તા. ૨૦ નવેમ્બર ર૦ર૬ વિક્રમ સંવત ર૦૮૩ કારતક સુદ – ૧૧ શુક્રવાર
News of Friday, 20th November 2026
આતંકવાદ બંધ નહીં થાય ત્યાં સુધી પાકિસ્તાન સાથે કોઈ વાતચીત નહીં
શિકાગો યુનિવર્સિટીમાં વિદ્યાર્થીઓ સાથેના સંવાદ દરમિયાન રાહુલ ગાંધીએ સરહદ પારના આતંકવાદ મુદ્દે પાકિસ્તાનને આડેહાથ લીધું : ચૂંટણી બહિષ્કારનો ઇનકાર કરતા બંધારણ બચાવવાની વાત કરીઃ ભાજપે વિદેશની ધરતી પરથી દેશની છબી ખરાબ કરવાનો વળતો આરોપ લગાવ્યો

શિકાગો, તા.૨૦: લોકસભામાં વિપક્ષના નેતા રાહુલ ગાંધીએ શિકાગો યુનિવર્સિટીમાં વિદ્યાર્થીઓ સાથેની ખાસ વાતચીત દરમિયાન ભારત-પાકિસ્તાન સંબંધો અને સરહદ પારના આતંકવાદ પર પોતાનું વલણ સ્પષ્ટ કર્યું છે. એક પાકિસ્તાની વિદ્યાર્થી દ્વારા પરસ્પર સહયોગ અંગે પૂછવામાં આવેલા પ્રશ્નના જવાબમાં રાહુલ ગાંધીએ સ્પષ્ટ શબ્દોમાં જણાવ્યું હતું કે જ્યાં સુધી પાકિસ્તાન ભારતમાં આતંકવાદને પ્રોત્સાહન અને સમર્થન આપવાનું બંધ નહીં કરે, ત્યાં સુધી બંને દેશો વચ્ચે કોઈ પણ પ્રકારની વાતચીત શકય નથી. તેમણે ભારપૂર્વક કહ્યું કે એક તરફ નિર્દોષ ભારતીય નાગરિકોની હત્યા થતી રહે અને બીજી તરફ મંત્રણા ચાલુ રહે તે કયારેય સ્વીકાર્ય હોઈ શકે નહીં, તેથી શાંતિ માટે પહેલા હિંસા અને આતંકનો અંત અનિવાર્ય છે.
આ સંવાદ દરમિયાન દેશની આંતરિક રાજનીતિ અને ચૂંટણી પ્રક્રિયા પરના સવાલોના જવાબ આપતા રાહુલ ગાંધીએ જણાવ્યું હતું કે વિપક્ષ કયારેય ચૂંટણીનો બહિષ્કાર નહીં કરે, કારણ કે તેમ કરવાથી લોકશાહી વ્યવસ્થા નબળી પડશે અને જનતાનો વિશ્વાસ ડગી જશે. તેમણે આક્ષેપ કર્યો હતો કે ભાજપ પણ ઇચ્છે છે કે લોકોનો લોકશાહી પરથી વિશ્વાસ ઉઠી જાય, પરંતુ વિપક્ષ સત્તા માટે નહીં પણ બંધારણના રક્ષણ માટે દરેક મતની લડાઈ લડશે. બીજી તરફ, રાહુલ ગાંધીના આ નિવેદનો પર ભારતીય જનતા પાર્ટીએ આકરી પ્રતિક્રિયા આપી છે અને સંસદીય બાબતોના મંત્રી કિરેન રિજિજુએ આરોપ લગાવ્યો છે કે રાહુલ ગાંધી વિદેશી મંચ પરથી ભારત વિરોધી પ્રચાર કરીને દેશની લોકશાહી સંસ્થાઓને નબળી પાડવાનો પ્રયાસ કરી રહ્યા છે.
રાહુલ ગાંધીના આ વિદેશ પ્રવાસ અને તેમના નિવેદનોને પગલે ભારતના રાજકીય વર્તુળોમાં નવો વિવાદ છેડાયો છે. આગામી દિવસોમાં સંસદના સત્ર અને રાજકીય રેલીઓમાં સત્તાધારી પક્ષ અને વિપક્ષ વચ્ચે વિદેશની ધરતી પર અપાયેલા નિવેદનો, ચૂંટણી પ્રક્રિયાની વિશ્વસનીયતા અને રાષ્ટ્રીય સુરક્ષા જેવા મુદ્દાઓ પર સામસામે પ્રહારો વધુ તેજ બને તેવી શકયતા છે.
(11:04 AM IST)









છેલ્લા 8 દિવસમાં સૌથી લોકપ્રિય 
