નાના પાટેકરના અંતિમ સંસ્કાર સાંજે પુણેમાં રાજકીય સન્માન સાથે કરાશેઃ મુંબઈમાં પ્રાર્થના સભા યોજાશે
અંતિમ ઇચ્છા મુજબ પુણે સ્થિત તેમની ફાર્મ પર તેમનો અંતિમ સંસ્કાર કરવામાં આવશે
પુણે તા.૮: બોલિવૂડના જાણીતા દિગ્ગજ અભિનેતા નાના પાટેકર હવે આપણી વચ્ચે નથી રહ્યા. ૭૫ વર્ષની વયે તેમના નિધનના સમાચારથી ફિલ્મ ઇન્ડસ્ટ્રી, રાજકારણ અને રમતગમત જગતમાં શોકનું મોજુ ફરી વળ્યું છે. દરેક વ્યક્તિ આ અણધાર્યા સમાચારથી સ્તબ્ધ અને આઘાતમાં છે. નાના પાટેકરના નિધન વચ્ચે મહારાષ્ટ્ર સરકાર દ્વારા તેમના અંગે મોટો નિર્ણય લેવામાં આવ્યો છે.
સાંસ્કૃતિક બાબતોના મંત્રી આશિષ શેલારે જાહેરાત કરી છે કે સરકારે અભિનેતા નાના પાટેકરને રાજકીય સન્માન સાથે અંતિમ વિદાય આપવાનો નિર્ણય કર્યો છે. આ સન્માન તેમના મરાઠી રંગમંચ, મરાઠી અને હિન્દી સિનેમામાં આપેલા અમૂલ્ય યોગદાનને ધ્યાનમાં રાખીને આપવામાં આવી રહ્યું છે. તેમની અંતિમ ઇચ્છા મુજબ પુણે સ્થિત તેમના ફાર્મ પર તેમનો અંતિમ સંસ્કાર કરવામાં આવશે, જ્યાં તેમને રાજકીય સન્માન આપવામાં આવશે.
ગુરુવારે સવારે ફિલ્મ ઇન્ડસ્ટ્રીમાંથી આ ચોંકાવનારા સમાચાર સામે આવ્યા હતા. નાના પાટેકરના પુત્ર મલ્હાર પાટેકરે પિતાના નિધનની પુષ્ટિ કરી છે. પ્રાપ્ત માહિતી અનુસાર, ગોવા સ્થિત મણિપાલ હોસ્પિટલની ટીમ દ્વારા સવારે ૫:૨૦ વાગ્યે તેમને મૃત જાહેર કરવામાં આવ્યા હતા. તેમને છાતીમાં તીવ્ર દુખાવાની ફરિયાદ હતી, ત્યારબાદ તબીબી ટીમને તેમના ફલેટ પર મોકલવામાં આવી હતી જ્યાં તેઓ બેભાન અવસ્થામાં મળી આવ્યા હતા.
નાના પાટેકરે પરિદા, તિરંગા, અગ્નિસાક્ષી, ખામોશી ધ મ્યુઝિકલ, વેલકમ, અપહરણ અને રાજનીતિ જેવી યાદગાર ફિલ્મોમાં કામ કરીને દર્શકોના દિલ પર રાજ કર્યું હતું. તેમણે વિલનથી લઈને કોમેડી અને ગંભીર પાત્રો સુધીની અનેક ભૂમિકાઓ ભજવી હતી. અભિનય ઉપરાંત તેમણે ડિરેક્ટર અને રાઇટર તરીકે પણ કામ કર્યું હતું, જેમાં વર્ષ ૧૯૯૧માં આવેલી ફિલ્મ 'પ્રહારઃ ધ ફાઇનલ અટેક'થી તેમણે દિગ્દર્શનક્ષેત્રે પદાર્પણ કર્યું હતું. અભિનય ઉપરાંત તેઓ ખેડૂતોના પ્રશ્નો અને કલ્યાણ માટે પણ હંમેશા સક્રિય રહ્યા હતા અને ખુલ્લીને પોતાના વિચારો રજૂ કરતા હતા
(3:07 PM IST)
છેલ્લા 8 દિવસમાં સૌથી લોકપ્રિય 
