News of Saturday, 21st November 2026
ભારત-નેપાળ સંબંધોનો નવો રેલ અધ્યાય: પીએમ મોદી અને નેપાળના વડાપ્રધાન બાલેન્દ્ર શાહ ૨૩ નવેમ્બરે નવી ટ્રેન સેવાને આપશે લીલી ઝંડી!
અયોધ્યા ધામ અને જનકપુર ધામ વચ્ચે સીધી એક્સપ્રેસ ટ્રેનથી ધાર્મિક પર્યટન અને વેપારને મળશે વેગ : ગોરખપુર, રક્સૌલ, સીતામઢી અને જયનગર સહિતના સ્ટેશનો પર સ્ટોપેજ સાથે રક્સૌલ-કાઠમંડુ રેલ પ્રોજેક્ટ અને ગતિશક્તિ યુનિવર્સિટીના તાલીમ સહયોગથી સરહદ પારની કનેક્ટિવિટી થશે વધુ મજબૂત

નવી દિલ્હી : ભારત અને નેપાળ વચ્ચેના સદીઓ જૂના સાંસ્કૃતિક, ધાર્મિક અને રાજદ્વારી સંબંધોને નવી ઊંચાઈએ લઈ જવા માટે ભારતીય રેલ્વે સરહદ પાર કનેક્ટિવિટીને ઝડપથી મજબૂત બનાવી રહી છે, જેના ભાગરૂપે પ્રધાનમંત્રી નરેન્દ્ર મોદી અને નેપાળના પ્રધાનમંત્રી બાલેન્દ્ર શાહ આગામી ૨૩ નવેમ્બરના રોજ બંને દેશો વચ્ચે નવી એક્સપ્રેસ ટ્રેન સેવાને લીલી ઝંડી આપશે. ઉત્તર પ્રદેશના અયોધ્યા ધામ અને નેપાળના જનકપુર ધામ જેવા બે પવિત્ર યાત્રાધામોને જોડતી આ ટ્રેન ગોરખપુર, બસ્તી, રક્સૌલ, સીતામઢી, મધુબની અને જયનગર જેવા મહત્વપૂર્ણ સ્ટેશનો પર રોકાશે. આ નવી સેવા શરૂ થવાથી ઉત્તર પ્રદેશ અને બિહારના અનેક જિલ્લાઓના મુસાફરો તથા શ્રદ્ધાળુઓ માટે બંને દેશો વચ્ચેની અવરજવર અત્યંત સુગમ બનશે, જે સહિયારા સાંસ્કૃતિક વારસા અને લોકો-થી-લોકોના સંપર્કને વધુ ગાઢ બનાવશે.
અયોધ્યા અને જનકપુર ધામ વચ્ચેનું આ સીધું રેલ જોડાણ માત્ર ધાર્મિક યાત્રાળુઓ પૂરતું મર્યાદિત ન રહેતા બંને પડોશી દેશોના સ્થાનિક અર્થતંત્ર માટે પણ આશીર્વાદરૂપ સાબિત થશે. મુસાફરો અને પ્રવાસીઓની અવરજવર વધવાથી જોડાયેલા વિસ્તારોમાં સ્થાનિક હોટલો, દુકાનો, પરિવહન સંચાલકો અને પર્યટન સંબંધિત વ્યવસાયોમાં તેજી આવશે. આ ઉપરાંત, ભારત અને નેપાળ વચ્ચે અન્ય ક્રોસ-બોર્ડર માળખાકીય પ્રોજેક્ટ્સ પર પણ પૂરજોશમાં કામ ચાલી રહ્યું છે, જેમાં જયનગર-બિજલપુરા-બરદીબાસ અને જોગબની-બિરાટનગર રેલ લિંક્સનું તબક્કાવાર વિસ્તરણ તેમજ મહત્વાકાંક્ષી પ્રસ્તાવિત રક્સૌલ-કાઠમંડુ રેલ લાઇનનો સમાવેશ થાય છે.
રેલ માળખાના વિકાસની સાથે-સાથે બંને દેશો વચ્ચે તકનીકી અને માનવ સંસાધન ક્ષમતા નિર્માણમાં પણ નોંધપાત્ર પ્રગતિ થઈ છે. તાજેતરના વર્ષોમાં નેપાળ રેલ્વેના અધિકારીઓ અને કર્મચારીઓને ગુજરાતના વડોદરા સ્થિત ગતિશક્તિ યુનિવર્સિટી ખાતે આધુનિક ટ્રેન કામગીરીના વિવિધ પાસાઓ અંગે ખાસ તાલીમ આપવામાં આવી છે. આ તમામ સંયુક્ત પ્રયાસો દર્શાવે છે કે આધુનિક અને સુલભ રેલ નેટવર્ક આગામી સમયમાં ભારત અને નેપાળની પ્રાદેશિક ભાગીદારી, વેપાર અને દ્વિપક્ષીય સહયોગનો સૌથી મજબૂત આધારસ્તંભ બની રહેશે.
(7:46 PM IST)









છેલ્લા 8 દિવસમાં સૌથી લોકપ્રિય 
