કુવૈત સિટી: મિડલ ઈસ્ટમાં અમેરિકા અને ઈરાન વચ્ચે વધી રહેલા ભારે લશ્કરી તણાવ અને યુદ્ધની ભીતિ વચ્ચે ગલ્ફ દેશો પોતાની સુરક્ષા સુનિશ્ચિત કરવા માટે નવા રાજકીય અને સૈન્ય સમીકરણો રચવા મજબૂર બન્યા છે. ઈરાન તરફથી વધી રહેલા ડ્રોન અને મિસાઈલ હુમલાના ભય વચ્ચે તેલ સમૃદ્ધ દેશ કુવૈતે પાકિસ્તાન સાથે પોતાના સંરક્ષણ સંબંધોને એક નવી ઊંચાઈ પર લઈ જવા હાથ મિલાવ્યા છે. તાજેતરમાં કુવૈતે પાકિસ્તાન સાથે ૨૦૨૩માં સહી કરાયેલા ૫ વર્ષના સંરક્ષણ સહયોગ કરારને ઔપચારિક મંજૂરી આપી દીધી છે. જોકે, હવે બદલાયેલી પરિસ્થિતિમાં કુવૈત આટલેથી અટકવા માંગતું નથી; તે ગયા વર્ષે સાઉદી અરેબિયા અને પાકિસ્તાન વચ્ચે થયેલા પરસ્પર સુરક્ષા કરારની જેમ જ પાકિસ્તાન પાસેથી પૂર્ણ કક્ષાનું 'સૈન્ય સુરક્ષા કવચ' પ્રાપ્ત કરવા આતુર બન્યું છે.

રોઈટર્સના અહેવાલો મુજબ, કુવૈત પાકિસ્તાન પાસેથી એક વ્યાપક અને નાટો (NATO) જેવો સંરક્ષણ કરાર ઈચ્છે છે, જેમાં કટોકટીના સમયે પાકિસ્તાની સેના સીધી જ કુવૈતની સુરક્ષામાં મેદાનમાં ઉતરી પડે. આ પ્રસ્તાવિત મોડેલ હેઠળ કુવૈતે પોતાની જમીન પર હજારો પાકિસ્તાની લડાયક સૈનિકોની તૈનાતી, JF-17 ફાઈટર જેટ્સ, એડવાન્સ ડ્રોન સિસ્ટમ અને મિસાઈલ ડિફેન્સ સિસ્ટમ તૈનાત કરવાની માંગ રજૂ કરી છે. આ સુરક્ષા ગેરંટીના બદલામાં કુવૈત આર્થિક તંગીથી ઝૂઝી રહેલા પાકિસ્તાનને ઊર્જા ક્ષેત્રે મોટું રોકાણ, ડિઝલ સપ્લાય અને ઈંધણ સંગ્રહ માટે વિશાળ સ્ટોરેજ સુવિધાઓ વિકસાવવાની લોભામણી ઓફર આપી રહ્યું છે.

બીજી તરફ, પરમાણુ શક્તિ ધરાવતું પાકિસ્તાન કુવૈતની આ માંગ સામે અત્યંત સાવચેતીભર્યું અને તટસ્થ વલણ અપનાવી રહ્યું છે. અગાઉ સાઉદી સાથે થયેલા કરારને કારણે પાકિસ્તાન પર પહેલેથી જ અમેરિકા-ઈરાન યુદ્ધમાં ઘસડાઈ જવાનું જોખમ તોળાઈ રહ્યું છે, જેથી ઈસ્લામાબાદ ઈરાનને નારાજ કરીને કોઈ નવા પ્રાદેશિક સંઘર્ષમાં સીધું હોમાવા નથી માંગતું. પાકિસ્તાની સુરક્ષા અધિકારીઓએ સ્પષ્ટ કર્યું છે કે હાલમાં કુવૈતમાં લડાયક ટુકડીઓ મોકલવાનો કોઈ પ્રસ્તાવ વિચારણા હેઠળ નથી. નિષ્ણાતોનું માનવું છે કે જ્યાં સુધી વોશિંગ્ટન અને તહેરાન વચ્ચે યુદ્ધની આગ શાંત નહીં થાય, ત્યાં સુધી આ વ્યાપક સુરક્ષા કરાર માત્ર વાટાઘાટો સુધી જ મર્યાદિત રહેશે.