ઓટાવા :  કેનેડાના જંગલોમાં લાગેલી ભીષણ આગના કારણે સ્થિતિ અત્યંત ગંભીર બની છે. આશરે 1.1 મિલિયન એકરમાં ફેલાયેલા મિનેસોટાના પ્રસિદ્ધ 'બોર્ડર વોટર્સ કેનો વાઇલ્ડરનેસ' વિસ્તારમાં હાજર 6,000થી 10,000 કેમ્પર્સ અને પ્રવાસીઓને બહાર કાઢવા માટે તાત્કાલિક આદેશો જારી કરાયા છે. માર્ગો બંધ હોવાને કારણે લોકો તળાવો પાર કરીને અને ખભા પર હોડીઓ ઊંચકીને જીવ બચાવી ભાગી રહ્યા છે, જેમાં અત્યાર સુધીમાં 90% લોકોને સુરક્ષિત સ્થળે ખસેડાયા છે.

પવનોના કારણે આ આગનો ઝેરી અને કાળો ધુમાડો સરહદ ઓળંગીને અમેરિકાના મિનેસોટા, ન્યુ યોર્ક અને મિશિગન જેવા અનેક રાજ્યોમાં ફેલાઈ ગયો છે, જેનાથી આકાશ નારંગી રંગનું બની ગયું છે. હવામાં અતિ સૂક્ષ્મ કણોનું પ્રમાણ ભયજનક રીતે વધતાં અસ્થમાના દર્દીઓ અને બાળકો માટે ગંભીર સ્વાસ્થ્ય કટોકટી ઊભી થઈ છે. અધિકારીઓએ સ્થાનિક લોકોને બારીઓ બંધ રાખવા અને બહાર નીકળતી વખતે ફરજિયાત N95 માસ્ક પહેરવાની કડક સલાહ આપી છે.

ક્લાઈમેટ ચેન્જના પરિણામે રેકોર્ડબ્રેક ગરમી અને લાંબા ગાળાના તીવ્ર દુષ્કાળે જંગલોને સૂકા લાકડા જેવા બનાવી દીધા છે, જેના કારણે વીજળી પડતાં લાગેલી આ આગ ઝડપથી ફેલાઈ રહી છે. આ આગ આગામી મહિનાઓ સુધી સક્રિય રહેવાની આશંકા છે. આ આંતરરાષ્ટ્રીય આપત્તિ સ્પષ્ટ કરે છે કે જંગલની આગ હવે માત્ર સ્થાનિક સમસ્યા નથી રહી, પરંતુ સેંકડો માઈલ દૂર વસતા કરોડો લોકોના અસ્તિત્વ અને સ્વાસ્થ્ય માટે મોટો ખતરો બની ગઈ છે.