નવી દિલ્હી: તા.14 પશ્ચિમ એશિયા અને ખાડી દેશોમાં સર્જાયેલી અસ્થિર સુરક્ષા સ્થિતિ વચ્ચે ભારત સરકારે પોતાના નાગરિકોની સુરક્ષા માટે એડીચોટીનું જોર લગાવ્યું છે. વિદેશ મંત્રાલયના (MEA) જણાવ્યા અનુસાર, અત્યાર સુધીમાં અંદાજે 9.27 લાખથી વધુ ભારતીયોને વિવિધ સંઘર્ષગ્રસ્ત વિસ્તારોમાંથી સુરક્ષિત રીતે વતન પરત લાવવામાં આવ્યા છે. ખાડી દેશોમાં વધતા તણાવને ધ્યાનમાં રાખીને ભારત સરકારે આને અત્યાર સુધીના સૌથી મોટા સ્થળાંતર અભિયાન પૈકીનું એક ગણાવ્યું છે.
વિદેશ મંત્રાલયના સંયુક્ત સચિવ (ખાડી) અસીમ આર. મહાજને એક વિશેષ બ્રીફિંગમાં જણાવ્યું હતું કે, ભારત સરકાર આ ક્ષેત્રમાં રહેતા દરેક ભારતીયની સુરક્ષા સુનિશ્ચિત કરવા માટે ચોવીસ કલાક કામ કરી રહી છે. આ માટે મંત્રાલયમાં એક સ્પેશિયલ કંટ્રોલ રૂમ ઉભો કરવામાં આવ્યો છે, જે સીધા જ જે-તે દેશના ભારતીય મિશન અને એમ્બેસી સાથે સંકલન કરી રહ્યો છે.
એરલિફ્ટનું આયોજન: ફ્લાઇટ્સનો ધમધમાટ
વિવિધ દેશોમાં એરસ્પેસની સ્થિતિ મુજબ ફ્લાઇટ્સનું આયોજન કરવામાં આવ્યું છે:
•    UAE: ભારત માટે દરરોજ અંદાજે 100 જેટલી ફ્લાઇટ્સ ઓપરેટ થઈ રહી છે.
•    સાઉદી અરેબિયા અને ઓમાન: અહીંના એરપોર્ટ પરથી પણ ભારતના વિવિધ શહેરો માટે સતત વિમાનો ઉડી રહ્યા છે.
•    કતાર: કતાર એરવેઝ મારફતે દરરોજ 8 થી 10 ફ્લાઇટ્સનું સંચાલન કરવામાં આવી રહ્યું છે.
•    કુવૈત અને બહેરીન: કુવૈતની એરસ્પેસ બંધ હોવા છતાં, જઝીરા અને કુવૈત એરવેઝ દ્વારા સાઉદી અરેબિયાના દમ્મામ એરપોર્ટ મારફતે ભારતીયોને પરત લાવવાની વૈકલ્પિક વ્યવસ્થા કરવામાં આવી છે.
વિદ્યાર્થીઓ અને માછીમારો પર વિશેષ ધ્યાન
સૌથી પડકારજનક સ્થિતિ ઈરાન અને ઇઝરાયેલમાં જોવા મળી રહી છે. તેહરાનમાં સ્થિત ભારતીય દૂતાવાસે અત્યાર સુધીમાં 2,230 નાગરિકોને ઈરાનથી આર્મેનિયા અને અઝરબૈજાનના રસ્તે ભારત પહોંચાડ્યા છે. આ આંકડામાં 987 વિદ્યાર્થીઓ અને 657 માછીમારોનો સમાવેશ થાય છે, જેઓ દરિયાઈ અને ભૌગોલિક સીમાઓના કારણે ત્યાં અટવાયા હતા.
યુદ્ધ જેવી સ્થિતિમાં ભારતની રણનીતિ
અમેરિકા અને ઈરાન વચ્ચે વધતા તણાવ અને હોર્મુઝ સ્ટ્રેટની સંભવિત નાકાબંધીના ભય વચ્ચે, ભારતીય નૌકાદળ અને કોન્સ્યુલર ટીમો જહાજો પર કામ કરતા ભારતીય ક્રૂ મેમ્બર્સના પણ સતત સંપર્કમાં છે. જોર્ડન, ઇજિપ્ત અને સાઉદી અરેબિયા જેવા પાડોશી દેશોના રસ્તાઓનો ઉપયોગ કરીને ભારતીયોને 'ટ્રાન્ઝિટ' રૂટ પૂરો પાડવામાં આવી રહ્યો છે જેથી કોઈ પણ નાગરિક યુદ્ધના મેદાનમાં ફસાયેલો ન રહે.
સરકારે સ્પષ્ટ કર્યું છે કે જ્યાં સુધી છેલ્લો ભારતીય સુરક્ષિત નહીં થાય ત્યાં સુધી આ મિશન ચાલુ રહેશે. વિવિધ ભારતીય સંગઠનો અને પ્રદેશની કંપનીઓ સાથે પણ સીધો સંપર્ક સાધવામાં આવ્યો છે જેથી ગ્રાઉન્ડ લેવલ પર સ્થિતિનું ચોક્કસ આકલન કરી શકાય.