નવી દિલ્હી,: દેશની રાજધાની દિલ્હીમાં પ્રદૂષણને નિયંત્રિત કરવા અને વાહનોના ડેટાને પારદર્શક બનાવવા માટે પરિવહન વિભાગે એક મોટો નિર્ણય લીધો છે. હવેથી કોઈપણ વાહનનું પ્રદૂષણ નિયંત્રણ પ્રમાણપત્ર (PUC) ત્યારે જ જારી કરવામાં આવશે જ્યારે વાહનની આરસી (Registration Certificate) સાથે લિંક થયેલા મોબાઈલ નંબર પર મોકલવામાં આવેલો OTP વેરીફાય કરવામાં આવશે.
જૂની સિસ્ટમમાં મોટો ફેરફાર
અત્યાર સુધી એવી વ્યવસ્થા હતી કે વાહન માલિક પીયુસી સેન્ટર પર જઈને પોતાનો કોઈપણ મોબાઈલ નંબર આપતા અને તેના પર આવતા OTP દ્વારા સર્ટિફિકેટ બની જતું હતું. પરંતુ હવે નવા નિયમ મુજબ, સેન્ટરનો કર્મચારી ગમે તે નંબર પર OTP મોકલી શકશે નહીં. સિસ્ટમ આપમેળે માત્ર તે જ નંબર પર મેસેજ મોકલશે જે આરસી પર નોંધાયેલો છે. આ ફેરફારને કારણે દરરોજ અનેક લોકો પીયુસી કઢાવ્યા વગર જ કેન્દ્રો પરથી પાછા ફરી રહ્યા છે.
સેકન્ડ હેન્ડ વાહન ચાલકો માટે જોખમ
આ નિયમથી ખાસ કરીને એવા લોકોને તકલીફ પડી રહી છે જેઓ સેકન્ડ હેન્ડ વાહન ચલાવે છે અથવા જેમણે જૂની આરસી પર પોતાનો નંબર અપડેટ કરાવ્યો નથી. ઘણા કિસ્સાઓમાં આરસી પર જૂના માલિકનો નંબર હોય છે અથવા એવો નંબર હોય છે જે હવે ચાલુ નથી. આવા સંજોગોમાં ઓટીપી મેળવવો અશક્ય બની જાય છે અને પરિણામે પ્રદૂષણ સર્ટિફિકેટ નીકળી શકતું નથી.
શા માટે લેવાયો આ નિર્ણય?
પરિવહન વિભાગના જણાવ્યા અનુસાર, આ કડક નિયમ પાછળનું મુખ્ય કારણ વાહનોના માલિકી હકની પારદર્શિતા લાવવાનું છે. વિભાગ ઈચ્છે છે કે લોકો ખરીદેલા જૂના વાહનોને સત્તાવાર રીતે પોતાના નામે ટ્રાન્સફર કરાવે. આ ઉપરાંત, ઈ-ચલાન અને ટ્રાફિક સંબંધિત મહત્વના સંદેશાઓ સીધા સાચા માલિક સુધી પહોંચી શકે તે માટે પણ આ ડેટા અપડેટ હોવો અત્યંત જરૂરી છે.
કઈ રીતે કરશો અપડેટ?
જો તમારી આરસીમાં મોબાઈલ નંબર અપડેટ નથી, તો તમારે પરિવહન વિભાગની સત્તાવાર વેબસાઈટ પર જઈને અથવા નજીકની RTO કચેરીએ જઈને તાત્કાલિક તમારો વર્તમાન મોબાઈલ નંબર લિંક કરાવવો પડશે. જો આ કામ નહીં કરવામાં આવે તો આગામી સમયમાં પીયુસી વગર વાહન ચલાવવા બદલ ભારે દંડ ભરવો પડી શકે છે.
દિલ્હીના વાહન ચાલકોએ હવે રસ્તા પર નીકળતા પહેલા ખાતરી કરી લેવી પડશે કે તેમની આરસી અને મોબાઈલ નંબર એકબીજા સાથે જોડાયેલા છે કે નહીં.