મુંબઈ / નવી દિલ્હી | તા.31: સપ્તાહના અંતિમ અને જુલાઈ મહિનાના આખરી દિવસે ભારતીય શેરબજારે શાનદાર પ્રદર્શન કરતા રોકાણકારોના ચહેરાઓ પર ખુશી લાવી દીધી છે. શેરબજારના બેન્ચમાર્ક ઈન્ડેક્સ એવા સેન્સેક્સ અને નિફ્ટી ૫૦ સત્રના અંતે લીલા નિશાનમાં બંધ રહ્યા હતા. સપ્તાહના છેલ્લા દિવસે સેન્સેક્સ ૧૬૬ પોઈન્ટ એટલે કે ૦.૨૧ ટકાના ઉછાળા સાથે ૭૮,૦૯૪.૬૪ ની સપાટી પર બંધ રહ્યો હતો, જ્યારે નિફ્ટી ૫૦ ઈન્ડેક્સ ૬૬ પોઈન્ટ (૦.૨૭%) ના વધારા સાથે ૨૪,૩૮૩.૬૦ પર સ્થિર થયો હતો. આ સાથે જ બજારમાં સતત ત્રીજા સત્રમાં તેજી જોવા મળી છે. મજબૂત કોર્પોરેટ કમાણી અને વિદેશી સંસ્થાગત રોકાણકારોના પ્રવાહના કારણે જુલાઈ મહિનામાં બંને મુખ્ય સૂચકાંકોએ ૨ ટકાથી વધુનું વળતર આપ્યું છે. 
બજારમાં આવેલી આ તેજીને કારણે બોમ્બે સ્ટોક એક્સચેન્જ (BSE) પર લિસ્ટેડ કંપનીઓનું કુલ માર્કેટ કેપિટલાઇઝેશન વધીને આશરે ₹૪૮૬ લાખ કરોડ સુધી પહોંચી ગયું છે, જેના કારણે માત્ર એક જ દિવસમાં રોકાણકારોની સંપત્તિમાં અંદાજે ₹૩ લાખ કરોડનો જંગી વધારો થયો છે. મોટા શેરોની સાથે-સાથે મિડકેપ અને સ્મોલકેપ ઈન્ડેક્સે પણ ઉત્સાહજનક દેખાવ કર્યો છે અને બંનેમાં ૦.૪૪ ટકાથી વધુનો વધારો નોંધાયો છે. ક્ષેત્રવાર વાત કરીએ તો, ઓટો અને ઓઈલ એન્ડ ગેસ શેરોમાં ભારે ખરીદી જોવા મળી હતી, જ્યારે રિયલ્ટી અને એફએમસીજી શેરોમાં સાધારણ દબાણહતું. 
કઈ કંપનીઓએ મારી બાઝી? જૂન ક્વાર્ટરના અપેક્ષા કરતા શાનદાર નાણાકીય પરિણામોના જોરે બજાજ ફાઇનાન્સ, હ્યુન્ડાઇ મોટર ઇન્ડિયા, બાંલકૃષ્ણ ઇન્ડસ્ટ્રીઝ અને બજાજ ફિનસર્વના શેરોમાં ૬% થી ૮.૫% સુધીનો જબરદસ્ત ઉછાળો જોવા મળ્યો હતો. આ ઉપરાંત ગેઇલ (GAIL), ટાટા મોટર્સ અને અશોક લેલેન્ડ જેવા દિગ્ગજ શેરો પણ ખરીદીના મજબૂત વલણને કારણે ટોચના ગેઇનર્સમાં સામેલ રહ્યા હતા. 
વિશ્વભરમાં પશ્ચિમ એશિયાના તણાવ અને ક્રૂડ ઓઈલની અસ્થિરતા વચ્ચે પણ ભારતીય અર્થવ્યવસ્થાની મજબૂતાઈ અને સ્થાનિક રોકાણકારોના ભરોસાને કારણે બજારનું આ મનોબળ જળવાઈ રહ્યું છે, જે આગામી દિવસોમાં રોકાણકારો માટે વધુ સકારાત્મક સંકેતો આપી રહ્યું છે.