અંકારા :  ઉત્તર એટલાન્ટિક સંધિ સંગઠન (NATO) ની બે દિવસીય હાઇ-પ્રોફાઇલ બેઠકનો તુર્કીમાં ધમાકેદાર પ્રારંભ થઈ ચૂક્યો છે, જેમાં ભાગ લેવા માટે અમેરિકી રાષ્ટ્રપતિ ડોનાલ્ડ ટ્રમ્પ ખાસ અંકારા પહોંચ્યા છે. એરપોર્ટ પર તુર્કીના રાષ્ટ્રપતિ રેસેપ તૈયર એર્દોગને પોતે ટ્રમ્પનું ભવ્ય અને ઉષ્માભર્યું સ્વાગત કર્યું હતું. તુર્કી જતા પહેલા જ વૈશ્વિક મીડિયા સામે મોટો ખુલાસો કરતા ટ્રમ્પે સ્વીકાર્યું હતું કે, તેઓ આ વૈશ્વિક સમિટમાં માત્ર અને માત્ર તેમના ખાસ મિત્ર અને મહાન નેતા એર્દોગનના આગ્રહના કારણે હાજરી આપી રહ્યા છે. આ આંતરરાષ્ટ્રીય બેઠકમાં નાટોના ભવિષ્યના સંરક્ષણ બજેટ અને રશિયા સામે યુદ્ધ લડી રહેલા યુક્રેનને અપાનારી સૈન્ય તેમજ આર્થિક સહાય જેવા અત્યંત સંવેદનશીલ અને પ્રાદેશિક મુદ્દાઓ પર ગંભીર મડાગાંઠ ઉકેલાય તેવી આશા છે.

આ સમિટનો સૌથી મોટો એજન્ડા સંરક્ષણ ખર્ચમાં અભૂતપૂર્વ વધારો કરવાનો છે, જેમાં ડોનાલ્ડ ટ્રમ્પની આકરી નીતિઓની સ્પષ્ટ અસર જોવા મળી રહી છે. પોતાના પ્રથમ રાષ્ટ્રપતિ પ્રચારથી જ નાટોની ઉપયોગીતા અને અમેરિકા પર પડતા આર્થિક બોજ સામે સવાલો ઉઠાવનારા ટ્રમ્પના પ્રચંડ દબાણ સામે આખરે તમામ સાથી દેશોએ નમવું પડ્યું છે. નાટોના સભ્ય દેશો હવે વર્ષ 2035 સુધીમાં પોતાનો વાર્ષિક સંરક્ષણ ખર્ચ જીડીપીના વર્તમાન 2 ટકાથી વધારીને સીધો 5 ટકા કરવા સંમત થયા છે. બીજી તરફ, રશિયા દ્વારા યુક્રેનની રાજધાની કિવ પર સતત તીવ્ર બની રહેલા મિસાઇલ હુમલાઓ વચ્ચે યુક્રેનના રાષ્ટ્રપતિ વ્લાદિમીર ઝેલેન્સ્કી અમેરિકા પાસે તાકીદે અત્યાધુનિક પેટ્રિઅટ મિસાઇલ સિસ્ટમ અને વિધ્વંસક શસ્ત્રોની માંગ કરી રહ્યા છે, જેનો આખરી નિર્ણય આ બેઠકમાં લેવામાં આવશે.

વૈશ્વિક શક્તિ પ્રદર્શન સમાન આ મહાસંમેલનમાં નાટોના તમામ 32 સભ્ય દેશોના વડાઓ એક મંચ પર એકઠા થયા છે. ગઠબંધનની બહારના દેશો હોવા છતાં યુક્રેનના વ્લાદિમીર ઝેલેન્સ્કી અને દક્ષિણ કોરિયાના લી જે-મ્યુંગ આ સમિટમાં ખાસ હાજરી આપી રહ્યા છે, જ્યારે ઓસ્ટ્રેલિયા, જાપાન અને ન્યુઝીલેન્ડ જેવા દેશોએ પોતાના સંરક્ષણ મંત્રીઓને મોકલ્યા છે. મધ્ય-પૂર્વમાં ચાલી રહેલા યુએસ-ઇઝરાયલ-ઈરાન યુદ્ધની ભયાનક અસરો વચ્ચે બહેરીન, કુવૈત, કતાર અને યુએઈ (UAE) જેવા ખાડી દેશો પણ પોતાના પ્રતિનિધિઓ સાથે અહીં હાજર છે. જર્મન માર્શલ ફંડના પ્રાદેશિક નિર્દેશક ઓઝગુર ઉનલુહિસારસિક્લીના મતે, ગત વર્ષે હેગ સમિટમાં લેવાયેલા નિર્ણયોને વાસ્તવિક લશ્કરી તાકાતમાં બદલવા માટે અંકારાની આ બેઠક નાટોના ઇતિહાસમાં સૌથી વધુ મજબૂત અને નિર્ણાયક સાબિત થશે.