વોશિંગ્ટન:અમેરિકાના પ્રમુખ ડોનાલ્ડ ટ્રમ્પે વાર્ષિક 'વ્હાઇટ હાઉસ કરસ્પોન્ડન્ટ્સ એસોસિએશન' (WHCA) ના ડિનર કાર્યક્રમમાં હાજરી આપીને મીડિયા પર તીખા કટાક્ષો કર્યા હતા. તેમણે રમૂજી અંદાજમાં જણાવ્યું હતું કે જ્યારે તેઓ વાઇટ હાઉસ છોડીને જશે ત્યારે તમામ મીડિયા હાઉસ કંગાળ થઈ જશે અને તેમનું બિઝનેસ મોડેલ સંપૂર્ણપણે નાશ પામશે, કારણ કે રિપોર્ટિંગ કરવા માટે અન્ય કોઈ રસપ્રદ વ્યક્તિ જ નહીં હોય. એપ્રિલ મહિનામાં એક બંદૂકધારી દ્વારા કરવામાં આવેલા ગોળીબારના કારણે મુલતવી રાખવામાં આવેલા આ વાર્ષિક ડિનરમાં ટ્રમ્પે કટાક્ષ, મજાક અને રાજકીય નિશાનાઓ સાધીને વાતાવરણને હળવું બનાવવાનો પ્રયાસ કર્યો હતો.

 "બીજી ટર્મ શ્રેષ્ઠ છે, અને ત્રીજી ટર્મ તો એનાથી પણ વધુ શ્રેષ્ઠ હશે" - 'ટ્રમ્પ 2028' કેપ ફેંકીને રમૂજ કરી:

પોતાના સંબોધન દરમિયાન ડોનાલ્ડ ટ્રમ્પે રમૂજી શૈલીમાં ત્રીજી મુદત માટે રાષ્ટ્રપતિની ચૂંટણી લડવાનો સંકેત આપતા "ટ્રમ્પ 2028" લખેલી લાલ રંગની કેપ પહેરી હતી અને બાદમાં તેને શ્રોતાઓ તરફ ફેંકી હતી. તેમણે જણાવ્યું હતું કે મારી પ્રથમ મુદત કરતાં આ બીજી મુદત વધુ સફળ છે અને ત્રીજી મુદત તો તેનાથી પણ બહેતર રહેશે, જોકે બાદમાં તેમણે ઉમેર્યું હતું કે તેઓ માત્ર મજાક કરી રહ્યા હતા. આ ઉપરાંત તેમણે એપ્રિલની ઇવેન્ટમાં હાજર ગાયિકા નિક્કી મિનાજ અને પોતાના સાથીદાર રોબર્ટ એફ. કેનેડી જુનિયર પર પણ રમૂજી કટાક્ષ કર્યા હતા. ડિનરમાં પીરસાયેલા માસ અંગે મજાક કરતા તેમણે કહ્યું હતું કે બોબી કેનેડી પોતે પોતાની કાર નીચે ગાયને કચડીને ફ્રેશ માસ લાવ્યા છે.

 "અમેરિકા રાજકીય હિંસા સામે ક્યારેય ઝૂકશે નહીં" - ગોળીબારની ઘટનાનો ઉલ્લેખ અને સુરક્ષા દળોની પ્રશંસા:

ગત એપ્રિલ મહિનામાં યોજાયેલી ઇવેન્ટ દરમિયાન કેલિફોર્નિયાના કોલ તોમાસ અલેન નામના શૂટરે કરેલા ગોળીબારનો ઉલ્લેખ કરતા ટ્રમ્પે સિક્રેટ સર્વિસ અને કાયદા અમલીકરણ એજન્સીઓની ઝડપી કામગીરીને બિરદાવી હતી. ગોળીબારમાં બુલેટપ્રૂફ જેકેટના કારણે બચી ગયેલા સિક્રેટ સર્વિસના અધિકારી વિક્ટર ગોન્ઝાલેસનું સન્માન કરવામાં આવ્યું હતું. ટ્રમ્પે જણાવ્યું હતું કે "આપણે આ ઘાતકી હુમલાનો જવાબ અડીખમ સંકલ્પ સાથે આપવા ભેગા થયા છીએ. અમેરિકામાં આપણે બંદૂકની ગોળીઓથી નહીં પરંતુ ખુલ્લા અને સખત વિચારોના આદાનપ્રદાનથી મતભેદો ઉકેલીએ છીએ. કોઈ પણ માથાફરેલ બંદૂકધારી આ પરંપરા બદલી શકશે નહીં."

 ક્રોધ, ટીકા અને મુક્ત પ્રેસ પ્રત્યે આદરનો મિશ્ર સૂર:

પોતાના ભાષણમાં ટ્રમ્પે પત્રકારો પર તીખા પ્રહારો કરતા કહ્યું હતું કે આ સ્થાન 'ટ્રમ્પ ડિરેંજમેન્ટ સિન્ડ્રોમ' ધરાવતા લોકોનું સૌથી મોટું જૂથ છે. તેમણે પોતાના રાજકીય આલોચક અને સંગીતકાર બ્રુસ સ્પ્રિંગસ્ટીનની પણ ટીકા કરી હતી અને તેમની મ્યુઝિક ટૂરનું નામ "બોર્ડ ઇન ધ USA" રાખવાની સલાહ આપી હતી. જોકે, ભાષણના અંતે તેમણે કહ્યું હતું કે તેઓ મુક્ત પ્રેસમાં વિશ્વાસ ધરાવે છે અને પોતાના શાસનને ઇતિહાસનું સૌથી પારદર્શક શાસન ગણાવ્યું હતું. તેમણે ઉમેર્યું હતું કે મીડિયા ક્યારેક તેમની સાથે અન્યાય કરે છે તો ક્યારેક ન્યાયી વલણ પણ અપનાવે છે, પરંતુ તેઓ આ પત્રકારત્વના વ્યવસાયનો ખૂબ આદર કરે છે.

WHCA ના પ્રમુખ વેઇજિયા જિયાંગે કાર્યક્રમની શરૂઆતમાં કહ્યું હતું કે મીડિયા કોઈ પણ પ્રકારની હિંસા કે ધમકીથી ડરશે નહીં અને સશક્ત રીતે પોતાનું કામ ચાલુ રાખશે.