ટેશનના રેલવે ટ્રેક પર સર્જાયેલી ભયાનક દુર્ઘટનામાં ન્યુ જર્સીની ૨૪ વર્ષીય ભારતીય મૂળની યુવતી મલાઈકા ચિત્રે અને તેના નેપાળી મૂળના મિત્ર નવમ કૌલના ટ્રેનની ટક્કરથી થયેલા મૃત્યુ મામલે અત્યંત ચોંકાવનારી નવી વિગતો બહાર આવી છે.

ન્યૂ યોર્ક પોસ્ટના અહેવાલ મુજબ, અકસ્માતના થોડા સમય પહેલા આ બંને જણા સબવે પ્લેટફોર્મ પર એકબીજાને ગળે લગાવતા અને ચુંબન કરતા જોવા મળ્યા હતા, અને ટ્રેન આવે તે પહેલાં તેઓ પ્લેટફોર્મ પરથી પાટા પર પહોંચી ગયા હતા જ્યાં સીસીટીવી ફૂટેજમાં તેઓ ટ્રેક પર બેઠેલા પણ નજરે ચડ્યા હતા.

પ્રાપ્ત વિગતો અનુસાર, નવમ કૌલ અચાનક જ પોતાનું સંતુલન ગુમાવી બેસવાથી રેલવે ટ્રેક પર નીચે પડી ગયો હતો અને તેના માથામાં ગંભીર ઈજા થઈ હતી, જેને મુશ્કેલીમાં મુકાયેલો જોઈને મલાઈકા ચિત્રે તેને બચાવવા તથા મદદ કરવા માટે તુરંત જ ટ્રેક પર કૂદી પડી હતી, જ્યારે ડ્રાઈવર પાસે બ્રેક લગાવવાનો પૂરતો સમય ન હતો.

આ મામલે પોલીસ સીસીટીવી ફૂટેજ અને પ્રત્યક્ષદર્શીઓના નિવેદનોના આધારે ઊંડાણપૂર્વક તપાસ કરી રહી છે અને હાલ તપાસકર્તાઓ આ ઘટનાને આત્મહત્યાનો કેસ માનતા નથી, જ્યારે બંને રટગર્સ યુનિવર્સિટીના સ્નાતક હોઈ લાંબા સમયથી મિત્ર હતા અને આ કરૂણ ઘટનાથી બંનેના પરિવારમાં ભારે શોક છવાઈ ગયો છે.