નવી દિલ્‍હી, તા.૨૫: હાલમાં દેશમાં ચર્ચા ચાલી રહી છે કે રૂ.૨,૦૦૦ થી વધુના UPI વ્‍યવહારો પર પ્રસ્‍તાવિત ફી કોણ ચૂકવશે. કેન્‍દ્રીય નાણામંત્રી નિર્મલા સીતારમણે આ ચિંતાઓનો જવાબ આપ્‍યો છે. તેમણે જણાવ્‍યું હતું કે મર્ચન્‍ટ ડિસ્‍કાઉન્‍ટ રેટ ગ્રાહકો પાસેથી નહીં, વેપારીઓ પાસેથી વસૂલવામાં આવશે. PTI સાથે વાત કરતા, નાણામંત્રીએ જણાવ્‍યું હતું કે MDR કોઈ કર, સેસ અથવા સરચાર્જ નથી. સરકારને આ પૈસા મળશે નહીં.

નાણામંત્રીએ કહ્યું, મને નથી લાગતું કે ગ્રાહકો ચિંતિત હશે કારણ કે અમે સ્‍પષ્ટ કરી દીધું છે કે તેમને તે ચૂકવવું પડશે નહીં. તેમણે ઉમેર્યું કે આવો MDR પહેલા કાર્ડ પર વસૂલવામાં આવતો હતો, પરંતુ વેપારીઓ ગ્રાહકો પાસેથી તે વસૂલતા નથી.

નવા માળખા મુજબ, ૧૫ ઓક્‍ટોબર, ૨૦૨૬ થી, વ્‍યક્‍તિ-થી-વેપારી UPI વ્‍યવહારો પર રૂ.૨,૦૦૦ થી વધુ પર ૦.૪૦ ટકા MDR વસૂલવામાં આવશે. જોકે, સરકારે MDR મર્યાદા રૂ.૩૦૦ નક્કી કરી છે. આ મર્યાદાથી વધુ કોઈ MDR વસૂલવામાં આવશે નહીં. જોકે, વ્‍યક્‍તિઓ વચ્‍ચે UPI ચુકવણીઓ સંપૂર્ણપણે મફત રહેશે.

GST કાઉન્‍સિલ રૂ.૨,૦૦૦ થી વધુના UPI વ્‍યવહારો પર વસૂલવામાં આવતા MDR (મર્ચન્‍ટ ડિસ્‍કાઉન્‍ટ રેટ) પર GST લાદવાનો નિર્ણય લેશે. સરકારી સૂત્રોએ ગુરુવારે આ જાહેરાત કરી. સૂત્રોએ જણાવ્‍યું હતું કે સેવાઓ GST ને આધીન છે અને તેનો નિર્ણય GST કાઉન્‍સિલ દ્વારા લેવામાં આવે છે, જેની અધ્‍યક્ષતા કેન્‍દ્રીય નાણામંત્રી અને રાજ્‍યના નાણામંત્રીઓ કરે છે.

અમને આશા છે કે ગ્રાહકોના વ્‍યાપક હિતમાં, GST કાઉન્‍સિલ UPI વ્‍યવહારો પર વેપારી ચાર્જ પર ૧૮ ટકા GST પર વિચાર કરશે. વીમા પ્રીમિયમના કિસ્‍સામાં આ પહેલાથી જ કરવામાં આવ્‍યું છે, તેમણે જણાવ્‍યું હતું.

આગામી GST કાઉન્‍સિલની બેઠક ૭ ઓક્‍ટોબરના રોજ યોજાવાની છે. સૂત્રોએ એમ પણ સૂચવ્‍યું છે કે આગામી બેઠકમાં કાઉન્‍સિલનું મુખ્‍ય ધ્‍યાન પ્રક્રિયાને સુધારવા અને સરળ બનાવવા પર રહેશે. કર દરોમાં કોઈ ફેરફાર ધ્‍યાનમાં લેવામાં આવશે નહીં.

જોકે, વ્‍યવસાયો MDR પર ચૂકવવામાં આવતા GST માટે ઇનપુટ ટેક્‍સ ક્રેડિટ મેળવી શકે છે. કર નિષ્‍ણાતોના મતે, આ વ્‍યવસાયો પરનો એકંદર કર બોજ ઘટાડી શકે છે.