​નવી દિલ્હી:રાજધાની દિલ્હીમાં સુરક્ષા વ્યવસ્થાની પોલ ખોલતી એક અત્યંત ગંભીર ઘટના સામે આવ્યા બાદ દેશની ખ્યાતનામ શૈક્ષણિક સંસ્થા 'લેડી શ્રી રામ કોલેજ ફોર વુમન' (LSR) પરિસરમાં ભય અને ચિંતાનો માહોલ વ્યાપી ગયો છે. કોલેજ કમ્પાઉન્ડથી માંડ બે કિલોમીટર અંતરે આવેલા કાલકાજી મંદિર નજીકના આસ્થા કુંજ પાર્કમાં ૧૭ વર્ષની એક માસૂમ સગીરા સાથે બનેલી સામુહિક દુષ્કર્મના આંચકાજનક બનાવ તથા ત્યારબાદ કોલેજના પાછળના દરવાજાથી નજીકમાં જ પોલીસ અને આરોપી વચ્ચે થયેલા એન્કાઉન્ટરના પગલે સંસ્થા તંત્ર દ્વારા ઓફલાઈન શૈક્ષણિક પ્રવૃત્તિઓ બંધ કરીને તમામ વર્ગો ઓનલાઈન મોડમાં ટ્રાન્સફર કરી દેવામાં આવ્યા છે.

​મળતી વિગતો મુજબ, કાલકાજી મંદિર દર્શને આવેલી સગીરા અને તેનો મિત્ર આસ્થા કુંજ પાર્કમાં દાખલ થયા ત્યારે ત્રણ શખ્સોએ પોતાની ઓળખ પોલીસ કર્મચારી તરીકે આપી હતી. આ નકલી પોલીસે બંને સગીર હોવાનું કહીને કાનૂની કાર્યવાહીનો ડર બતાવી ધાકધમકી આપી હતી. ત્યારબાદ આ શખ્સો સગીરાના મિત્રને માર મારીને અલગ લઈ ગયા હતા અને સગીરાને પાર્કના એક સુમસામ ખૂણામાં લઈ જઈ બંદૂક તેમજ છરી બતાવીને ત્રણેય શખ્સોએ તેની પર ક્રૂરતાપૂર્વક દુષ્કર્મ આચર્યું હતું. બનાવ અંગે અમર કોલોની પોલીસ મથકે ભારતીય ન્યાય સંહિતા (BNS) અને પોક્સો (POCSO) એક્ટ હેઠળ ગુનો નોંધવામાં આવ્યો હતો અને પીડિતાને તાત્કાલિક સારવાર અર્થે એઈમ્સ (AIIMS) હોસ્પિટલ ખાતે ખસેડવામાં આવી હતી.

​આ ગુનાના એક મુખ્ય આરોપી આસિફને પકડવા માટે પોલીસે ચલાવેલા સર્ચ ઓપરેશન દરમિયાન, એલએસઆર કોલેજના પાછળના ગેટથી માંડ ૫૦ મીટર અંતરે આવેલા ડીએમ ઓફિસ રોડ પર આરોપીએ પોલીસ ટુકડી પર ત્રણ રાઉન્ડ ગોળીબાર કર્યો હતો. જેમાં એક ગોળી હેડ કોન્સ્ટેબલની બુલેટપ્રૂફ જેકેટ પર વાગી હતી. પોલીસે સ્વબચાવમાં જવાબી ગોળીબાર કરતા આરોપી આસિફના પગમાં ગોળી વાગી હતી અને તેની અટકાયત કરવામાં આવી હતી. આ સિવાય હેમંત અને મુકેશ નામના અન્ય બે આરોપીઓની પણ ધરપકડ કરી લેવામાં આવી છે.

​કોલેજ કેમ્પસની સાવ નજીક થયેલા ગોળીબાર અને હિંસક ઘટનાક્રમથી કોલેજમાં અભ્યાસ કરતી વિદ્યાર્થિનીઓ, અધ્યાપકો અને સ્ટાફમાં ભારે અસુરક્ષાની લાગણી જન્મી છે. પરિસ્થિતિની ગંભીરતાને ધ્યાનમાં રાખીને કોલેજના પ્રિન્સિપાલ કનિકા કે. અહૂજાએ સ્પષ્ટ કર્યું છે કે વિદ્યાર્થિનીઓની સલામતી અને સુરક્ષા સૌથી પ્રાથમિક બાબત છે. તેમણે માહિતી આપી હતી કે કોલેજના પાછળના ગેટ પાસે એકઠા ન થવા સૂચના અપાઈ છે તેમજ વિદ્યાર્થિનીઓના માનસિક સ્વાસ્થ્ય અને કાઉન્સેલિંગ માટે મેન્ટર્સ અને કાઉન્સેલર્સને સતત ઉપલબ્ધ રાખવામાં આવ્યા છે. આ ઉપરાંત અમર કોલોની પોલીસ મથક પાસે કોલેજની આસપાસના રસ્તાઓ અને પાર્ક વિસ્તારમાં પોલીસ પેટ્રોલિંગ તાત્કાલિક વધારવાની માંગ કરવામાં આવી છે.

​બીજી તરફ, કોલેજના વિદ્યાર્થી સંગઠન (LSR Students' Union) દ્વારા આ મુદ્દે એક ઈમરજન્સી જનરલ બોડી મીટિંગ યોજવામાં આવી હતી. વિદ્યાર્થી નેતાઓએ રજૂઆત કરી છે કે માત્ર સામાન્ય સલાહ-સૂચનો જાહેર કરવાથી સુરક્ષા સુનિશ્ચિત થઈ શકતી નથી. કેમ્પસ, મેટ્રો સ્ટેશન, બસ સ્ટોપ, પીજી હોસ્ટેલ અને સ્થાનિક બજારો વચ્ચેના જે વિસ્તારો અંધારા કે અસુરક્ષિત છે, ત્યાં સ્પેશિયલ 'લોકેશન-સ્પેસિફિક સિક્યોરિટી ઓડિટ' કરવામાં આવે. સ્ટ્રીટ લાઈટો, સીસીટીવી કેમેરા અને રાત્રી પેટ્રોલિંગની સુવિધા સુધારવા માટે વિદ્યાર્થી સંગઠને કોલેજ પ્રશાસન અને દિલ્હી પોલીસ સમક્ષ સત્તાવાર માંગણીઓ રજૂ કરવાનો નિર્ણય લીધો છે.