​મુંબઈ: મુંબઈની ઓળખ સમાન અને ૧૯૫૩થી ખાણીપીણીના શોખીનોમાં ખૂબ જ લોકપ્રિય રહેલા ‘કે. રસ્તમ એન્ડ કંપની’ આઈસ્ક્રીમ પાર્લર સામે મહારાષ્ટ્રના ફૂડ એન્ડ ડ્રગ એડમિનિસ્ટ્રેશન (FDA) દ્વારા અત્યંત કડક કાર્યવાહી કરવામાં આવી છે. રાજ્યભરમાં ચાલી રહેલા ‘સેફ ફૂડ, સેફ મહારાષ્ટ્ર’ અભિયાન અંતર્ગત કરવામાં આવેલી આકસ્મિક તપાસ દરમિયાન, ચર્ચગેટ સ્થિત આ આઈકોનિક આઉટલેટમાં સ્વચ્છતાના ધારાધોરણોનો ગંભીર ભંગ જોવા મળતા તેનું ફૂડ લાયસન્સ તાત્કાલિક અસરથી સસ્પેન્ડ કરી દેવામાં આવ્યું છે.

​તપાસ દરમિયાન મળી આવેલી ગંભીર બેદરકારીઓ

FDAના અધિકારીઓની ટીમે જ્યારે આ પ્રખ્યાત આઈસ્ક્રીમ પાર્લર પર દરોડો પાડ્યો, ત્યારે ત્યાંની સ્થિતિ ચોંકાવનારી હતી. તપાસમાં બહાર આવ્યું છે કે પાર્લરના પરિસરમાં જીવતા ઉંદરો અને માખીઓનો મોટો ઉપદ્રવ હતો. આ ઉપરાંત, આઈસ્ક્રીમ બનાવવામાં વપરાતા વિવિધ પ્રકારના આર્ટિફિશિયલ ફ્લેવર્સ અને એસેન્સનો જથ્થો એક્સપાયર્ડ એટલે કે મુદત પૂરી થઈ ગઈ હોવા છતાં વપરાશ માટે રાખવામાં આવ્યો હતો, જેને અધિકારીઓએ સ્થળ પર જ નાશ કર્યો હતો.

​તપાસમાં સામે આવ્યું છે કે, આ આઉટલેટ દ્વારા ફૂડ સેફ્ટીના નિયમોનું પાલન કરવામાં ભારે નિષ્ફળતા મળી હતી. આઈસ્ક્રીમ જેવી સંવેદનશીલ ખાદ્ય ચીજવસ્તુઓ માટે જાળવવાની અનિવાર્ય ‘કોલ્ડ ચેઈન’ સિસ્ટમમાં પણ ખામીઓ જોવા મળી હતી. આ ઉપરાંત, જરૂરી ફૂડ સેફ્ટી રેકોર્ડ્સ નિભાવવામાં પણ ગંભીર લાપરવાહી વર્તવામાં આવી હતી, જે સીધી રીતે ગ્રાહકોના સ્વાસ્થ્ય સાથે ચેડા સમાન છે.

​જ્યાં સુધી ખામીઓ દૂર નહીં થાય, ત્યાં સુધી પાર્લર રહેશે બંધ

ફૂડ સેફ્ટી એન્ડ સ્ટાન્ડર્ડ્સ એક્ટ, ૨૦૦૬ની કલમ ૩૨(૩) હેઠળ FDAએ આ કાર્યવાહી કરી છે. અધિકારીઓએ સ્પષ્ટ કર્યું છે કે, જ્યાં સુધી પાર્લર દ્વારા તમામ સ્વચ્છતાના ધોરણો પૂર્ણ કરવામાં નહીં આવે અને સુરક્ષાના માપદંડોનું પાલન કરવામાં નહીં આવે, ત્યાં સુધી આ આઉટલેટને ફરીથી ખોલવાની મંજૂરી આપવામાં આવશે નહીં. હાલમાં એકત્રિત કરવામાં આવેલા આઈસ્ક્રીમના નમૂનાઓને લેબોરેટરીમાં પરીક્ષણ માટે મોકલવામાં આવ્યા છે, જેના રિપોર્ટ બાદ આગળની કાયદેસરની કાર્યવાહી નક્કી કરવામાં આવશે.

​ઉલ્લેખનીય છે કે, ‘કે. રસ્તમ’ તેની આઈસ્ક્રીમ સેન્ડવીચ માટે સમગ્ર દેશમાં જાણીતું છે અને પેઢીઓથી મુંબઈકરો તેમજ પ્રવાસીઓની પસંદગીનું સ્થળ રહ્યું છે. જોકે, આ ઘટના બાદ આઈકોનિક સંસ્થાઓમાં પણ સ્વચ્છતા બાબતે કેટલી બેદરકારી હોઈ શકે છે, તે બાબતે ભારે ચર્ચા જાગી છે. FDAના આ દરોડા દરમિયાન માત્ર આ એક જ નહીં, પરંતુ રાજ્યના અન્ય ખાદ્ય વ્યવસાયોમાં પણ તપાસ કરવામાં આવી હતી, જેમાં નિયમોનું ઉલ્લંઘન કરનાર અન્ય કેટલાક આઉટલેટ્સ સામે પણ કડક પગલાં લેવામાં આવ્યા છે.