મુંબઈ : મુંબઈની લોકલ ટ્રેનમાં ૨૨ વર્ષીય યુવક મયંક લોહારની ચાકુ મારીને કરવામાં આવેલી હત્યાના ચકચારી કેસમાં એક નવો અને ચોંકાવનારો વળાંક સામે આવ્યો છે, જેમાં મુખ્ય આરોપી રોશન સુવર્ણાએ કોર્ટમાં જામીન અરજી દાખલ કરી દાવો કર્યો છે કે તે હત્યા કરનાર નહીં પરંતુ ઝઘડો છોડાવનાર હતો.

પ્રાગત વિગતો અનુસાર, ગત ૨૩ જૂન ૨૦૨૬ની રાત્રે ચર્ચગેટથી નાલાસોપારા તરફ જતી ફાસ્ટ લોકલ ટ્રેનના ફર્સ્ટ ક્લાસ ડબ્બામાં વરસાદનું પાણી અંદર આવવાથી દરવાજો બંધ રાખવા બાબતે મયંક અને અન્ય અજાણી વ્યક્તિ વચ્ચે ઉગ્ર બોલાચાલી અને મારામારી થઈ હતી.

આરોપી રોશને પોતાની જામીન અરજીમાં રજૂઆત કરી છે કે તેણે બંને વચ્ચેનો ઝઘડો શાંત પાડવાનો પ્રયાસ કર્યો હતો અને અસલી હુમલાખોર ટ્રેનમાંથી નાસી છૂટ્યો હતો, જ્યારે પોલીસે ખોટી રીતે તેની ધરપકડ કરીને આ કેસમાં ફસાવી દીધો છે.

બચાવ પક્ષ દ્વારા પોલીસ તપાસ, સીસીટીવી ફૂટેજની વિશ્વસનીયતા અને ઓળખ પરેડ સામે સવાલો ઉઠાવવામાં આવ્યા છે, જ્યારે મૃતક મયંકના પરિવારજનો અને તેમના વકીલે આ તમામ દાવાઓને સદંતર ફગાવીને આરોપીની જામીન અરજીનો ઉગ્ર વિરોધ કર્યો છે.

પરિવારજનોના જણાવ્યા મુજબ મયંક નિઃશસ્ત્ર હતો અને ઝઘડો શાંત થયા બાદ રોશને પોતાની બેગમાંથી ચાકુ કાઢીને તેની પર ક્રૂરતાપૂર્વક હુમલો કર્યો હતો, જેથી જામીન મળવાથી સાક્ષીઓની સુરક્ષા જોખમમાં મુકાઈ શકે છે.
 

આ સંવેદનશીલ મામલામાં આગામી ૨૦ નવેમ્બરે જામીન અરજી પર સુનાવણી હાથ ધરવામાં આવનાર છે, જે બાદ કોર્ટના આદેશ પર સમગ્ર તપાસની દિશા અને આગામી કાનૂની પગલાં નિર્ધારિત થશે.