ઈમ્ફાલ:મણિપુરમાં ચાલી રહેલી અશાંતિ વચ્ચે હવે નાગા સમુદાયના સિવિલ સંગઠનોએ વડાપ્રધાન નરેન્દ્રભાઈ મોદીના તાત્કાલિક અને વ્યક્તિગત હસ્તક્ષેપની માંગ કરી છે. આ સંગઠનોએ વડાપ્રધાનને એક મેમોરેન્ડમ પાઠવીને જણાવ્યું છે કે રાજ્યમાં સશસ્ત્ર કુકી જૂથોની પ્રવૃત્તિઓ વધી રહી છે અને તેઓ બાહ્ય તત્વોને મદદ કરી રહ્યા છે, જે રાષ્ટ્રીય સુરક્ષા માટે મોટો ખતરો છે.

નાગા સંગઠનોએ આરોપ લગાવ્યો છે કે ઉખરુલ અને કામજોંગ જેવા પહાડી જિલ્લાઓમાં કુકી જૂથો દ્વારા હિંસા ફેલાવવામાં આવી રહી છે. તેમણે સુરક્ષા દળોની ભૂમિકા પર પણ સવાલો ઉઠાવ્યા છે અને માંગ કરી છે કે કેન્દ્રીય સુરક્ષા દળો પક્ષપાત વિના કામ કરે તે સુનિશ્ચિત કરવામાં આવે. સંગઠનોના મતે, વિદેશી તત્વોના ટેકાથી ચાલતા આ જૂથો સ્થાનિક શાંતિને ડહોળી રહ્યા છે અને આંતરરાષ્ટ્રીય સરહદ પર અસ્થિરતા ઊભી કરી રહ્યા છે.

વધુમાં, નાગા સંગઠનોએ એક સ્વતંત્ર તપાસ સમિતિ રચવાની પણ માંગ કરી છે, જે સુરક્ષા દળોના કથિત પક્ષપાત અને હિંસાની ઘટનાઓની નિષ્પક્ષ તપાસ કરી શકે. મણિપુરમાં ફેબ્રુઆરી ૨૦૨૫ થી રાષ્ટ્રપતિ શાસન લાદવામાં આવ્યું છે, તેમ છતાં પરિસ્થિતિ હજુ પણ તણાવપૂર્ણ છે. નાગા સમુદાયે આશા વ્યક્ત કરી છે કે વડાપ્રધાનના સીધા હસ્તક્ષેપથી જ રાજ્યમાં કાયમી શાંતિ સ્થપાઈ શકશે અને તમામ સમુદાયો વચ્ચે વિશ્વાસનું વાતાવરણ ફરી ઊભું થશે.