<img height="1" width="1" style="display:none" src="https://www.facebook.com/tr?id=1793108690839422&ev=PageView&noscript=1" />
News of Monday, 16th November 2026

'મહાકાલની ધરતી પર કોઈ રોકી નહીં શકે' ઈન્દોરના ડિલાઈટ દસ્તૂર ગ્રાઉન્ડમાં દિલજીત દોસાંઝનો લાઈવ કોન્સર્ટ યોજાયો

બોમ્બની નકલી ધમકીઓ અને 4 ગીતો ન ગાવાના પ્રતિબંધ છતાં દિલજીતે 'જય શ્રી મહાકાલ'ના નારા લગાવ્યા:તેમણે દિવંગત શાયર રાહત ઈન્દોરીના શેર સંભળાવી વિરોધીઓને જડબાતોડ જવાબ આપ્યો

મશહૂર પંજાબી સિંગર દિલજીત દોસાંઝનો જાદુ હાલ તેમના 'AURA ઈન્ડિયા ટૂર 2026' દ્વારા સમગ્ર દેશમાં છવાયેલો છે. આ જ શ્રેણીમાં રવિવારે રાત્રે તેમણે મધ્ય પ્રદેશની આર્થિક રાજધાની ઈન્દોરમાં એક ધમાકેદાર લાઈવ કોન્સર્ટ કર્યો હતો. જોકે, આ શો જેટલો તેની ભવ્યતા માટે ચર્ચામાં રહ્યો, તેટલો જ તેની સાથે જોડાયેલા વિવાદો અને પ્રતિબંધોને કારણે પણ સમાચારોમાં રહ્યો, કારણ કે શો પહેલા બોમ્બથી ઉડાવી દેવાની નકલી ધમકીઓ અને વહીવટીતંત્રના નિયંત્રણો છતાં દિલજીતે મંચ પર ઉતરીને રાહત ઈન્દોરીના શેર સંભળાવી વિરોધીઓને સણસણતો જવાબ આપ્યો હતો.

 

ઈન્દોરના 'ડિલાઈટ દસ્તૂર' ગ્રાઉન્ડમાં યોજાયેલા આ કોન્સર્ટની શરૂઆત અત્યંત ઉર્જાવાન અંદાજમાં થઈ હતી, જ્યાં મંચ પર આવતાની સાથે જ દિલજીત દોસાંઝે સૌથી પહેલા ચાહકો પાસે 'જય શ્રી મહાકાલ'નો જયકારો લગાવ્યો હતો. તેમણે જનતાની વચ્ચે ખુલીને કહ્યું હતું કે આ બાબા મહાકાલની પવિત્ર નગરી છે અને અહીં આવતા તેમને કોઈ રોકી શકે તેમ નથી. દિલજીતે પોતાના બેબાક અંદાજમાં જણાવ્યું હતું કે તેઓ ન તો પહેલા ક્યારેય ડર્યા હતા અને ન તો આજે ડરે છે, અને આ તેમના ચાહકોની જ તાકાત છે જેના કારણે તેઓ આજે અહીં ઊભા રહીને પરફોર્મ કરી રહ્યા છે.

 

કોન્સર્ટ દરમિયાન દિલજીતે એ વાતનો પણ ઉલ્લેખ કર્યો હતો કે તેમને ઈન્દોર આવતા રોકવા માટે કઈ હદ સુધી પ્રયાસો કરવામાં આવ્યા હતા. તેમણે ચાહકોને સંબોધતા કહ્યું હતું કે ભલે તેમને રોકવા માટે તમામ પ્રતિબંધો લગાવવામાં આવ્યા હોય, પરંતુ તેઓ પોતાનું વચન નિભાવવા માટે શહેરમાં પહોંચ્યા છે, અને જ્યારે તેમણે એકવાર જનતાને કહી દીધું હતું કે તેઓ આવશે, ત્યારે તેઓ પોતાના શબ્દોથી પાછળ હટ્યા નથી.

 

 

વહીવટીતંત્ર તરફથી કોન્સર્ટ દરમિયાન કેટલાક નિયંત્રણો મૂકવામાં આવ્યા હતા અને 4 વિશેષ ગીતો ન ગાવાની સૂચના આપવામાં આવી હતી, જેના કારણે દિલજીતનો ગુસ્સો મંચ પર સ્પષ્ટપણે જોવા મળ્યો હતો. તેમણે ઈન્દોરના જ મહાન અને દિવંગત શાયર રાહત ઈન્દોરીની મશહૂર ગઝલના શેર સંભળાવીને સમગ્ર મહેફિલનો મિજાજ બદલી નાખ્યો હતો, અને કટાક્ષ કરતા કહ્યું હતું કે આ નથી ગાવાનું, તે નથી ગાવાનું, આ નથી કરી શકતા, તે નથી કરી શકતા, પરંતુ અમારા મોઢેથી જે નીકળે તે જ સત્ય છે.

તેમણે આગળની પંક્તિઓ દોહરાવતા કહ્યું હતું કે अगर कोई खिलाफ है तो होने दे, इससे कोई जान थोड़ी चली जाएगी, और यह सारा धुआं है आसमान थोड़ी है. દિલજીતે દુશ્મનો પણ ઓછા નથી પરંતુ અમારી જેમ હથેળી પર જીવ થોડો છે અને કોઈના બાપનું હિન્દુસ્તાન થોડું છે જેવી પંક્તિઓ દ્વારા ટીકાકારોને તીખો સંદેશ આપ્યો હતો.

 

ઈન્દોરમાં દિલજીત દોસાંઝના આ મેગા કોન્સર્ટ પહેલા સુરક્ષા એજન્સીઓ અને વહીવટીતંત્રની ઊંઘ હરામ થઈ ગઈ હતી.કાર્યક્રમને નિષ્ફળ બનાવવા માટે શહેરની મેયર ઓફિસ, 3 મોટી બેંકો અને 3 ખાનગી શાળાઓને ઈ-મેઈલ મોકલીને બોમ્બથી ઉડાવી દેવાની ધમકીઓ આપવામાં આવી હતી. તંત્રએ આ મામલાની ઊંડાણપૂર્વક તપાસ કરી હતી અને આ તમામ સંદેશાઓને પ્રથમ દ્રષ્ટિએ સંપૂર્ણપણે નકલી જાહેર કર્યા હતા, ત્યારબાદ જ કડક પોલીસ સુરક્ષા વચ્ચે આ શોને લીલી ઝંડી આપવામાં આવી હતી.

(12:03 AM IST)