નવી દિલ્હી, તા.૧૩: દક્ષિણ-પૂર્વ બંગાળની ખાડીમાં સર્જાયેલું લો પ્રેશર સિસ્ટમ વધુ મજબૂત બનીને આગામી ૧૬ નવેમ્બરની સાંજ સુધીમાં મધ્ય બંગાળની ખાડી પર એક ભયાનક ચક્રવાતી તોફાનમાં પરિવર્તિત થવાની પ્રબળ સંભાવના હવામાન વિભાગ દ્વારા વ્યક્ત કરવામાં આવી છે.

પ્રાપ્ત સત્તાવાર વિગતો અનુસાર, આ સિસ્ટમ ૧૪ નવેમ્બરે ઓછા દબાણવાળા વિસ્તારમાં અને ૧૫ નવેમ્બરે ડિપ્રેશનમાં ફેરવાયા બાદ ઉત્તર-પશ્ચિમ દિશા તરફ આગળ વધશે, જેના પરિણામે દેશના અનેક રાજ્યોમાં વાવાઝોડા સાથે ભારે વરસાદની ચેતવણી આપવામાં આવી છે.

હવામાન વિભાગની આગાહી મુજબ, દક્ષિણ ભારતના તમિલનાડુ, પુડુચેરી, કરાઈકલ, કેરળ અને દરિયાકાંઠાના આંધ્રપ્રદેશમાં ૧૩ થી ૧૯ નવેમ્બર દરમિયાન વ્યાપક વરસાદ પડશે, જ્યારે ૧૮ અને ૧૯ નવેમ્બરે આંધ્રપ્રદેશ અને ઓડિશામાં અતિભારે વરસાદની શક્યતા છે.

પૂર્વીય ભારતની વાત કરીએ તો આંદામાન અને નિકોબાર ટાપુઓ તેમજ પશ્ચિમ બંગાળના ગંગાના મેદાની વિસ્તારોમાં તેજ પવન અને વીજળીના કડાકા સાથે વરસાદી માહોલ જોવા મળશે, જ્યારે ઉત્તર-પશ્ચિમ ભારતમાં પણ દિલ્હી, હરિયાણા, પંજાબ અને રાજસ્થાનમાં છૂટાછવાયા વરસાદની શક્યતા છે.

ઉલ્લેખનીય છે કે છેલ્લા કેટલાક દિવસોમાં બંગાળની ખાડીમાં આકાર લઈ રહેલું આ ત્રીજું ચક્રવાતી તોફાન હશે, જેના કારણે દરિયાકાંઠાના વિસ્તારોમાં વહીવટી તંત્ર દ્વારા અગાઉથી જ સાવચેતીના પગલાં લેવાની શરૂઆત કરી દેવામાં આવી છે.

આગામી દિવસોમાં દરિયામાં ભારે કરંટ અને તોફાની પવન ફૂંકાવાની શક્યતાને ધ્યાનમાં રાખીને માછીમારોને દરિયો ન ખેડવા સૂચના આપવામાં આવી છે અને આપત્તિ વ્યવસ્થાપન ટીમોને સ્ટેન્ડબાય રાખવામાં આવી છે.